Read gitonga 2 Dzikoronika 32 Bible Online

2 Dzikoronika 32 - gitonga bible

2 Dzikoronika 32

¹Hwane nya silo sesi ni gutumbega gogu, Senakerebhi, mufumeli wa Asiriya a di ta bela tigoni ga Judha, a randrela madhoropa nya makhokhola gasi gu ma wandra.

²Ezekhiya, na wonide nya gukhuye Senakerebhi a guta ni khovbe nya guvbwete gu dhumela Jerusalema,

³a di luga gikungo gumogo ni manganagana yaye ni vathangeli vaye nya dzinyimbi, nya guye futela milambo yatshavbo nya mati yi nga bani yi manega vbavbandze nya madhoropa; va di mu phasedza gu gira thumo yoyo.

⁴Gu di tombana vathu nya vangi ngudzu va ta futela milambo yatshavbo ni sitsongwana si nga bani si goga vbakari nya litigo, na va gukhavo: “Gasi, vafumeli va Asiriya, va gu vboha avba va siti mana mati nya mangi.”

⁵Ezekhiya a di tala khu tshivba, a di vbahedza likhokhola li nga bani li khungumugide, a khusedza makhokhola ma lapha, a vbaha limbe likhokhola khu vbavbandze, a tiyisa wulanga wu ranwago gupwa Milo, Dhoropani ga Dhavhidhe, a gira matshari ni sitshangu nya singi.

⁶A di emisa vathangeli nya nyimbi vbakari nya vathu, tandralani nya nyangwa nya lidhoropa, a ganela magana nya gutangadzise myonyo yawe, khuye:

⁷“Tiyani longo, mu nga vbeli tshivba khu kotani ya mufumeli wa Asiriya, ambari gu thava gidzemo gyatshavbo a gu nagyo, kholu avo hi gu navo ethu, vangi ngudzu guvbindra avo a gu navo uye.

⁸Uye libogo nya wuthu basi a gu nalo, aholu ethu, hi na ni PFHUMU Nungungulu wathu, gasi gu hi phasedzela ni gu hi dwanela dzinyimbini gwathu.” Khavbo avbo, vathu vatshavbo va di tangadziswa khu magana ya Ezekhiya, mufumeli wa Judha.

⁹Hwane nya satshavbo sesi, Senakerebhi, mufumeli wa Asiriya, na emide vbafuvbi ni lidhoropa la Lakisi, gumogo ni mabutho yaye yatshavbo, a di rumela sithumi saye Jerusalema ga Ezekhiya, mufumeli wa Judha, ni ga va na Judha vatshavbo va nga bani vari Jerusalema, a va embela, khuye:

¹⁰Senakerebhi, mufumeli wa Asiriya a ngu ganela, khuye: Ginani mu gi tumbago enu, mu khalago mulikhokholani la Jerusalema?

¹¹Ina Ezekhiya, khandri a gu mi kutsedzela gufa khu ndzala ni lidora, olu a gukhuye: PFHUMU Nungungulu wathu, a na hi vbulugisa mandzani ga mufumeli wa Asiriya, gani?

¹²Ina khandruye Ezekhiya wa moyo a fuvisidego malanga nya sigomo ni siluvelo saye, a ganela ga vathu va Judha ni ga vathu va Jerusalema, khuye: Mu na khozela ga giluvelo gimwegyo basi, mu vbisela avbo libani, gani?

¹³Kha mu sitini iso eni ni vababe vangu hi giridego ga vathu vatshavbo va mafuni momu, gani? Ina va kodzide vanungungulu nya mayigo yale gu vbulugisa mayigo yawe mandzani gwangu, gani?

¹⁴Khu wevbini nungungulu vbakari nya vanungungulu nya mayigo yaya ma khozisidwego khu vababe vangu, a dzi kodzidego guvbulugisa vathu vaye mandzani gwangu? Gasi enu mwa gu tumba gukhenu Nungungulu wanu a na mi vbulugisa mandzani gwangu?

¹⁵Khu guralo, mu nga kanganyiswi khu Ezekhiya, ambari gu mi kutsedzelani, ni gu mu khodwa gwaye; kholu mwalo nungungulu wa limbe litigo, ambari ni wevbini mufumo a kodzago gu vbulugisa vathu vaye mandzani gwangu, ambari ni mandzani ga vababe vangu; ina Nungungulu wanu, khuye a na dzi kodzago gu mi vbulugisa, gani?

¹⁶Sithumi saye niso si di ganela guvivba khu PFHUMU Nungungulu ni Ezekhiya, githumi gyaye.

¹⁷Senakerebhi a di lova gambe ni malangalila nya guvale PFHUMU Nungungulu wa Israyeli, a ganela, khuye: “Kha nga vanungungulu va nya mayigo va mafuni va ngamba kodza gu vbulugisa vathu vawe mandzani gwangu, khu kharato nugo Nungungulu wa Ezekhiya, kha na vbulugisa vathu vaye mandzani gwangu.”

