Read gitonga 2 Dzikoronika 21 Bible Online

2 Dzikoronika 21 - gitonga bible

2 Dzikoronika 21

¹Josafati lade gumogo ni vavelegi vaye, dzingidwe gumogo ni vavelegi vaye Dhoropani ga Dhavhidhe, mwanaye Jeyoramo, a di mu tshikedza vbagikhalotunu gwaye nya wufumu.

²Uye a diri ni vandriyaye nya sikhwathana, sanana sa Josafati, a gu esi: Azariya, Jeyeli, Zakariya, Azariya, Mikayeli ni Sefatiya; vatshavbo vava, va diri sanana sa Josafati, mufumeli wa Judha.[1]

³Babe wawe a di va ninga dzithomba nya gutale ngudzu nya parata, ndralama ni simbe sombo nya lisima ngudzu ni madhoropa nya makhokhola tigoni ga Judha; aholu ndronga nya wufumu, a di ningela mwanaye Jeyoramo, kholu khuye a nga bani nari matiwula.

⁴Gikhati Jeyoramo a nga phara ndronga nya wufumu wa babe waye, a tiyiswa, a di songa khu litshari vandriyaye vatshavbo, gumogo gambe ni mambe manganagana nya gukari ya na Israyeli.

⁵Jeyoramo a diri ni tanga nya magumavili na miraru myaga gikhati a phedego gufuma, fumide livbandre na miraru myaga Jerusalema.

⁶A di gimbila khu dzindzila dza vafumeli va Israyeli, kha nga idzo va nga girago idzo va nyumbani ga Akabi, kholu nyamahegyane wa Akabi, a diri mwangadzi waye; a gira mithumo nya guvivbe mahoni ga PFHUMU Nungungulu.

⁷ Aholu PFHUMU Nungungulu kha nga gola gupfhungumula nyumba ya Dhavhidhe, khu kotani nya gidzumeledzwano a nga bani giride naye, kholu a di ganede naye khuye, a na mu ninga sanana si na khalago mwenge nyamba tshimega kala gupindruga.

⁸ Matshiguni ya Jeyoramo, va na Edhomi va di wugela mufumo wa Judha, va dzi emisela mufumo wawe.

⁹Avbo Jeyoramo a nga tanga mbeli ni vathangeli vaye gumogo ni dzikareta dzaye dzatshavbo; a di hongola ni wutshigu aya sasela va na Edhomi va nga bani va mu randrede gumogo gambe ni dzindruna nya dzikareta dzaye.

¹⁰Gukhugela litshigu lolo, va na Edhomi va di bomba gufumedwa khu mufumo wa Judha kala na muhuno; khu gikhati gya gimwegyo, Libina nuye a di bomba gufumwa khu babe waye Jeyoramo; kholu a nga diga PFHUMU Nungungulu, wa vababe vaye.

¹¹Uye giride gambe malanga nya gukhugege musigomoni sa Judha, a kutsedzela va na Judha ni vavbanyi va Jerusalema gu ndreya ndzilani; a ghohisa kharati va na Judha.

¹²Khavbo avbo, a di resedwa lidangalila li nga lowago khu muprofeti Eliya, li nga bani li ganela, khilo: PFHUMU Nungungulu wa babe wago Dhavhidhe a ngu ganela kharati, khuye: Kha nga olu u ngamba gimbila khu dzindzila dza babe wago Josafati, ni dzindzila dza Asa mufumeli wa Judha,

¹³aholu, u gimbila khu ndzila ya vafumeli va Israyeli, u kutsedzela vathu va na Judha ni vavbanyi va Jerusalema va bela wubhayini, gu fanana ni wubhayi wa nyumbani ga Akabi, ni gu gambe, u songide vandriyago u velegidwego navo, nari vathu nya vadi guvbindra uwe;

¹⁴wona nya gukhuwe, PFHUMU Nungungulu, a na ninga tsayiso nya yikhongolo ga vathu, ga sanana sago, ga vagadzi vago ni ga satshavbo iso si gu lumbago.

¹⁵Uwe wurumba wago, u na thegedwa khu libango nya madwali nya makhongolo mahembeni gwago, ma na engedzelanago khu litshigu ni litshigu, kala mahembe yago ma vbalaga vbavbandze.

¹⁶PFHUMU Nungungulu a di khendzugisa Vafilisitiya, ni Vaarabhiya va nga bani vari vaakelane ni Vaetiyopiya, va wugela Jeyoramo.

¹⁷Avo va di ta sasela va na Judha, tigoni gwawe, va phanga thomba yatshavbo va nga yi mana nyumbani ga mufumeli; va dzega gambe sanana saye ni vagadzi vaye, avbo va nga mu tshiyago nyambana gyanana vbavbandze basi ga Jewakazi, uye nya nandra ga sanana saye satshavbo.

¹⁸Khu hwane nya satshavbo sesi, PFHUMU Nungungulu a di mu veta khu madwali nya ndrani, nyamba hawuluga.

¹⁹Madwali ma di dandra khu litshigu ni litshigu, kala a vbedza myaga mivili, avbo mahembe yaye ma nga vbalagago vbavbandze khu gu dandra nya ngumbe, afa khu tshikwi yaye. Vathu vaye kha va mu vbisela mabani nya gunungele kha nga idzo va nga vbiselago khidzo vababe vaye.

²⁰Uye gikhati a nga phelago gu fuma, a diri ni tanga nya magumararu na mivili myaga, fumide Jerusalema livbandre na miraru myaga, fude nyamba lidwa khu vathu; va mu dzingide Dhoropani ga Dhavhidhe, aholu kha dzingwa marowoni ya vafumeli.