Read gitonga 2 Dzikoronika 30 Bible Online

2 Dzikoronika 30 - gitonga bible

2 Dzikoronika 30

¹Khu hwane nya ugo, Ezekhiya a di rumela myango tigoni gwatshavbo ga Israyeli ni ga Judha, a lovela gambe malangalila va na Efrayimi ni va na Manasi, gasi vate Jerusalema, Nyumbani ga PFHUMU Nungungulu, vata gira buzo nya Phasika ya PFHUMU Nungungulu wa Israyeli.

²Kholu mufumeli, hwane nya gu bani na mane milayo khu ga vakhongolo vaye ni ga tshangano watshavbo wa Jerusalema, gu di tiviswa gu girwa Phasika khu ngima nya wuvili.

³ Kholu, khu gikhati gyogyo, kha va nga kodza gu yi gira, khu kotani nya gu vaphasi nya mhamba nya vangi va di si dzi agisi, vathu nya vangi gambe va di si gu tshangani Jerusalema.

⁴Satshavbo sesi, si di wonega na si lulamide mahoni ga mufumeli ni mahoni ga vathu.

⁵Va di leletisa gukhavo gu tiviswe tigoni gwatshavbo gwa Israyeli, gukhugela Bherisebha, kala tigoni ga Dhani, gasi vate Jerusalema vata gira buzo nya Phasika ya PFHUMU Nungungulu wa Israyeli, kholu kha nga idzo gu lovidwego khidzo, nya vangi va di bani na va si gu wu giri kha nga idzo gu nga bani gu lovidwe khidzo.

⁶Khu guralo, myango yi di phalalega gumogo ni malangalila, ma nga lowago khu mufumeli ni manganagana yaye tigoni gwatshavbo ga Israyeli ni ga Judha, va tivisa kha nga guleletisa ga mufumeli a nga khuye: “Enu va na Israyeli, vbindrugedzani mavbanyelo mu wuye ga PFHUMU Nungungulu wa Abrahama, wa Isaki ni wa Israyeli; gasi a wuye ga enu mu vbulugidego khu mandzani ga vafumeli va Asiriya.

⁷Mu nga girini kha nga vababe vanu ni vandriyanu, va nga pfhurarela PFHUMU Nungungulu wa vababe vawe, kala va dzi ningela ga libango nya guthise kha nga mu si wonago.

⁸Mu nga bangisini myonyo yanu, kha nga idzo va giridego vababe vanu; pharani mandza ya PFHUMU Nungungulu, mu belani Nyumbani gwaye nya Guage, a yi agisedego kala gupindruga, mu thumela PFHUMU Nungungulu wanu, gasi a ndreyise vbakari gwanu guvila nya likhulo laye.

⁹Kholu mwa gu vbindrugedzani mu wuya ga PFHUMU Nungungulu, vandriyanu ni sanana sanu, va na tsetseledwa khavo va va modego, va va wuyisa ga litigo leli; kholu PFHUMU Nungungulu wanu, tade khu gisiro ni wuhindzi. Gima kha na thendregedza a mi sihela khovbe yaye, mwa gu vbindrugedzani mu wuya gwaye.

¹⁰Myango yi di phalalega khu lidhoropa ni lidhoropa, tigoni ga Efrayimi ni ga Manasi kala Zabhuloni; aholu va di va hega ni gu va tsoredzela.

¹¹Aholu vambe va na Aseri, va na Manasi ni va na Zabhuloni, va di dzi nogisa, vata Jerusalema.

¹²Mandza ya Nungungulu, ma diri gumogo ni vathu va Judha, va pwanana khu monyo moyo, gasi va gira sileletelo sa mufumeli ni sa manganagana yaye, mayelano ni magana ya PFHUMU Nungungulu.

¹³Gu di tombana dhoropani ga Jerusalema vathu nya vangi ngudzu gasi guta gira buzo nya Sibaba nyambana Mela, khu ngima nya wuvili. Wu diri tshangano nya wukhongolo ngudzu.

¹⁴Va di phela khu gu dusa siluvelo si nga bani si romo Jerusalema, va dusa gambe ni mikanvu yatshavbo nya guvbisedwe umo libani, vaya si dzudzuga kovani wa Kedhroni.

