Read gitonga 2 Dzikoronika 35 Bible Online

2 Dzikoronika 35 - gitonga bible

2 Dzikoronika 35

¹Khavbo avbo, Josiya a di gira buzo nya Phasika ya PFHUMU Nungungulu dhoropani ga Jerusalema. Va di songa nvutana nya Phasika khu litshigu nya likhumi na wu na nya ngima nya guhegule.

²A di emisa vaphasi nya mhamba malangani gwawe, a va tiyisa thumoni wa nyumbani ga Nungungulu.

³A di embela va na Levhi va nga bani va dzi ningede ga PFHUMU Nungungulu, thumoni nya guhevbudze vatshavbo va na Israyeli, khuye: “Vegani Ngasa nya Gidzumeledzwano nya guage nyumbani yi vbahidwego khu Solomoni, mwamana wa Dhavhidhe, mufumeli wa Israyeli. Gukhugela olu, kha mu na lemedwa gambe magatani gwanu khu rwalo yoyo. Olu khozelani PFHUMU Nungungulu wanu, ni gu thumela vathu vaye vatshavbo va Israyeli.

⁴ Dzi dongiseleni khu dzinyumba dza vababe vanu, ni mitsawa yanu, gukhedza khidzo mu lovedwego khidzo khu Dhavhidhe, mufumeli wa Israyeli, nidzo mu lovedwego khidzo khu mwanaye Solomoni.

⁵Khalani Nyumbani nya guage, khu mitsawa nya dzinyumba dza vababe vanu, vandriyanu, sanana sa tigoni; mu landrela mitsawa nya dzinyangwa dza na Levhi.

⁶Dzi agiseni mu paya nvutana nya Phasika, mu yi dongisela vandriyanu, mayelano ni magana ya PFHUMU Nungungulu, hi ningidwego khu mandzani ga Mosi.

⁷Josiya, a di ningela ga sanana sa tigoni, dzinvuta ni dziphongo dza mitshambini gwaye, dzatshavbo gasi gu gira dzimhamba nya Phasika, khu tengo nya magumararu magumi mazana (30.000), khu vatshavbo va nga bani vari vbale, ni dzimombe nya tengo nya magumararu mazana (3.000); esi si di dugela phandroni ga mufumeli.

⁸Manganagana yaye nayo ma di dusa miningelo ma ningela vathu ni vaphasi nya mhamba ni va na Levhi. Hilikiya, Zakariya ni Jeyeli, manganagana ya Nyumbani ga Nungungulu, va di ningela magumavili na livbandre na limwedo mazana (2.600) dzinvuta ni dziphongo ni mazana mararu (300) dzimombe ga vaphasi nya mhamba, gasi gu gira khidzo miphaselo nya Phasika.

⁹Konaniya, Semaya, Nataniyeli, vandriyaye, gumogo gambe ni Hasabhiya, Jeyeli ni Jozabhadhi vathangeli va na Levhi, va di ningela ga va na Levhi livbandre magumi mazana (5.000) dzinvuta ni dziphongo ni livbandre mazana (500) dzimombe, gasi gu gira phaselo nya Phasika.

¹⁰Wu di dongisedwa kharati thumo; vaphasi nya mhamba va di ema malangani gwawe, va na Levhi navo khu mitsawa yawe, mayelano ni edzi a leletedego khidzo mufumeli.

¹¹Khavbo avbo, va di paya nvutana nya Phasika; vaphasi nya mhamba na va gu mitegedzela novba va wu hakhago khu mandzani ga va na Levhi, gasi avo na va gu sundruwulela malowo.

¹²Miningelo nya guvbiswe va di yi vega phuvbo, gasi va yi ningela khu mitsawa nya dzinyumba, mayelano ni magimbilelo nya dzinyumba dzawe nya mavelego, gasi va ningela ga PFHUMU Nungungulu, kha nga idzo gu lovidwego khidzo Libhukuni la Mosi; va gira gambe kharato ni dzimombe.

¹³ Va di vawula nyama nya Phasika niloni, mayelano ni sileletelo; miningelo nya guage, va di yi phula mudzikhalini, umo nya mabhota ni umo nya matindzalo; va di vbiredzela gu yi kabanisela vathu vatshavbo.

¹⁴Khu hwane, va di dongisela iso si nga bani si gu vbwetega gwawe ni ga vaphasi nya mhamba, kholu vaphasi nya mhamba, nya sanana sa Aroni, va di dzi ningela gu thuma kala ni wutshigu thumoni nya miphaso nya guvbiswe, niyo nya mafura; khu guralo, va na Levhi va di dongisela nyama yawe ni ya vaphasi nya mhamba va na Aroni.

