Read gitonga 2 Dzikoronika 6 Bible Online

2 Dzikoronika 6 - gitonga bible

2 Dzikoronika 6

¹Khavbo avbo, Solomoni a di lombelela, khuye: “Uwe PFHUMU Nungungulu u ganede khuwe u na khala mugidemani nya lipfhi!

²Gasi eni nyi gu vbahede nyumba yi na khalago nyumba Yago kala gupindruga.”

³Khavbo avbo, mufumeli a di thendregedza khovbe yaye a kategisa tshangano watshavbo wa na Israyeli wu nga bani wu emide.

⁴ A ganela, khuye: “A na bongwe PFHUMU Nungungulu wa Israyeli, a ganedego abune ga babe wangu, Dhavhidhe, khu tshivba yaye a tadziside gitumbiso a giridego, khuye:”

⁵Gukhugela litshigu nyi dusidego vathu vangu khu tigoni ga Egipito, li mwalo lidhoropa nyi li hathidego ga mahundzu ya Israyeli, gasi nyi vbaha umo nyumba nya gukhale umo Lina Langu, gambe kha nya hatha muthu gasi a khala muthangeli nya vathu vangu, va na Israyeli.

⁶Aholu nyi hathide Jerusalema, gasi Lina Langu li kodza gu khozedwa umo, ni gu emisa Dhavhidhe, gasi a khala mufumeli wa vathu vangu va na Israyeli.

⁷Uye gambe babe wangu Dhavhidhe, a suvide khu monyoni gwaye guvbaha nyumba yi lumbago Lina la PFHUMU Nungungulu wa na Israyeli.

⁸Aholu PFHUMU Nungungulu a di mu embela, khuye: Kha nga olu u suvidego guvbaha nyumba yi lumbago Lina langu, u pimiside gwadi monyoni gwago.

⁹ Aholu, khandruwe u na nyi vbahelago nyumba, gyanana gyago gi na dugago khu mahembeni gwago, khigyo gi na gu nyi vbahelago nyumba yi lumbago Lina Langu.

¹⁰Khu guralo, PFHUMU Nungungulu tadziside magana a ganedego. Nyi tshikhedzide babe wangu Dhavhidhe, nyi khala vbagikhalotunu gwaye nya wufumu wa na Israyeli, kha nga a ganedego PFHUMU Nungungulu, nyi vbahide nyumba yeyi, yi lumbago Lina la PFHUMU Nungungulu wa na Israyeli.

¹¹Uomo nyi vegide Ngasa yi gu ni siwindri si lovidwego gidzumeledzwano egi PFHUMU Nungungulu a giridego ni va na Israyeli.

¹²Solomoni a di ema mbeli nya giluvelo gya PFHUMU Nungungulu, na gu wonwa khu tshangano watshavbo wa na Israyeli, a di khusedza mandza.

¹³Kholu Solomoni a di giride wulanga nya gueme khavbo khu sugu, vbakari nya hudzwe. Gulapha nya wulanga wowo gu di enedza tanga nya livbandre mikono gulapha, ni gu gula gu enedza livbandre mikono, gukhugega gu di enedza mikono miraru, a bela umo a ema vbakari, a khidzima vbakari nya tshangano watshavbo wa na Israyeli, a khusedza mandza a khedza ndzadzini,

¹⁴a ganela, khuye: “PFHUMU Nungungulu wa Israyeli, mwalo Nungungulu a fananago ni Uwe ndzadzini ni mafuni, Uwe U sayisago gidzumeledzwano gyago, ni gu girela wuhindzi sithumi sago, avo vatago mbeli gwago, khu myonyo yawe yatshavbo;

¹⁵u sayiside iso U si tumbisidego ga babe wangu, githumi gyago Dhavhidhe, U ganede Uwe wabune, muhuno U si tadzisa khu gyandza gyago.

¹⁶ Gasi olu, Uwe PFHUMU Nungungulu wa Israyeli, gira iso U si ganedego ga githumi gyago, babe wangu Dhavhidhe, U nga mu tumbisa gukhuwe: Gima ni litshigu limwedo kha gu na hamugega mbeli gwangu muthu a na khalago vbagikhalotunu nya wufumu wa na Israyeli, sanana sago sa gu sayisa dzindzila dzawe, va landrisa Milayo mbeli gwangu, kha nga idzo u gimbidego khidzo uwe.

¹⁷Gasi, olu gambe, PFHUMU Nungungulu wa Israyeli, tadzisa gambe magana yago U ma ganedego ga githumi gyago Dhavhidhe.

¹⁸ Ina kamwe Nungungulu, a ngu kodza guvbanya ni vathu mafuni momu, gani? Nga khedza ndzadzini ni gupindruga ga dzindzadzi gu si gu eneligo, ginani ginyumbana gegi nyi gu vbahedego?

¹⁹Ambari khu guralo, Uwe PFHUMU Nungungulu wangu, hakha nombelo wa githumi gyago, gasi U yingisa huwa ni nombelo gi gu girelago.

²⁰ Wutshigu ni mihani, maho yago ma na wone wulanga wowu, U ganedego khuwe, U na vega avbo lina lago, gasi U yingisa nombelo wa githumi gyago gi gu girelago.

²¹Gasi olu, yingisa nombelo wa githumi gyago ni wa vathu vago va na Israyeli, va guta va ta gu girela ga wulanga wowu; khu wulanga wago U khalago avbo ndzadzini yoyo, va yingise, U bwelo khavbo U va tsetselela.

