Read gitonga 2 Dzikoronika 9 Bible Online

2 Dzikoronika 9 - gitonga bible

2 Dzikoronika 9

¹Na yi pwide ndruma ya Solomoni, pfhumugadzi ya Sabha, yi dita Jerusalema yita mu linga khu siwudziso nya gulemele, na yi gu vbwelegedzwa khu vathu nya gutale, ni dzingameriya dzi rwadego mafura nya gunungele, ndralama nya gutale ni siwindri nya gukhedzige nya lisima, yi ta naso ga Solomoni ta mu embeledzela satshavbo yi nga bani yiri naso monyoni gwaye.

²Solomoni a di phindrula siwudziso satshavbo a nga wudziswago khu pfhumugadzi, nyamba manega ni gimwegyo nya gugaradze a nga tandrega gu mu ninga phindrulo.

³Pfhumugadzi ya Sabha, na yi wonide guti gwa Solomoni, ni nyumba a nga vbahago,

⁴guhodza gwa vbamezatunu gwaye, wulanga gu khalago manganagana yaye, mathumelo nya sithumi saye ni maambalelo ya iso, avo va sayisago sikombe a selago khiso ni maambalelo yawe, ni miphaselo nya guvbiswe a ningelago nyumbani ga PFHUMU Nungungulu, a di samala a vbela mapimo.

⁵Khavbo avbo, a di embela mufumeli, khuye: “Lisine kamwe mahungu nyi ma pwidego khu tigoni gwangu, khu kotani nya sigiro sago ni guti gwago.

⁶Nyi di si khodwi khiso va nga bani va nyi embela kala olu nyi ngata si wona khu maho yangu. Avo gima kha va nga nyi embela khu vbadugwana nya wugengeli wago, aholu uwe u ngu vbindra satshavbo nyi si pwidego.

⁷Va kategide vathu vago! Si kategide sithumi sago! Gikhati gyatshavbo si guromo vbafuvbi gwago, va yingela guti gwago!

⁸A na bongwe PFHUMU Nungungulu wago, a tsakisidwego khuwe gasi gu gu emisa kha nga mufumeli vbagikhalotunu gwaye, u thumela PFHUMU Nungungulu wago! Kholu a na ni lihaladzo ni vathu vaye va na Israyeli, gasi a va tiyisa gikhati gyatshavbo; a gu vegide kha nga mufumeli wawe, gasi u fela gu lamula mahungu khu gululama.”

⁹ A di ningela ga mufumeli, lizana ni magumavili (120) dzitaleta nya ndralama, ni mafura nya gunungele nya mangi ngudzu, ni siwindri nya gukhedzige nya lisima. Gima gu di si guti sihiwa nya gutale nya mafura nya gunungele, kha nga aya ma nga ningwago Solomoni khu Pfhumugadzi ya Sabha.

¹⁰Sithumi sa Hiramo ni sa Solomoni, avo va residego ndralama khu tigoni ga Hofiri, va di resa gambe mapulango nya bandrwa, ni siwindri nya gukhedzige.

¹¹Khu mapulango yaya nya bandrwa, mufumeli a di gira khayo misimbo nya gutshavedwe ya nyumbani ga PFHUMU Nungungulu ni ya nyumbani nya wufumu, gumogo ni gu gira dzimbila ni sitendre sa vaembeleli, gima kha ga nga wonwa gambe tigoni gwa Judha, mapulango nya wumburi nya nga aya.

¹²Mufumeli Solomoni a di ningela ga pfhumugadzi ya Sabha, satshavbo iso yi nga si suva ni gu mu lomba, vbavbandze nya sihiwa a mu ningidego nya guningane nesi a dzudego naso. Khu guralo, uye a di bwelela tigoni gwaye gumogo ni sithumi saye.

¹³Gulemela nya ndralama a nga bani na gu resedwa Solomoni khu mwaga ni mwaga, yi di enedza livbandre na limwedo mazana ni livbandre na limwedo magumi ni livbandre na mweyo (666) dzitaleta,

¹⁴gu diga eyi yi nga bani yi bela khu varengi ni varengisi; vafumeli va Arabhiya, gumogo ni manganagana ya tigoni mule, avo navo va di gu resa ga Solomoni, ndralama ni parata.

