Read gitonga Ezira 4 Bible Online

Ezira 4 - gitonga bible

Ezira 4

¹Avbo valala va na Judha ni va na Bhejami va nga pwa gupwani avo va nga wuyago khu wugumbitunu, va ngu vbahedza Nyumba ya PFHUMU Nungungulu wa na Israyeli,

²va dita ga Zorobhabheli ni ga vathangeli nya dzinyumba dza vababe vawe va va embela, khavo: “Hi digeni hi vbahe nethu gumogo nanu kholu ethu nethu ha gu vbweta Nungungulu wanu; kha nga idzo mu girago enu, ethu nethu hi ngu ningela miphaselo gukhugela litshigu lile Esari-Hadhomi, mufumeli wa Asiriya a hi rumedego eno.”[2]

³Aholu Zorobhabheli, Jesuwa ni vambe vathangeli nya dzinyumba dza vababe vawe va di va hakha, khavo: “Kha gu kodzegi gu ethu hi hengela nanu guvbaha Nyumba ya Nungungulu wathu, aholu ethu henga hi na vbahela PFHUMU Nungungulu wa Israyeli, kha nga idzo hi leletedwego khidzo khu Kiro, mufumeli wa Perisiya.”

⁴Khavbo avbo, vathu va tigoni va di phela gu vbedza tshivba ya va na Judha va va himbedzela gu vbaha,

⁵va rengelela vasingalagadzi gasi ma dzuwungela makungo yawe, va gira kharato matshigu yatshavbo nya guvbanye ga Kiro mufumeli wa Perisiya, kala ga mufumo wa mufumeli Dhariyo wa Perisiya.[3]

⁶Guphelani ga mufumo wa mufumeli Asuwero va di lova lidangalila nya gulembe vavbanyi va Judha ni vathu va Jerusalema.[4]

⁷Matshiguni ya Aritasesi, mufumeli wa Perisiya Bhisilamu, Mitiredhati, Tabhiyeli ni vamata vaye va di lovela Aritasesi lidangalila khu malovelo nya giasiriya ni lidimi nya gisiriyaka.[5]

⁸Khu guralo, Rewumi, singalagadzi, ni mulovi Sinisayi, va di lovela mufumeli Aritasesi, lidangalila nya guwugele Jerusalema, khavo:

⁹“Rewumi, singalagadzi ni mulovi Sinisayi, ni vamata vaye, va na Dhina, ni va na Afarisataki, va na Tiripeli, va na Afarisi, va na Arikeli, va Bhabhiloni, va Susaki, va Dheyavi, va Elamo,

¹⁰ni mambe mafumbu ayo mulovi nya ndruma Osinapari, a va residego khumo va luvedego umo a va resa madhoropani ya Samariya, ni mambe ya khisikheyi nya tsongo wa Ewufrate.”[6]

¹¹Maganelelo nya lidangalila va nga lovelago mufumeli Aritasesi khaya: Sithumi sago si vbahidego khisikheyi nya tsongo;

¹²Dziti gwadi mufumeli gukhuwe Vajudha vale va khugidego khiyo gwago, vata eno Jerusalema, va ngu vbahedza lidhoropa lile nya guyeyise nya guvivbe, va ngu wusa gambe ni makhokhola yaye va vbaha ni siseketelo saye.

¹³Olu dziti gwadi mufumeli nya gukhuwe va gu wusa lidhoropa leli ni makhokhola yaye, li vbela, gima kha va na nga livba gambe fanelo nya khupo, ambari gu luva ni gu dusa mihengo; khu kharato thomba ya mufumeli yi na vbwasama.

¹⁴Khu guralo, kha nga olu hi lungago khu munyu wa ndrangani gwago, kha si hi tsakisi gu wona mufumeli wathu na gu poyidwa. Khu guralo, hi ngu rumela mahungu yaya gu gu tivisa gukhethu:

¹⁵“Indra khedza Mabhukuni nya Matimo ya vababe vago, u naya mana nya gukhuwe, lidhoropa leli khya gu yeyisa, kha li goli mifumo ni dzipfhumu; khu matshigu ma vbindridego li giride wughevenga, khu kotani nya isoso li pfhungumudwe.

¹⁶Ethu hi ngu gu tivisa gwadi uwe mufumeli khethu: La gu za lidhoropa lile li wusedzwa, gu vbahedzwa ni likhokhola lakone li vbela, uwe gima khu na nga mana wulanga tshatugo neno nya tsongo wa Ewufrate.”

¹⁷Khavbo avbo, mufumeli a di rumela phindrulo yeyi ga singalagadzi Rewumi, ni mulovi Sinisayi, ni vatshavbo vamata vaye va nga bani va vbahide Samariya, gumogo gambe va nga bani vari khisikheyi nya tsongo, khuye: “Gurula gu na khale ni enu![7]

¹⁸Lidangalila mu hi rumedego li hevbudwe ni gu tshamusedwa gwadi mbeli gwangu.

¹⁹Nyi rumede guya holeledwa gwadi, gu manegide gu lidhoropa lile gukhugela matshiguni ya gale li yeyiside ga vafumeli, gu manega pfilupfilu ni wughevenga.

²⁰Jerusalema gambe, gu manegide vafumeli nya tshivba, va nga bani va gu khozisa mayigo yatshavbo ya khisikheyi nya tsongo wa Ewufrate, va nga bani va livbedwa khupo ni mihengo nya gikhaba.

²¹Gasi olu, ningani nayo nya gu emiseni vathu vale va si vbahi lidhoropa lile, kala nyi dusa wumbe nayo.

²²Dzi woneleni mu nga hwelini ni mahungu yaya, kholu mhango yi nga dandra, vafumeli va luzekedwa ngudzu.”

²³Hwane nya gu bani wu hevbudwe khwepa yoyu wa mufumeli Aritasesi mahoni ga Rewumi ni Simisayi mulovi, ni vamata vawe, avo va di khuga khu uvbiredza va hongola Jerusalema ga Vajudha vaya va digisa guvbaha khu tshivba ni gigaha.

²⁴ Khavbo avbo, va di diga thumo nya guvbahe Nyumba ya Nungungulu Jerusalema, yi ema kala mwaga nya wuvili nya gufume ga Dhariyo, mufumeli wa va Perisiya.