²²Muthu a gu ghohela ndriyaye, aholu va mu sambanyisa vbagighohotunu gwaye. A guta a ta sambanya mbeli nya giluvelo gyago nyumbani momu;

²³Uwe, nuri khu ndzadzini yoyo, mu yingise U gira ni gu lamula sithumi sago; U yeyedza oyu a gu ni nandru, mu bweledzele mithumo yaye yi thegela hungoni gwaye; oyu a lulamidego a na mane gutsaka, U mu bweledzela khu gululama gwaye.

²⁴Vathu vago va na Israyeli, va gu padwa khu valala vawe, khu gu bani va gu ghohede, avo va gu vbindrugedza mavbanyelo, va wuya avbo gwago, va ta dhumisa lina lago, va gira milombelo, va lomba avbo gwago nyumbani momu,

²⁵Uwe khu ndzadzini yoyo, va yingise ni gu tsetselela gighoho gya vathu vago, va na Israyeli, U bwelo khavbo U va wuyisa ga litigo leli U ningidego avo gumogo ni vababe vawe.

²⁶Ndzadzini gwa gu segega, gu siwi ndzadzi, khu gu bani va gu ghohede, va guta ga wulanga wowu, va ta lombelela, va lomba khu lina lago, va diga sighoho sawe iso U nga va tsayisa khiso,

²⁷Uwe khu ndzadzini yoyo, va yingise ni gu tsetselela gighoho u giredwego khu sithumi sago ni vathu vago va na Israyeli, U va hevbudza ndzila nya yadi nya gugimbile khiyo, U wisa ndzadzi tigoni gwago U ningidego vathu vago gu khala thomba yawe.

²⁸Mafuni ya gu manega ndzala, gu manega mitungu, gihala ni guhina nya dzimbewu, mbasa nya guhambanelane, ni gu valala va sasela vathu vago dzindrangani gwawe, ni gu mana mitungu ni madwali nya guhambanelane,

²⁹milombelo yatshavbo ya muthu ni muthu, mwendro ya vathu vatshavbo va na Israyeli, va gu lombago khu sighoho sawe ni gulila gwawe, va khusedza mandza nyumbani momu,

³⁰khu guralo, Uwe nuri khu ndzadzini yoyo, wulangani gwago U khalago avbo, va tsetselele U ninga muthu ni muthu mayelano khu dzindzila dzaye, kholu khuwe basi utigo myonyo ya sanana nya vathu,

³¹gasi va kodza gu Gu ninga githawo, va gimbila khu dzindzila dzago, matshigu yatshavbo nya guvbanye ga litigo U ningidego vababe vathu.

³²Muluveli nuye a si lumbigo vathu vago va na Israyeli, aholu na guta khu mambe mayigo ya hwindzo, na gu kutswa khu lihaladzo nya lina lago nya likhongolo, ni libogo lago thawulugidego, a gu lomba a khedza nyumbani momu,

³³khu guralo, Uwe nuri khu wulangani gwago U khalago avbo, ndzadzini yoyo, yingisa, U gira satshavbo esi va nya mayigo va si lombago avbo gwago, gasi mafumbu yatshavbo ya mafuni mati lina lago ni gu Gu ninga githawo, kha nga vathu vago va na Israyeli; va dziti nya gukhavo khu lina lago nya tshivba, vathu vatshavbo va ngu ranwa nyumbani momu nyi gu vbahedego.

³⁴Vathu vago va gu soma matshari, vaya nyimbitunu guya dwana ni nala wawe, khu ndzila U na va rumela khiyo, avo, va gu lombelela na va khedzide dhoropani momu U li hathidego, ni nyumba yeyi nyi gu vbahedego yi lumba lina lago,

³⁵Uwe, va yingise, nuri khu ndzadzini yoyo, U hakha nombelo ni gulila gwawe ni gu gira fanelo yawe.

³⁶Va gu Gu ghohela (kha nga a gu mwalo muthu nyamba ghoha), Uwe U va gorogela, U va ningela mandzani ga valala vawe, gasi va va vbagela vaya khala dzikhumbi tigoni nya gukari, nari hwindzo mwendro vbafuvbi;

³⁷tigoni va na vbagedwago vaya umo vaya khala kha nga dzikhumbi, va guya vbindrugedza va thega migondroni gwago; va guya ema khu tigoni mule va vbagedwego umo, va lombelela va ganela, khavo: Hi gu ghohede, hi giride ogu guvivbidego ngudzu,

³⁸va gu vbindrugedza va wuya avbo gwago khu monyo wawe ni hefemulo wawe watshavbo, na vari khu tigoni momo nya wugumbi wawe, va gu lombelela na va khedzide phuvbo ga litigo leli U ningidego vababe vawe, ni lidhoropa leli U li hathidego ni phuvbo ga nyumba yeyi, nyi yi vbahidego yi lumba lina lago.

³⁹Uwe nuri khu ndzadzini yoyo, wulangani U khalago avbo, yingisa milombelo yawe, U gira fanelo yawe, U tsetselela vathu vago va gu ghohedego.

⁴⁰Gasi olu, Uwe, Nungungulu wangu, maho yago ma na tulege, dzindzeve dzago dzi yingisa, nombelo yoyu nyi girago wulanga wowu!

⁴¹Khu guralo, uwe PFHUMU Nungungulu, khuga U ta khala wulanga wago nya guhefemule, uwe gumogo ni Ngasa nya tshivba yago; PFHUMU Nungungulu, vaphasi vago va na fenengedzwe khu guvbanyisa gwago, ni sihathwa sago si na nengele khu wuwadi.

⁴²Oh! PFHUMU Nungungulu, U nga pfhurareli muthu wago U mu todzidego khu mafura; dundruga wuhindzi U giredego githumi gyago Dhavhidhe.”