Read gitonga 2 Dzikoronika 4 Bible Online

2 Dzikoronika 4 - gitonga bible

2 Dzikoronika 4

¹Mufumeli Solomoni a di gira gambe giluvelo nya sugu, gulapha gwa igyo gu diri ni magumavili mikono; guanama, magumavili mikono, ni likhumi mikono gukhugega guya vbatshani.

²A di gira gambe ni yiphwa nya sugu, dzuwulugo watshavbo kala mahegiso na yiri ni likhumi mikono. Gukhugega guya vbatshani yi diri ni livbandre mikono. Sifi nya magumararu mikono wu diri pimo nya dzuwulugo waye watshavbo.

³Khu vbavbatshi nya dzuwulgu khu wubambe, gu diri ni sifananiso nya dzimombe nya gugirwe khu sugu, likhumi sifananiso avbo nya kono ni kono; na si giridwe khu ndzarara mbili si yingana.

⁴Dzuwulugo yoyu nya yiphwa wu di wonega kha nga mbiya nya yikhongolo yi handzegidwego vbatshani nya likhumi na dzimbili dzimombe nya vamatune; dzitharu dzi di khedza Wuronga, dzitharu Pfoladambo, dzitharu Marandzi, dzitharu Khugadambo; yiphwa yi di handzegwa khu vbatshani gakone, migila yi khala ndrani.

⁵Wuziva waye wu di fanana ni gyandza nya muthu; ni likana laye li di fanana ni khokho yi mburisedwego kha nga genge nya likhomwa, ndrani gwaye gu diya magumararu magumi mazana (30.000) miphongolo.

⁶A di gira gambe likhumi sinamelo; livbandre nya iso a di si vega khu nyamudye, simbe livbandre khu nyambade, gasi gu handzela umo sombo satshavbo nya miphaso nya guvbiswe. Yiphwa yi di khala wuhambelo nya vaphasi nya mhamba.

⁷ A di gira gambe likhumi sidzigaredzo nya dzikandriya nya ndralama, kha nga idzo gu rumidwego khidzo a si vega Nyumbani ga Nungungulu, livbandre nya iso a di dzi vega khu nyamudye, ni simbe livbandre nya iso khu phuvbo ga nyambadye.

⁸ A di gira likhumi dzimeza a dzi vega Nyumbani ga Nungungulu; livbandre nya idzo khu phuvbo ga nyamudye, ni dzimbe livbandre khu phuvbo ga nyambade. A gira gambe lizana dzimbiya nya ndralama.

⁹A di gira gambe likupakupa nya vaphasi nya mhamba ni likupakupa nya likhongolo, gumogo ni malimba yakone a ma londra khu sugu.

¹⁰Ni yiphwa a di yi vega khu nyamudye ga Khugadambo, yi khedza Marandzi.

¹¹Khu hwane, Hiramo a di gira dzikhali, mafosola ni sinamelo. Khu kharati, Hiramo a di vbedza thumo a nga girelago mufumeli Solomoni ni wa Nyumbani ga Nungungulu, a gu esi:

¹²Madingo mavili, ni sihugu sakone, ni mihungo ya mivili yi nga bani yiri vbatshani nya madingo ya mavili; ni siniya sivili nya gulugwe gasi gu fenengedza khiso mihungo nya madingo;

¹³mazana mana (400) nya maroma gasi gu ma thumisa umo nya siniya soso sa sivili nya gulugwe, giniya ni giniya gi diri ni ndzarara mbili gasi gu fenengedza mihungo yeyi yi guromo vbatshani nya madingo.

¹⁴A di gira gambe sirandro a vega sinamelo vbatshani gakone,

¹⁵a gira yiphwa ni dzimombe dzile nya likhumi na dzimbili khu vbavbatshi.

¹⁶Dzikhali nidzo, mafosola, dzihalo ni satshavbo sombo nya sugu si giridwego khu Hiramo-Abhi a girela mufumeli Solomoni, gasi gu thumela Nyumbani ga Nungungulu, a di si gira khu sugu nya guhutwe.

¹⁷Mufumeli a di rumela guya wumbwa khu mafu nya libumba li manegago kovani wa Joridhani, vbakari ga Sokoti ni Zereda.

¹⁸Solomoni a di gira sombo satshavbo sesi khu talo nya iso, nyamba tidwa tengo nya gulemele nya sugu wakone.

¹⁹Solomoni a di gira gambe satshavbo sombo nya gulumbe Wulanga nya Guage Ngudzu wa Nungungulu, a gu esi: Giluvelo nya ndralama ni dzimeza, umo si nga bani si khala umo sibaba nya miphaso;

²⁰dzikandriya ni myenge yaye nya ndralama nya guhutwe gasi dzi khondriswa kha nga giolovedzo, vbawulangatunu nya Guage Ngudzu.

²¹Senge, dzikandriya, ni myenge si diri sa ndralama nya guhutwe ni wumburi,

²²kha nga gambe dzigarifi, sinamelo, simbiyana ni sivbiselo nya libani, si diri sa ndralama nya guhutwe. Malimba ya ndrani ya nyumbani ga Nungungulu, ni malimba nya Wulanga nya Guage Ngudzu, yatshavbo ma giridwe nayo khu ndralama nya guhutwe.