Read gitonga 2 Dzikoronika 15 Bible Online

2 Dzikoronika 15 - gitonga bible

2 Dzikoronika 15

¹Liphuvbo la Nungungulu li dita ga Azariya, mwamana wa Obhedhi.

²Uye a di hongola ga Asa, aya mu embela, khuye: “Nyi yingiseni, uwe Asa, ni enu mwatshavbo va na Judha, ni va na Bhejami! PFHUMU Nungungulu a na ni enu, na mu ngari naye, mwa gu mu vbwetani, Uye mu na mu mana; aholu mwa gu mu digani, Uye nuye a na mi diga.”

³Israyeli khade gikhati nya gulaphe nari mwalo Nungungulu nya lisine, ni vaphasi nya mhamba nya gu mu hevbudze, gambe va diri mwalo Nayo.

⁴Aholu gikhati va nga bani vari vbakari nya wuvi va di wuya ga PFHUMU Nungungulu wa na Israyeli, ni gu mu vbweta, avo va di mu mana.

⁵Khu matshigu yale, gu diri mwalo gurula, ga avo va nga bani na va gubela ambari avo va nga bani na va guduga, kholu dzitshanisa dzi di manega ga vathu vatshavbo va mayigo mule.

⁶Kholu litigo li di wugela limbe litigo, lidhoropa li wugela limbe lidhoropa; kholu Nungungulu a di va khunguvanyisa khu dzitshanisa nya dzingi.

⁷Gasi olu dzi garadzeni, mandza yanu ma nga khali ghome, kholu thumoni gwanu mu na mana tshatshazelo.

⁸Asa na pwide magana yaya, ni wuprofeti wa muprofeti Azariya, mwamana wa Obhedhi, a di tiya longo a dusela manyala yatshavbo nya gunyenyeze tigoni ga Judha ni ga Bhejami, gumogo ni madhoropani gwatshavbo a nga ma dwanela a ma wandra, gipandre gya mugigomoni gya Efrayimi; a wusedza giluvelo gya PFHUMU Nungungulu gi nga bani gi romo mbeli nya Nyumba ya PFHUMU Nungungulu.

⁹A di tombanisa vatshavbo va na Judha, ni va na Bhejami, gumogo ni valuveli va Efrayimi, va na Manasi ni va na Simiyoni, va nga bani va vbanya vbakari gwawe, kholu nya vangi va na Israyeli va di bwelede avbo gwaye khu gu wona nya gukhavo, PFHUMU Nungungulu waye a na ni uye.

¹⁰Va tshanganide Jerusalema, khu ngima nya wuraru, khu mwaga nya likhumi na livbandre nya gufume ga Asa.

¹¹Khu litshigu lolo, va di ningela miphaso ga PFHUMU Nungungulu, khu phango va nga wuyago navo nya livbandre na mavili mazana (700) dzimombe ni livbandre na mavili magumi mazana (7000) dzinvuta.

¹²Va di gira gidzumeledzwano nya guvbwete PFHUMU Nungungulu wa vababe wawe, khu monyo wawe watshavbo ni hefemulo wawe watshavbo.

¹³Ni wevbini muthu wule a na gumba vbweta PFHUMU Nungungulu wa na Israyeli, fanede gu songwa; gani gyanana, mwendro khongolo, gani mwama mwendro nyamayi.

¹⁴Va di sambanya ga PFHUMU Nungungulu, khu lito nya gukhugege ni gukulungela, na va womba mipundru ni sitoliyo.

¹⁵Vatshavbo va na Judha va di nengela khu mahungu nya gisambanyo gegi, kholu va di sambanya khu monyo wawe watshavbo, ni gugola gwawe gwatshavbo, va di vbweta PFHUMU Nungungulu va mu mana. PFHUMU Nungungulu a di va ninga gurula malangani gwatshavbo.

¹⁶Mufumeli Asa, a di dusa mayi waye Mahaka, wulangani nya wupfhumugadzi, kholu uye nuye a di giride gifananiso gya Asitaroti, Asa a di mu khungumulela gifananiso gyaye, aya gi vbisa kovani wa Sedhroni.

¹⁷Aholu malangani nya sigomo, kha ma khungumudwa tigoni ga Israyeli; aholu monyo wa Asa wu di manega na wu gululamide ga matshigu yatshavbo nya guvbanye gwaye.

¹⁸Asa a di resa Nyumbani ga Nungungulu sombo satshavbo nya miphaso sa babe waye, ni sombo a si phasedego uye kamwe Nyumbani ga Nungungulu, a gu esi: Parata, ndralama ni sombo nya lisima ngudzu.

¹⁹Gukhugela magumararu na livbandre myaga nya gufume ga Asa, tigoni kha ga nga manega nyimbi.