Read gitonga 2 Dzikoronika 18 Bible Online

2 Dzikoronika 18 - gitonga bible

2 Dzikoronika 18

¹Josafati a diri ni dzithomba ni wudhumo nya gutale; khu guralo, a di thangana wupari ni Akabi.

²Na gu vbede myaga nya gukari, a di endra aya Samariya ga Akabi; Akabi a diya mu songela dzinvuta ni dzimombe nya gutale, uye gumogo ni vathu a nga hongolago navo; khavbo avbo, a di mu kutsedzela gu gwela naye tigoni ga Ramoti-Gileyadhi.

³Akabi, mufumeli wa Israyeli, a di wudzisa Josafati, mufumeli wa Judha, khuye: “U ngu dzina guhongola ni eni tigoni ga Ramoti-Gileyadhi, gani?” Josafati a di mu hakha, khuye: “Nyi na gira kha nga uwe idzo u guromo khidzo, ni vathu vangu va na gira kha nga vago, hi na bani hiri gumogo nyimbitunu.”

⁴Josafati a di engedza gambe ga mufumeli wa Israyeli, khuye: “Nga phela khu gu wudzisa PFHUMU Nungungulu, wari khuye ginani khu mahungu yaya.”

⁵Khavbo avbo, mufumeli wa Israyeli a di tshanganisa vaprofeti va enelago mazana mana (400) vama, ava embela, khuye: “Gu ngu kodzega gu hi hongola nyimbitunu hiya dwana ni Ramoti-Gileyadhi mwendro hi si hongoli, gani?” Va di mu embela, khavo: “Indra, kholu PFHUMU Nungungulu a na va ningela mandzani ga mufumeli.”

⁶Aholu Josafati a di khuye: “Ina avba mwalo muprofeti wa PFHUMU Nungungulu, gasi hi mu wudzise, gani?”

⁷Khavbo avbo, mufumeli wa na Israyeli, a di embela Josafati, khuye: “A nga romo avba mwama moyo hi yelago gu wudzisa khuye ga PFHUMU Nungungulu; aholu eni kha nyi mu goli kholu gima kha nyi profeteli silo nya sadi, uye a gu nyi profetela basi iso nyamba sadi; muprofeti wakone khuye Mikeya, mwamana wa Inila.” Josafati a di mu embela, khuye: “Mufumeli, u nga ganeli kharato.”

⁸Khavbo avbo, mufumeli wa Israyeli, a di rana moyo nya ndruna yaye a mu embela, khuye: Vbiredza u ya nyi ranela Mikeya, mwamana wa Inila, uta naye avba.

⁹Mufumeli wa na Israyeli, ni Josafati, mufumeli wa na Judha, va di khade vbasikhalotunu gwawe nya wufumu na va ambade dzingandzu dzawe nya wufumu, tendrelani nya nyangwa ya Samariya, vaprofeti vatshavbo va di profeta mbeli gwawe.

¹⁰Zedhekiya, mwamana wa Kanahana, a di dzi girela dzikeho nya gukari nya dzisimbi, a ganela, khuye: Khu dzikeho dzedzi, PFHUMU Nungungulu a ngu ganela, khuye: “U na bayisa khidzo Vaharami, kala u va mbembisa, havo bhi!”

¹¹Ni vatshavbo vaprofeti, va di profeta idzosaye, khavo: “Gwela uya Ramoti-Gileyadhi u na ya pala, kholu PFHUMU Nungungulu a na li ningela mandzani gwago uwe mufumeli.”

¹²Girumwa gi nga rumwago guya rana Mikeya, gi di ganela naye, khigyo: “Wona gukhuwe vaprofeti vatshavbo va ganede likana limwedo khu mahungu nya gutshambe ga mufumeli; khu guralo uwe nuwe gu vbwetega u ganela mahungu nya gutshambe ma fananago nayo yawe.”

¹³Mikeya a di mu phindrula, khuye: “Nyi ngu sambanya khu PFHUMU Nungungulu a vbanyago kheni, iso Nungungulu wangu a na gu nyi embelago, khiso nyi na ganelago.”

¹⁴Na vbohide ga mufumeli, mufumeli a di mu wudzisa, khuye: “Ina gu ngu kodzega gu hi soma nyimbi hi ya sasela Ramoti-Gileyadhi, mwendro kha gu kodzegi?” Mikeya a di hakha, khuye: “Gwela u naya dugelela, kholu lidhoropa li na ningedwa mandzani gwago.”

¹⁵Mufumeli a di mu embela, khuye: “Kala lini na nyi gu gu embela gukheni, u nyi embela silo nya gutshambe khu lina la PFHUMU Nungungulu?”

¹⁶Khavbo avbo, uye a di hakha, khuye: “Nyi di wona vatshavbo va na Israyeli na va phalalegide musigomoni kha nga dzinvuta dzi gu mwalo muhavisi. PFHUMU Nungungulu a di ganela, khuye: Vathu vava va mwalo mune; muthu ni muthu a na bwelele aya ndrangani gwaye.”