¹⁸Va di gulumela khu lito nya gukhugege, khu lidimi nya Gijudha ga vathu va Jerusalema, va nga bani vari vbatshani nya likhokhola; gasi gu va thusedzela ni gu va thela hwanga va kodza gu wandra lidhoropa.

¹⁹Va di ganela khu Nungungulu wa Jerusalema, va mu fananisa ni vanungungulu va vathu va mafuni, nya gugirwe khu mandza nya vathu.

²⁰Aholu mufumeli Ezekhiya ni muprofeti Isaya, mwamana wa Amosi, va di lombelela khu mahungu yaya, va lomba giphaso gya ndzadzini.

²¹ Khavbo avbo, PFHUMU Nungungulu a di rumela ngilozi yi ta sasela vama vatshavbo nya dzindrena, manganagana, vathangeli, lizumboni la mufumeli wa Asiriya. Khavbo avbo, uye a di bwelela tigoni gwaye khovbe yaye na yi tade khu dzitshoni; avbo a nga bani na gu bela nyumbani ga vanungungulu vaye, sanana nya gudugele mahembeni gwaye, si di dzegela gu mu songa khu litshari vbamwanyatunu.

²²PFHUMU Nungungulu a di vbulugisa kharati Ezekhiya ni vavbanyi va Jerusalema, mandzani ga Senakerebhi, mufumeli wa Asiriya, ni mandzani ga valala vatshavbo, a va ninga gurula khu maphuvbo yatshavbo.

²³Nya vangi va di resa Jerusalema, miningelo nya gute luva PFHUMU Nungungulu, ni sombo nya lisima ngudzu ga Ezekhiya, mufumeli wa Judha, hwane nya esi, uye a di manega na khusegide ngudzu mbeli ga mayigo yatshavbo.

²⁴Khu matshigu yale, Ezekhiya a di dwala khu madwali nya makhongolo, a di lombelela ga PFHUMU Nungungulu, a mu hakha a mu ninga phindrulo khu giliwugiso.

²⁵Aholu Ezekhiya kha kodza gu bweledza wuwadi a giredwego khu PFHUMU Nungungulu, khu kotani nya gu dzi khusedze nya monyo waye. Khavbo avbo, gu dita likhulo nya likhongolo avbo gwaye, ga Judha ni vathu va Jerusalema.

²⁶Aholu, Ezekhiya, avbo a nga dzi nogisa khu kotani nya matshandza ya monyoni gwaye uye ni vavbanyi va Jerusalema, likhulo la PFHUMU Nungungulu li di bosa li siti gwawe khu matshiguni ya Ezekhiya.

²⁷Ezekhiya a di mana dzithomba nya gutale ni wudhumo nya wungi; va di gira dzibhakwa nya guvegedzele parata, ndralama, siwindri nya lisima, libani, sitshangu, ni simbe sombo nya lisima.

²⁸A di rumela guvbahwa dzinyumba nya guvegedzele umo mavbila, vbinyu ni mafura; a vbaha mavbandro nya gukhale sifuyo nya guhambanelane, ni mavbandro nya mitshambi.

²⁹Vbahide gambe madhoropa, a diri ni dzinvuta ni dzimombe nya gutale; kholu PFHUMU Nungungulu a di mu ningide dzithomba nya dzingi.

³⁰Khuye gambe Ezekhiya wa moyo, a nga sega khu vbatshani mati nya tsongo wa Giyoni a wu gimbidzisa khu vbavbatshi khu ndzila nya gululame, khu phuvbo ga Khugadambo nya Didhoropa la Dhavhidhe, a di dugelela ga mithumo yaye yatshavbo.

³¹ Aholu avbo vafumeli va Bhabhiloni, va nga mu rumela myango guta mu wudzisa khu sisamadziso si dugelelago tigoni ga Israyeli, Nungungulu a di mu diga gasi gu mu linga ni guti iso a si pimisago monyoni gwaye.

³²Yimbe mithumo ya Ezekhiya ni mithumo yaye nya wuhindzi yi lovidwe umo nya libhuku nya siwoniso sa muprofeti Isaya, mwamana wa Amosi, ni umo nya Libhuku nya matimo ya vafumeli va Judha ni va Israyeli.

³³Ezekhiya lade gumogo ni vavelegi vaye, va mu dzingide wulangani nya gukhugege, vbakari nya marowo ya sanana sa Dhavhidhe; vatshavbo va na Judha ni vavbanyi va Jerusalema, va di gira wuzundzo gufani gwaye; wulangani gwaye nya wufumu, a di tshikedzwa khu mwanaye Manasi.