Read gitonga 2 Dzikoronika 25 Bible Online

2 Dzikoronika 25 - gitonga bible

2 Dzikoronika 25

¹Amaziya a diri ni tanga nya magumavili na livbandre myaga nya guvelegwe gwaye gikhati a phedego gufuma; uye fumide magumavili na livbandre na mina myaga Jerusalema; lina la mayi waye a di ranwa gupwani khu Jeyohadhani, givelegwa gya Jerusalema.

²Uye giride ugo gu gu gwadi mbeli ga PFHUMU Nungungulu, aholu kha nga dzi ningela khu monyo waye watshavbo.

³Gikhati a wonidego gukhuye mufumo waye wu tiyisidwe mandzani gwaye, a di songa sithumi si nga songago mufumeli, babe waye.

⁴ Aholu sanana sawe kha si songa, giride kha nga iso si lovidwego Nayo, umo nya Libhuku la Mosi, umo PFHUMU Nungungulu a nga ningela sileletelo sesi, khuye: “Vavelegi kha va na songwa khu kotani nya sighoho sa sanana sawe, ambari sanana niso, kha si na songwa khu kotani nya sighoho sa vavelegi. Muthu ni muthu a nafa khu gighoho gyaye.”

⁵Amaziya a di tombanisa va na Judha, a va vega mayelano khu dzinyumba dzawe; a va vega khu mitsawa, a vega vathangeli vakone nya likhumi mazana (1.000), ni vathangeli nya sikwata nya lizana (100), tigoni gwatshavbo ga Judha ni ga Bhejami; a di sayela avo va enedzidego magumavili myaga guya mbeli, va manega nari mazana mararu magumi mazana (300.000) vama va dzi kodzago gu dwana nyimbi, va phara matshari ni sitshangu.

⁶A di thola gambe, lizana magumi mazana (100.000) vama nya dzindrena dza tigoni ga Israyeli, a va hakhisa lizana (100) dzitaleta nya parata.

⁷Aholu a dita muthu nya gukari wa Nungungulu, a ta mu embela, khuye: “Mufumeli, u nga longoloki ni masotshwa ya Israyeli; kholu PFHUMU Nungungulu kha vhikeli va na Israyeli, a gu va na Efrayimi.

⁸Aholu wa gukhuwe va na gu tiyisa nyimbitunu, ambari nuri ni tshivba, PFHUMU Nungungulu a na gu diga u padwa khu nala wago; kholu Nungungulu a na ni tshivba nya gu gu phasedzele, ni gu gu thesa vbavbatshi.”

⁹Amaziya a di embela muthu wa Nungungulu, khuye: “Olu dzi na thuma ginani dzitaleta nya parata nyi ningedego masotshwa ya na Israyeli?” Muthu wa Nungungulu a di phindrula, khuye: “PFHUMU Nungungulu a naso nya singi nya gu gu ninge nya guvbindre isoso.”

¹⁰Khavbo avbo, Amaziya a di phaka masotshwa ma ngatago khu Efrayimi gasi ma hongola malangani yawe; aholu ayo ma di khondra khu likhulo, ma bwelela magaya gwawe, na ma gorogide ngudzu khu kotani ya na Judha.

¹¹ Amaziya a di tiya longo, a thangela vathu vaye, a di relela kovani nya munyu, avbo a ngaya sasela likhumi magumi mazana (10.000) va na Seyiri.

¹²Va na Judha va mode gambe likhumi mazana (1.000) vama na va nga gu vbanya, va va yisa gigomoni nya siwindri, va ya va reda va thega vaya pfarwa khu siwindri, vatshavbo havo bhi.

¹³Aholu tsawa nya vama nya masotshwa owu Amaziya a nga va bweledzago khu gumba vbweta gu hongola navo nyimbitunu, va diya sasela madhoropa ya na Judha, gukhugela Samariya kala Bheti-Horoni; va di sasela magumararu mazana (3.000) vathu ni gu phanga thomba nya yingi ngudzu.

¹⁴Avbo Amaziya a nga wuyago khiyo nya gusasele va na Edhomi, a di wuya ni sifananiso sa vanungungulu va Vaseyiri, a di si dzega a si gira vanungungulu vaye, a si khozela ni gu si vbisela libani.

