Read gitonga 2 Dzikoronika 16 Bible Online

2 Dzikoronika 16 - gitonga bible

2 Dzikoronika 16

¹Khu mwaga nya magumararu na livbandre na moyo nya gufume ga Asa, Bhahasa, mufumeli wa Israyeli, a di soma nyimbi a gwela tigoni ga Judha, aya vbaha dhoropani ga Rama, gasi gu himbedzela vathu, va si dugi ambari gubela ga Asa, mufumeli wa Judha.

²Khavbo avbo, Asa a di dzega parata, ndralama ni dzithomba dza Nyumbani ga Nungungulu, nidzo dza nyumbani ga mufumeli, a dzi rumela ni sithumi ga Bheni-Hadhadhi, mufumeli wa Siriya a nga bani a khala Dhamasiko a ganela, khuye:

³“Gu na manege gidzumeledzwano ga eni ni uwe, kha nga idzo gu nga bani gu giregide ga babe wangu ni babe wago. Wona, nyi ngu gu rumela parata ni ndralama, olu indra uya pila gidzumeledzwano u giridego ni Bhahasa, mufumeli wa Israyeli, gasi uye a khuge eno gwangu a si nyi dhumeli.”

⁴Bheni-Hadhadhi a di yingisa magana ya Asa, a rumela vathangeli vaye nya dzinyimbi guya wugela madhoropa ya Israyeli; va sasela madhoropa ya Ijomi, Dhani, Abheli-Mayimi ni madhoropa yatshavbo nya sisangala ya Nafitali.

⁵Bhahasa na pwide esi, a di hegisa gu vbaha Rama, a si simami gambe ni thumo waye.

⁶Khu guralo, mufumeli Asa, a di dzega va na Judha vatshavbo, a rumela guya dzegwa siwindri satshavbo ni mapulango yakone ya Rama esi Bhahasa a nga bani na vbahide khiso; Asa a ta vbaha khiso madhoropa ya Gebha ni Misipa.

⁷Khu gikhati gyogyo gya gimwegyo, a dita muprofeti Hanani ga Asa, mufumeli wa Judha, ata mu embela, khuye: “Kha nga olu u tumbidego mufumeli wa Siriya, u si tumbi PFHUMU Nungungulu wago, khu guralo, nyimbi ya mufumeli wa Siriya, yi tsitimugide mandzani gwago.

⁸Ina Vaetiyopiya ni Valibhiya, dzinyimbi dzawe dzi diri mwalo tshivba nya yikhongolo ni dzikareta nya dzingi, ni vakhileli nya dzikavalu, gani? Olu u nga tumba PFHUMU Nungungulu, Uye a va ningede mandzani gwago.

⁹Kholu maho ya PFHUMU Nungungulu, ma gu khedza mafuni gwatshavbo gasi gu yeyedza tshivba yaye ga vale va mu vbwetago khu monyo wawe watshavbo; khu kotani nya isoso, uwe u giride wupumbu. Khu guralo, gukhugela olu u na dhumedwa khu dzinyimbi.

¹⁰Khavbo avbo, Asa a di tala khu likhulo a wugela muwoni nya siwoniso, a mu dzega a mu tela pasoni; kholu uye a di goroswa ngudzu khuye; khu gikhati gyogyo gya gimwegyo, Asa a di tshanisa gambe ni vambe vathu.”

¹¹Mithumo yatshavbo ya Asa, nya guphele niyo nya guhegise, yi lovidwe umo nya Libhuku nya Matimo la vafumeli va na Judha ni va na Israyeli.

¹²Khu mwaga nya magumararu na livbandre na wu na nya gufume gwaye, Asa a di thega khu madwali nya silondra sa migondroni; madwali ma di tshingide ngudzu, ambari ulo, gudwalani gwaye, uye gima kha nga vbweta PFHUMU Nungungulu, aholu uye a di tumba dzinyanga.

¹³Asa fude khu mwaga nya magumana na moyo nya gufume gwaye; aya lala gumogo ni vavelegi vaye.

¹⁴Va di mu dzinga ga lithowo a nga dzi girelago abune Dhoropani ga Dhavhidhe; va di mu ladzisa vbadawutunu nya gutale khu mahema nya gunungele nya yatshavbo mafumbu nya mafura ma dongisedwego khu vagengeli va wutigo thumo wowu nya gugire mafura nya gunungele, va mu vbisela mabani nya gutale ngudzu.