Read gitonga Ezira 5 Bible Online

Ezira 5 - gitonga bible

Ezira 5

¹ Vaprofeti Agewu ni Zakariya mwamana wa Idho, va di profeta ga Vajudha va nga bani vari Jerusalema ni Judha; va di va profeta khu lina la Nungungulu wa Israyeli.

²Khavbo avbo, gu di khuga Zorobhabheli, mwamana wa Salatiyeli, ni Jesuwa mwamana wa Jozadhaki, va pheledza guvbaha Nyumba ya Nungungulu, yi manegago Jerusalema; va phasedzedwa khu vaprofeti va Nungungulu.

³Khu gikhati gyogyo, gu dita gwawe Tatenayi, mwamangulu wa khisikheyi nya tsongo, ni Setari-Bhozinayi gumogo ni vamata vaye vata va embela kharati, khavo: Khu mani a mu ningidego nayo nya guvbahe nyumba yeyi, na gu si gu wusedzwi likhokhola leli?

⁴Khu guralo, avo va di va wudzisa, khavo: “Khu va mani malina ya vathu va vbahidego nyumba yeyi?”

⁵Aholu maho ya PFHUMU Nungungulu ma diri vbatshani nya madhota ya na Judha, va di va diga va si va himbedzeli kala mahungu yaya ma yiswa ga Dhariyo, na va gu lirela lidangalila nya phindrulo nya mahungu yaya.

⁶Mahungu nya lidangalila leli li rumedwego khu Tatenayi, mufumeli wa khisikheyi nya tsongo, gumogo ni Setari-Bhozinayi ni vamata vaye va Afrasate, va tshatugo nya tsongo, va di ma rumela ga mufumeli Dhariyo.

⁷Va mu bikela mahungu yaya khu ndzila yeyi na gu lovidwe gupwani: “Gurula gwatshavbo gu na khale ni mufumeli Dhariyo!”

⁸A na khale na gu dziti mufumeli gukhuye, ethu hi endrede gipandrengulu gya Judha, nyumbani ga Nungungulu nya khongolo yi vbahwago khu siwindri nya sikhongolo, mapulango ma phedwe gu khokhothedwa umo nya sidza, thumo wowu wa gu tutuma khu tshivba khu mandzani gwawe.

⁹Ethu hi di wudzisa vasingalagadzi, va hi embela, khavo: Khu mani a mi ningidego nayo nya guvbahedzeni nyumba ni gu wusa likhokhola?

¹⁰Gambe hi va wudziside khu malina yawe gasi hi kodze gu gu tivisa, hi gu lovela khu va mani malina nya vathangeli vawe.

¹¹Va di hi ninga phindrulo, khavo: Ethu hi sithumi sa Nungungulu wa ndzadzini ni mafuni, aholu ha gu vbahedza nyumba yi vbahidwego hwane nya myaga nya yingi, kholu yi vbahidwe ni gu tiyiswa khu mufumeli nya khongolo wa na Israyeli.

¹²Aholu vababe vathu va di gorosa Nungungulu wa ndzadzini, uye a di va ningela mandzani ga Nabhukodhonosori, mufumeli wa Bhabhiloni, Mukalidhewu, avbo uye a nga pfhungumulago nyumba yeyi, a vbagela vathu vaye va hongola Bhabhiloni.

¹³ Aholu khu mwaga nya guhegule nya gufume ga Kiro, mufumeli wa Bhabhiloni, mufumeli Kiro a di dusa thetho nya gukhuye Nyumba ya Nungungulu yi vbahedzwe.

¹⁴Ambari ni mikanvu nya ndralama ni parata sa Nyumbani ga Nungungulu, esi Nabhukodhonosori a nga si phanga Nyumbani ga Nungungulu yi nga bani yiri Jerusalema, aya si vega nyumbani ga vanungungulu va Bhabhiloni, si dzegidwe si ningedwa mwama moyo nya gupwani khu Sesibhazari, uye a nga mu emisago gu khala mwamangulu.

¹⁵A mu embela, khuye: “Dzega sombo sesi u si yisa ga Nyumba ya Nungungulu yi guromo Jerusalema.”

¹⁶Khavbo avbo, a dita mwama moyo nya gupwani khu Sesibhazari, ata phela gu tsitsa khokhweni nya Nyumba ya Nungungulu yi guromo Jerusalema; gukhugela avbovbo kala olu, yi ngu vbahwa, aholu yi si gu vbeli.

¹⁷Gasi mufumeli, wa gu si wona nari gwadi, vbweta guti gwadi nyumbani nya thomba ya mufumeli wa Bhabhiloni ina kamwe mufumeli Kiro a ganede gukhuye gu na vbahwe Nyumba ya Nungungulu Jerusalema gani; khu kharato mufumeli a na hi embele gupimisa gwaye khu mahungu yaya.