¹⁷Khu guralo, mufumeli wa na Israyeli a di khuye ga Josafati: “Kha nya gu embela gukheni oyu kha profeti silo nya sadi avbo gwangu, a gu profeta silo nya guvivbe, gani?

¹⁸Mikeya a di engedza, khuye: “Olu yingisani lito la PFHUMU Nungungulu: Nyi di wona PFHUMU Nungungulu na khade vbagikhalotunu gwaye nya wufumu, nari gumogo ni dzinyimbi dzaye dza ndzadzini, na dzi emide khu nyamudye gwaye gumogo ni nyambade gwaye.”

¹⁹PFHUMU Nungungulu a di wudzisa, khuye: Khu mani a na gu kutsedzelago Akabi, mufumeli wa Israyeli, gu a gwela Ramoti-Gileyadhi gasi aya fela iyoyo. A di nyi embela gambe, khuye: Moyo a di gu ganela khesi, mumbe a ganela khu simbe.

²⁰Khavbo avbo, gu di duga Liphuvbo li ema mbeli ga PFHUMU Nungungulu, khilo: “Eni nyi naya mu pfhadza!” PFHUMU Nungungulu a wudzisa, khuye: “Khu magirelo muni?”

²¹Ilo, khilo: “Nyi na duga nyi khala liphuvbo nya malipha ma dugago khu maganani ya vaprofeti vaye vatshavbo.” PFHUMU Nungungulu a di engedza, khuye: Khu lisine kamwe, u na ya mu pfhadza u mu pala, indra u ya gira isoso u ganedego.

²²Khu guralo, wona gukhuwe PFHUMU Nungungulu bedzide liphuvbo nya malipha maganani ga vaprofeti vava vago, khu guralo, Pfhumu ganede guvivba khu uwe.

²³Khavbo avbo, Zedhekiya, mwamana wa Kanahana, a di hidzimela ga Mikeya aya mu veta gimombo khu pama, a mu embela, khuye: “Liphuvbo la PFHUMU Nungungulu li vbindride khu hayi li ta ganela nago?”

²⁴Mikeya a di hakha, khuye: “Uwe u na li wona litshigu lile u na dugago khu makhuvini uya ga mambe makhuvi, gasi u ya sihala.”

²⁵Khavbo avbo, mufumeli wa Israyeli a di khuye: “Dzegani Mikeya mu mu bweledza nyaluphye ga Amoni, mwamangulu nya lidhoropa ni ga Jowasi, mwamana wa mufumeli.

²⁶Mu na mu embela, khenu: Mufumeli a ngu ganela, khuye: Thelani mwama yoyu nyumbani nya lipaso, mu mu hodzisa guhodza ni mati nya tshikwi, kala eni nyi wuya khu gurula.”

²⁷Mikeya a di mu embela, khuye: “Wa gu wuya khu gurula, khu lisine PFHUMU Nungungulu kha ganela khu ga eni.” A simama a ganela, khuye: “Yingisani enu mayigo yatshavbo!”

²⁸Khu guralo, mufumeli wa Israyeli, gumogo ni Josafati, mufumeli wa Judha, va di gwela tigoni ga Ramoti-Gileyadhi.

²⁹Mufumeli wa Israyeli a di embela Josafati, khuye: “Eni nyi na dzi siha khu gu ambala dzimbe dzingandzu, aholu uwe ambala dzingandzu dzago nya wufumu.” Khu guralo, mufumeli wa Israyeli a di dzi siha khu gu ambala dzimbe dzingandzu a bela nyimbitunu.

³⁰Khu guralo, mufumeli wa Siriya, a di leletela vathangeli nya dzikareta dzaye, khuye: “Mu nga dwanini ni mumbe muthu, gani dugwana mwendro khongolo, aholu, dwanani basi ni mufumeli wa Israyeli.”

³¹Avbo vathangeli nya dzikareta va nga wona Josafati, va di khavo: “Khuye oyu mufumeli wa Israyeli!” Va di mu randrela gasi va dwana naye. Aholu Josafati, a di keta, ni PFHUMU Nungungulu, a di mu vbanyisa; Nungungulu a di va ndreyisa mbeli gwaye.

³²Avbo vathangeli nya dzikareta va nga wona nya gukhavo khandruye mufumeli wa Israyeli, va di mu diga va si mu landreleli.

³³Khavbo avbo, mwama moyo a di khwandra giholoma gyaye a hekha mufumeli wa Israyeli na si muti khu vbamatshanganoni nya gikatawu gyaye nya dzisimbi. Khavbovbo, uye a di embela mugimbidzisi nya kareta yaye, khuye: “Thendregedza u nyi dusa vbavbandze nya litunga, kholu nyi bayisidwe ngudzu.”

³⁴Litunga li di vbisa ngudzu litshigu lolo; aholu mufumeli a di khala karetani gwaye a ema a khedzisana ni Vaasiriya kala vbamadambotunu. Khu gupfolani nya lidambo a difa.