Read gitonga 2 Dzikoronika 27 Bible Online

2 Dzikoronika 27 - gitonga bible

2 Dzikoronika 27

¹Jothamo a diri ni magumavili na livbandre myaga nya guvelegwe gikhati a nga phela gufuma, fumide likhumi na livbandre na moyo myaga Jerusalema. Lina la mayi waye a di ranwa gupwani Jerusa, nyamahegyane wa Sadhoki.

²Uye a diri muthu nya gululame mbeli ga PFHUMU Nungungulu, a di landrisa iso a nga girago babe waye Uziya, aholu uye kha nga bela Nyumbani ga PFHUMU Nungungulu. Ambari khu kharato, vathu va di simama gu thuma mithumo nya guvivbe.

³Khuye a vbahidego Mwanya wa Vbatshani wa Nyumbani ga PFHUMU Nungungulu, bwelo khavbo a gira gambe mithumo ya yingi nya Likhokhola la Ofeli.

⁴Vbahide gambe madhoropa ya musigomoni sa Judha, a vbaha gambe dzinyumba ni makhokhola magabini.

⁵A di dwanisana gambe ni mufumeli wa na Amoni a mu khozisa, khu mwaga yoyo, va na Amoni, va nga mu ningago lizana (100) dzitaleta nya parata, likhumi magumi mazana (10.000) dzindrengo nya mavbila ni likhumi mazana (1.000) dzindrengo nya mala; va na Amoni, va mu resede esi gambe khu mwaga nya wuvili ni mwaga nya wuraru.

⁶Khu guralo, Jothamo a di manega nari ni tshivba nya yikhongolo, kholu a nga bani a gu landrisa dzindzila dzatshavbo dza PFHUMU Nungungulu waye.

⁷Yimbe mithumo ya Jothamo, dzinyimbi a giridego, ni dzindzila a gimbidego khidzo, si lovidwe umo nya Libhuku nya matimo la vafumeli va Israyeli ni vafumeli va Judha.

⁸Gikhati a phedego gu fumela, a diri ni magumavili na livbandre myaga, fumide Jerusalema likhumi na livbandre na moyo myaga.

⁹Jothamo lade gumogo ni vavelegi vaye, va mu dzingide Dhoropani ga Dhavhidhe, wulangani gwaye, fumide mwanaye Akazi.