¹⁵Khu guralo, PFHUMU Nungungulu, a di gorogela Amaziya, a mu rumela muprofeti guya mu embela, gukhuye: “Khu ginani u khozelago vanungungulu vava va nya mayigo va ngamba kodza guvbulugisa vathu vawe mandzani gwago?”

¹⁶Na nga gu ganela muprofeti, mufumeli a di khuye: “Gasi va gu vegide gu khala moyo nya vasingalagadzi va mufumeli, gani? Degula! Wa gu vbweta gu songedwa ginani avba?” Khavbo avbo, muprofeti a di degula, aholu a di mu embela, khuye: “Nyi ngu dziti gukheni Nungungulu a dzi emisede gu gu mbembisa, kholu u giridego esi, u bwelo khavbo u si yingisi gulaya gwangu.”

¹⁷Hwane nya gu bani na mane wumbe wusingalagadzi, Amaziya mufumeli wa Judha, a di rumela myango ga Jowasi, mwamana wa Jeyohakazi, mwamana wa Jewu, mufumeli wa Israyeli, a mu embela, khuye: “Delu hi ta wonana khovbe ni khovbe.”

¹⁸Aholu Jeyohakazi, mufumeli wa Israyeli, a di phindrula Amaziya, mufumeli wa Judha, khuye: Simbo nya muba wu guromo Libhanoni, wu rumede guya embela sedhari wu guromo iyoyo, khuwo: “Nyi ninge nyamahegyane wago a khala mwangadzi wa gyanana gyangu, aholu sirengo nya likhabi sa Libhanoni si di vbindra si gandra simbo nya muba.

¹⁹Gasi uwe wari, khuwe: Nyi sasede va na Edhomi, monyo wago wu tade khu matshandza nya gu dzi khusedze; olu khala gaya gwago; khu ginani u dzi vbwetelago mhango nya gu dzi mbembise gumogo ni va na Judha vatshavbo?”

²⁰Aholu Amaziya gima kha nga vbweta gu sipwa, kholu esi si di guta khiyo ga Nungungulu, gasi a mu ningela mandzani ga valala vaye, kholu a nga khozela vambe vanungungulu va va na Edhomi.

²¹Khu guralo, Jowasi, mufumeli wa Israyeli, Amaziya, mufumeli wa Judha, va diya manana khovbe ni khovbe dhoropani ga Bheti-Semesi, gu manegelago tigoni ga Judha.

²²Judha a di padwa khu Israyeli, va thava, muthu ni muthu a hongola gaya gwaye.

²³Khavbo avbo, Jowasi, mufumeli wa Israyeli, a di mola Amaziya, mufumeli wa Judha, mwamana wa Jowasi, mwamana wa Jeyohakazi, tigoni ga Bheti-Semesi; a mu dzega a mu yisa Jerusalema, aya khungumula libhiyo la Jerusalema, gukhugela vbamwanyatunu gwa Efrayimi kala mwanyatunu wa la mahegiso nya Ndzari, gulapha nya tanga nya mazana mana ni livbandre na mana magumi ni livbandre na mina (499) mikono.

²⁴A di phanga ndralama yatshavbo ni parata, ni sombo satshavbo va nga si manago Nyumbani ga PFHUMU Nungungulu iso si nga bani siri sa Obhedhi-Edhomi, ni thomba yatshavbo yi nga bani yiri nyumbani ga mufumeli, bwelo khavbo a mola ni vathu; a bwelela Samariya.

²⁵Amaziya, mwamana wa Jowasi, mufumeli wa Judha, vbanyide likhumi na livbandre myaga, hwane nya gufe ga Jowasi, mwamana wa Jeyohakazi, mufumeli wa Israyeli.

²⁶Gasi yimbe mithumo ya Amaziya, iyo nya guhegule niyo nya guhegise, yi lovidwe umo nya Libhuku nya Matimo la vafumeli va Judha ni va Israyeli.

²⁷Amaziya, hwane nya gu bani a digide gu landrisa PFHUMU Nungungulu, a di wugedwa va mu dwanisa dhoropani ga Jerusalema, a thava a hongola tigoni ga Lakisi; aholu, va di rumela gu a landrwe Lakisi, vaya mu songela iyoyo.

²⁸Girumbi gyaye, va di gi wuyisa khu dzikavalu, vata mu dzinga vbafuvbi ni vavelegi vaye Dhoropani ga Dhavhidhe.