¹⁵Khu guralo, khu litshigu nya likhumi na mana nya ngima nya wuvili, va di paya ginvutana nya Phasika; vaphasi nya mhamba ni va na Levhi, va di khala dzitshoni va dzi agisa avo wurumba wawe, va resa miningelo nya guvbiswe Nyumbani ga PFHUMU Nungungulu.

¹⁶Va di khala malangani gwawe, kha nga giolovedzo gyawe mayelano ni Nayo wa Mosi, muthu wa Nungungulu; vaphasi nya mhamba, va di mitegedzela novba va nga bani va wu hakhide khu mandzani ga va na Levhi.

¹⁷Kholu vbatshanganotunu gu diromo vathu nya gutale avo va ngamba dzi agisa; khavbo avbo, va na Levhi va di rwegidwe thumo nya gusonge sinvutana nya Phasika, khu vatshavbo vale va ngamba aga gasi va dzi agisa ga PFHUMU Nungungulu.

¹⁸Kholu gidzemo nya gingi nya vathu nya gute khu tigoni ga Efrayimi, ga Manasi, ga Isakari ni ga Zabhuloni, gi hodzide ginvutana nya Phasika nyamba dzi agisa, va hambana nidzo gu lovidwego khidzo. Aholu Ezekhiya a di lombelela khu avo, khuye: “PFHUMU Nungungulu a gu wadi, a na pwele wuhindzi muthu watshavbo

¹⁹a dongisedego monyo waye, gu vbweta PFHUMU Nungungulu, Nungungulu wa vababe vawe; ambari na va sa agiswa mayelano ni fanelo ya Nyumbani nya Guage.”

²⁰PFHUMU Nungungulu a di yingisa nombelo wa Ezekhiya, a tsetselela vathu.

²¹Va na Israyeli, va nga bani na vari Jerusalema, va di gira khu gunengela Buzo nya Sibaba nyambana Mela, khu livbandre na mavili matshigu; va na Levhi gumogo ni vaphasi nya mhamba, khu litshigu ni litshigu, va di dhumisa PFHUMU Nungungulu, khu dzingoma va nga bani va dzi womba khu tshivba gasi gutsakela PFHUMU Nungungulu.

²²Ezekhiya a di ganela magana nya gutiyisela ga vatshavbo va na Levhi va nga bani na vari ni wugengeli nya gimbidzise gwadi thumo wa PFHUMU Nungungulu; va di hodza miningelo nya buzo ndrani nya livbandre na mavili matshigu, na va gu ningela miphaso nya gurule, va rungudza PFHUMU Nungungulu wa vababe vawe.

²³Vatshavbo va nga bani va tshanganide, va di pwanana gu engedzela gambe buzo khu livbandre na mavili matshigu. Va di gira gambe khu gutsaka.

²⁴Ezekhiya, mufumeli wa Judha, a di ningela ga gidzemo nya tshangano, likhumi mazana (1.000) dzimombe, ni livbandre na mavili magumi mazana (7000) dzinvuta; manganagana nayo ma di ningela ga tshangano, likhumi mazana (1.000) dzimombe, ni likhumi magumi mazana (10.000) dzinvuta; vaphasi nya mhamba khu wungi wawe va di dzi agisa.

²⁵Gu diri ni litsako nya gutale ga gidzemo nya vathu va na Judha, ga vaphasi nya mhamba, ga va na Levhi ni gidzemo gi ngatago khu tigoni ga Israyeli, gumogo gambe ni valuveli va ngata khu tigoni ga Israyeli ni avo va nga bani na va vbahide tigoni ga Judha.

²⁶Gu di manega gutsaka nya gukhongolo ngudzu dhoropani ga Jerusalema, kholu gukhugela matshiguni ya Solomoni, mwamana wa Dhavhidhe, mufumeli wa Israyeli, gima kha ga nga wonega khuwo nya nga wule dhoropani ga Jerusalema.

²⁷Khu guhegisa, vaphasi nya mhamba ni va na Levhi, va di khuga gasi gukategisa gidzemo nya vathu. Lito lawe li di yingiswa ni nombelo wawe wu di vboha kala ndzadzini, Wulangani nya Guage a khalago avbo Nungungulu.