Read gitonga 2 Dzikoronika 8 Bible Online

2 Dzikoronika 8 - gitonga bible

2 Dzikoronika 8

¹Hwane nya magumavili myaga, Solomoni a di vbedza guvbaha Nyumba ya PFHUMU Nungungulu gumogo ni nyumba yaye nya wufumu;

²a di vbahedza gambe madhoropa a nga ningwago khu Hiramo, va khala umo va na Israyeli.

³Khu hwane nya ugo, Solomoni a diya dhumela lidhoropa la Hamati wa Zobha, a li wandra.

⁴A di vbaha gambe lidhoropa la Tadimori mugiwulani, ni yatshavbo madhoropa ya gipandre gya Hamati gasi gu vegedzela umo thomba ya tigoni.

⁵Vbahedzide gambe Bheti-Horoni wa nyakhogwe ni Bheti-Horoni wa khogani, madhoropa ma bhiyidwego khu makhokhola ni malimba, ma gu ni sikwinyaro nya dzisimbi,

⁶gumogo ni Bhahalati, ni yatshavbo madhoropa nya guvegedzele dzithomba a nga bani nari nadzo Solomoni, ni madhoropa nya gukhale dzikareta nya nyimbi, ni ayo nya gukhale vakhileli nya dzikavalu, ni satshavbo iso a nga si vbahago khu gugola gwaye, Solomoni a si vbahide Jerusalema, Libhanoni ni tigoni gwatshavbo gu nga bani gu fumwa khuye.

⁷Gasi vathu vatshavbo va nga bani va tshade tigoni, avo nya Vahiti, Vaamori, Vaferezi, Vahevhi ni Vajebhusi, va nga bani va si lumbi va na Israyeli,

⁸situgulwana sawe si nga tshalago tigoni hwane gwawe, avo va nga vbuluga gumbembiswa khu va na Israyeli, ava, Solomoni a di va rwega mithumo nya gulemele kala na muhuno.

⁹Aholu, ga va na Israyeli, mwalo ni moyo a giridwego khumbi khu Solomoni; avo basi thumo wawe wu diri nya wusotshwa nya gudwane nyimbi, vathangeli nya dzinyimbi, vathangeli nya dzikareta nya nyimbi, ni vakhileli nya dzikavalu.

¹⁰Tengo nya vathangeli nya vakhongolo va nga emiswago khu mufumeli Solomoni gasi gu sayisa vathu, wu diri mazana mavili ni livbandre magumi (250).

¹¹Solomoni a di dusa mwangadzi waye, nyamayi Faro, khu Dhoropani ga Dhavhidhe, a mu yisa ga nyumba a nga bani a mu vbahede; kholu a di ganela, khuye: “Mwangadzi wangu kha dzi kodzi gu khala Dhoropani ga Dhavhidhe, mufumeli wa Israyeli, kholu malanga yaya, malanga nya guage, umo gu bedego Ngasa nya Gidzumeledzwano ya PFHUMU Nungungulu.”

¹²Khavbo avbo, Solomoni a di ningela ga PFHUMU Nungungulu miphaselo nya guvbiswe vbagiluvelotunu, a gi vbahidego nyangwani nya Nyumba ya Nungungulu.

¹³ A ningela miphaso nya litshigu ni litshigu kha nga idzo Mosi a leletedego khidzo: Miphaso nya Dzisabhadho, nya mibuzo nya Gumege Ngima, nya Mibuzo yi emisidwego guraru khu mwaga, nya Sibaba nyambana Mela, mibuzo nya Dzisemana ni Mibuzo nya Mitshatsha.

¹⁴Kha nga gu landrisa nayo wa babe waye Dhavhidhe, a di emisa mitsawa nya vaphasi nya mhamba mayelano khu mathumelo yawe, gumogo gambe ni ya na Levhi, mayelano khu mithumo yawe nya guembelele, va dhumisa Nungungulu ni gu phasedzela vaphasi nya mhamba, gukhedza khu fanelo ya moyo ni moyo. A emisa gambe ni vaemeledzi nya dzinyangwa, khu nyangwa ni nyangwa mayelano ni giyemo gyawe. Kholu uyoyo, khuye a nga bani nari nayo wa mufumeli Dhavhidhe, muthu wa Nungungulu.

¹⁵Vaphasi nya mhamba ni va na Levhi, gima kha va hambana ni sileletelo sa mufumeli ni ga gevbini gilo, ambari khumo nya dzithomba.

¹⁶Khu guralo, wu di vbela kharati thumo watshavbo wa Solomoni, gukhugela litshigu gu kembidwego giseketelo nya Nyumba ya PFHUMU Nungungulu, kala litshigu yi vbeledego muphelo.

¹⁷Khavbo avbo, Solomoni a di hongola Eziyoni-Gebheri ni Elati, funguni wa phwani, tigoni ga Edhomi.

¹⁸Hiramo a di mu rumela mataro ni va gimbidzisi vakone va vidzidwego gwadi, va reswa khu sithumi saye, va hongola Hofiri gumogo ni sithumi sa Solomoni, vaya dzega mazana mana ni livbandre magumi (450) dzitaleta nya ndralama, va dzi resa ga mufumeli Solomoni.