¹⁵Mufumeli Solomoni a di gira mazana mavili (200) sitshangu nya sikhongolo nya ndralama nya gubethwe; gitshangu ni gitshangu gi di dzega livbandre na limwedo mazana (600) dzisekeli nya ndralama.

¹⁶A di gira mazana mararu (300) sitshangu nya sidugwana nya ndralama, gitshangu ni gitshangu gi di dzega mazana mararu (300) dzisekeli nya ndralama. Khu guralo, mufumeli Solomoni, a di si vega nyumbani ya khabini ga Libhanoni.

¹⁷Mufumeli a di rumela gu girwa gambe gikhalo nya gikhongolo nya wufumu khu magwaha nya ndzofu, a gi londra khu ndralama nya guhutwe.

¹⁸Gikhalo gyogyo nya wufumu, gi diri ni livbandre na gimwegyo sigandro ni sigandredzelo nya migondro nya ndralama, na si tshanganisidwe vbagikhalotunu nya wufumu. Khu dzibambe gwa igyo, gi diri ni gikhighelo nya mawogo, eno ni eno gu manega sifananiso nya nghala.

¹⁹Ni mudzibambe nya livbandre na gimwegyo sigandro, gu diri ni likhumi na dzimbili dzinghala; iso si nga bani si si gu girwi khu mumbe mufumeli.

²⁰Sombo satshavbo sa Solomoni nya gusele khiso mati, si diri sa ndralama, ni satshavbo sombo sa nyumbani ya khabini ga Libhanoni, si diri sa ndralama yi hutidwego. Matshiguni ya Solomoni, parata yi di si sayedwi gilo.

²¹Mufumeli a diri ni mataro ma nga bani ma hongola tigoni ga Tarisisi, ni sithumi sa Hiramo, nyondro mweyo ndrani nya myaga miraru, ma di wuya khu Tarisisi na ma vbagede ndralama, parata, magwaha nya ndzofu, dzifene ni dzipavhawu.

²²Khu guralo, mufumeli Solomoni, a di vbindra vafumeli vatshavbo va mafuni khu gu ghanya gumogo ni guti.

²³Vatshavbo vafumeli va tigoni, va di gola gu wona khovbe ya Solomoni, ni gupwa guti a ningidwego khu Nungungulu monyoni gwaye.

²⁴Muthu ni muthu, khu mwaga ni mwaga, a di mu resela miningelo yaye nya sombo nya ndralama, dzitshalu, matshari, mafura, dzikavalu ni dzimula.

²⁵ Solomoni a diri ni magumana mazana (4.000) mipatwa nya dzikavalu ni dzikareta nya nyimbi; ni likhumi na mavili magumi mazana (12.000) vakhileli nya dzikavalu, a va vega dhoropani nya dzikareta, ni Jerusalema vbafuvbi gwaye.

²⁶ A di khozisa vafumeli vatshavbo, gukhugela tsongoni wa Ewufrate, kala tigoni ga Vafilisitiya, a bela kala vbinganoni nya litigo la Egipito.

²⁷Mufumeli Solomoni, giride gukhuye gikhatini gwaye, Jerusalema, gu manega parata nya gukhwatshi siwindri, ni misimbo nya misedhari, nya gutale ngudzu nya gukhwatshi migure ya panini.

²⁸ Mufumeli Solomoni a di resedwa dzikavalu khu Egipito ni mayigwana yatshavbo yale.

²⁹Yimbe mithumo ya Solomoni, iyo nya guhegule niyo nya guhegise, yi lovidwe umo nya Libhuku nya Matimo ya muprofeti Natani, ni umo nya Libhuku nya Wuprofeti wa Ayiya, wa Silo, ni umo nya siwoniso ya Idho, mwama nya liwoni, khu kotani ya Jerobhowamo, mwamana wa Nebhati.

³⁰Solomoni fumide Jerusalema ga va na Israyeli vatshavbo, magumana myaga

³¹A diya lala gumogo ni vavelegi vaye, dzingidwe Dhoropani ga babe waye Dhavhidhe, a tshikedzwa vbagikhalotunu gwaye nya wufumu, khu mwanaye Robhowamo.