Read gitonga 2 Dzikoronika 17 Bible Online

2 Dzikoronika 17 - gitonga bible

2 Dzikoronika 17

¹Josafati, mwamana wa Asa, a di tshikedza wulanga wa babe waye, a phara ndronga nya wufumu, a tiyisa mufumo waye gasi wu si padwi khu va na Israyeli.

²A di vega masotshwa makhokholani gwatshavbo nya madhoropa ya na Judha, a vega ni mitsawa nya gughadhe madhoropani gwa na Judha ni gwa na Efrayimi, ma nga bani na ma phangidwe khu babe waye.

³PFHUMU Nungungulu a diri ni Josafati, kholu uye a di gimbila khu dzindzila nya guhegule dza babe waye Asa, kha nga vbweta vanungungulu nya Vabhahali.

⁴Aholu a di vbweta Nungungulu wa babe waye, gumogo ni gu landrisa milayo yaye, nasiri mithumo ya Israyeli.

⁵Khu guralo, PFHUMU Nungungulu a di tiyisa mufumo mandzani gwaye, ni vatshavbo va na Judha va di resa miningelo nya gute luva Josafati, avbo uye a nga mana thomba ni wudhumo nya gutale.

⁶A di tiyisa monyo waye gu landrisa dzindzila dza Pfhumu, a dusa malangani nya gukhugege madingo nya sifananiso tigoni ga Judha.

⁷Khu mwaga nya wuraru nya gufume gwaye, uye a di rumela manganagana yaye guya hevbudza tigoni ga Judha, a gu ava: Bheni-Hayili, Obhadhiya, Zakariya, Nataniyeli ni Mikeya;

⁸gumogo ni va na Levhi, Semaya, Netaniya, Zebhadhiya, Asayeli, Semiramoti, Jonatane, Adhoniya, Tobhiya ni Tobi-Adhoniya; gumogo ni va na Levhi, gu diromo vaphasi nya mhamba Elisama ni Jeyoramo.

⁹Va di phara Libhuku mandzani vaya hevbudza Nayo wa PFHUMU Nungungulu tigoni gwatshavbo ga Judha, va dzundrulugela madhoropa yatshavbo va hevbudza vathu.

¹⁰Mayigo yatshavbo nya vaakelane va Judha ma di tala khu githawo ga PFHUMU Nungungulu, avbo va nga mba kodza guwusa nyimbi va wugela Josafati.

¹¹Vafilisitiya nya gukari, va di resa miningelo nya guluve Josafati, parata gumogo ni dzitsapawu nya khupo; Vaarabhiya navo, va di mu resela mitshambi nya dzinvuta, khu tengo nya livbandre na mavili magumi ni livbandre na mavili mazana (7.700) dzihamba, livbandre na mavili magumi ni livbandre na mavili mazana (7.700) vanyamabhongwe.

¹²Josafati a di simama gu andra ni gu khusega ngudzu, a vbaha makhokhola ni madhoropa nya guvegedzele dzithomba tigoni ga Judha.

¹³Adiri ni mithumo nya gutale madhoropani ga Judha; Jerusalema, uye a diri ni vathu nya gudwane nyimbi ni vama nya dzindrena.

¹⁴Tengo wawe mayelano khu dzinyumba dza vababe vawe khowu: Tigoni ga Judha, vathangeli nya gikwata nya likhumi mazana (1.000) a diri Adhina, a nga bani nari uye muthangeli nya khongolo, uye a diri ni mazana mararu magumi mazana (300.000) vama nya dzindrena;

¹⁵a landrela muthangeli Jowanani, uye a diri ni mazana mavili ni livbandre na mararu magumi mazana (280.000) vama.

¹⁶Hwane gwaye, gu landrela Amaziya, mwamana wa Zikiri, uye a di dzi ningela khu gudzina gwaye thumoni gwa PFHUMU Nungungulu, uye a di thangela, mazana mavili magumi mazana (200.000) vama, nya dzindrena.

¹⁷Ga va na Bhejami, gu diri, Eliyadha, mwama nya ndrena, uye a diri ni mazana mavili magumi mazana (200.000) vama nya gusome khu malaho ni sitshangu.

¹⁸Khu hwane gwaye, a di landrela Josabhadhi, nari ni lizana ni livbandre na mararu magumi mazana (180.000) vama nya gusome guya nyimbitunu.

¹⁹Ava khavo va nga bani na vari thumoni ga mufumeli, vbavbandze ga vale mufumeli a nga bani na va vegide makhokholani nya madhoropa ya tigoni gwatshavbo gwa Judha.