¹⁵ Va na Asafe, va nga bani vari vaembeleli, va di emide malangani gwawe, mayelano ni guruma ga Dhavhidhe, ni Asafe, Hemani ni Jedhutumi, mutuguli nya siwoniso sa mufumeli, gumogo gambe ni vasayisi nya dzinyangwa gukhedza khu nyangwa ni nyangwa, kha ga vbwetega gu, muthu a hambana ni thumo waye; kholu vandriyawe va na Levhi, va di gu va dongisela iso si nga bani si vbwetega vbakari gwawe.

¹⁶Khu litshigu lile, wu di tiyiswa kharati thumo watshavbo wa PFHUMU Nungungulu nya buzo nya Phasika, ni gu songa sirengo nya miphaselo nya guvbiswe vbagiluvelotunu ga PFHUMU Nungungulu, mayelano ni guruma ga mufumeli Josiya.

¹⁷ Va na Israyeli, va nga bani vari vbale, va di gira buzo nya Phasika khu gikhati gile, va gira buzo nya sibaba nyambana mela, va vbedza livbandre na mavili matshigu.

¹⁸Gukhugela matshiguni ya muprofeti Samuweli, gima kha ya nga girwa gambe Phasika nya gufanane ni iyoyo; ambari ni vbakari ga vafumeli vatshavbo va na Israyeli, mwalo ni mumbe mufumeli a giridego yimbe Phasika nya gufanane ni eyi yi giridwego khu Josiya, ni vaphasi nya mhamba, va na Levhi gumogo ni va na Judha, ni vatshavbo va na Israyeli, avo va nga bani va romo, gumogo ni vathu va Jerusalema.

¹⁹Phasika yeyi, yi giridwe khu mwaga nya likhumi na livbandre na miraru nya gufume ga Josiya.

²⁰Khu hwane nya satshavbo sesi, avbo Josiya a nga bani na lulamisede Nyumba ya PFHUMU Nungungulu, Neko, mufumeli wa Egipito, a di gwela gasi guta dwanisa Karikemisi, vbafuvbi ni tsongo wa Ewufrate nari ni gikwata nya gikhongolo nya masotshwa. Josiya a di mu khinga.

²¹Khavbo avbo, Neko a di rumela myango gasi guya mu embela, khuye: “Eni nyi mwalo gilo nago uwe mufumeli wa Judha! Muhuno kha nyi teli guta dwana nago uwe, aholu nya gu tela guta dwana ni mufumo wowu wu nyi dwanisago. Nungungulu a nyi embede khuye vbiredza. Dzi vegedze u nga dwani ni Nungungulu a gu ni eni, kholu uye a nga gu thesa u padwa.”

²²Aholu Josiya kha nga thendregedza a bwelela; gima kha nga yingisa magana ya Neko, ayo ma nga bani ma duga khu kanani ga Nungungulu, a di ta dwana naye kovani wa Megidho.

²³Vaphari nya matshari va di hekha khu sighalala Josiya mufumuli, mufumeli a di embela masotshwa yaye, khuye: “Nyi duseni avba, kholu nyi bayisidwe ngudzu.”

²⁴Khu guralo sithumi saye, si di mu dusa khu karetani a nga bani a romo umo, va mu thela ga yimbe va nga bani vari nayo, va mu bweledza Jerusalema, a difa va mu dzinga thowoni ga vavelegi vaye, va na Judha ni vathu vatshavbo Jerusalema va di gira gililo khu Josiya.

²⁵Jeremiya a di emba ndzimo nya gulile Josiya. Vatshavbo vaembeleli nya vama ni vanyamayi, gililoni gwawe, va di ganela khu Josiya, va nga gu simama gu embelela ndzimo yoyo kala na muhuno; owu wu khade nari nayo tigoni ga na Israyeli. Dzindzimo dzedzi nya gililo dzi lovidwe umo nya Libhuku nya gililo.

²⁶Gasi yimbe mithumo ya Josiya niso a giridego mayelano khu wukhozeli waye kha nga idzo gu lovidwego khidzo umo nya Nayo wa PFHUMU Nungungulu,

²⁷ni mithumo yaye nya guhegule niyo nya guhegise, si lovidwe umo nya Libhuku nya Matimo ya Vafumeli va Israyeli ni va Judha.