Read gitonga Ezira 7 Bible Online

Ezira 7 - gitonga bible

Ezira 7

¹Hwane nya silo sesi, gikhatini nya gufume ga Aritasesi, mufumeli wa Perisiya, Ezira, mwamana wa Seraya, mwamana wa Azariya, mwamana wa Hilikiya,[10]

²mwamana wa Salumi, mwamana wa Sadhoki, mwamana wa Ayitubhi,

³mwamana wa Amariya, mwamana wa Azariya, mwamana wa Merayoti,

⁴mwamana wa Zeraya, mwamana wa Uzi, mwamana wa Bhuki,

⁵mwamana wa Abhisuwa mwamana wa Fineya, mwamana wa Eliyazari, mwamana wa Aroni, muphasi nya khongolo nya mhamba.

⁶Ezira yoyu a di khuga khu Bhabhiloni; a diri mulovi a wutigo gwadi Nayo wa Mosi.

⁷Va di gwela gambe Jerusalema, va nya gukari nya sanana sa na Israyeli sa vaphasi nya mhamba, sa va na Levhi, sa vaembeleli, sa vasayisi nya dzinyangwa ni vasayisi va Nyumbani ga Nungungulu, khu mwaga nya livbandre na wuvili nya gufume ga Aritasesi.[11]

⁸A di vboha Jerusalema, khu ngima nya livbandre; gu diri mwaga nya livbandre na wuvili nya gufume ga mufumeli yoyu.

⁹Kholu uye a di khuga khu Bhabhiloni, khu litshigu nya guphele nya ngima nya guhegule; a vboha Jerusalema, khu litshigu nya guhegule nya ngima nya livbandre, kha nga wuhigo nya gyandza gya Nungungulu waye a nga bani nari naye.

¹⁰Kholu Ezira a di dongisede monyo waye a dzi ningela gu vbweta Nayo wa PFHUMU Nungungulu, a wu landrisa, ni gu hevbudza tigoni ga Israyeli, sileletelo ni lisine laye.

¹¹Egi khu gifananiso nya lidangalila eli mufumeli Aritasesi a nga li ningelago ga muphasi nya mhamba Ezira, mulovi nya milayo ya PFHUMU Nungungulu ni sileletelo saye ga va na Israyeli, a gu esi:

¹²“Aritasesi, mufumeli nya vafumeli, ga uwe Ezira muphasi nya mhamba ni mulovi a vbeledego nya Nayo wa Nungungulu wa ndzadzini.[12]

¹³Nyi rumede gukheni, watshavbo wule a gu wa na Israyeli, a guromo mufumoni gwangu, ni vaphasi vawe, ni va na Levhi, avo va dzinago gu hongola navo Jerusalema, va na hongole.

¹⁴Kholu u ngu rumwa khu mufumeli, gumogo ni madhota yaye nya livbandre na mavili, guya wona iso si dugelelago Judheya ni Jerusalema, u wona idzo wu landriswago khidzo Nayo wa Nungungulu wago, u wu modego mandzani gwago.

¹⁵U na dzega ndralama ni parata, si nga duswago khu mufumeli gumogo ni madhota yaye, va nga ningelago khu guhaladza gwawe ga Nungungulu wa na Israyeli, ndranga yaye yi manegago Jerusalema.

¹⁶Gu diga nya isoso, u na dzega gambe ndralama yatshavbo ni parata, u na gu yi manago gipandrengulu gya Bhabhiloni, gumogo ni mihengo nya guningele khu gugola ga vathu, ni ya vaphasi nya mhamba, gasi gu ningela Nyumbani ga Nungungulu a guromo Jerusalema.

¹⁷Khu dzitsapawu dzodzo, u na renga dzimombe, dzihamba, dzinvuta, gumogo ni miningelo yakone nya guhodze ni wadwa, u si ningela vbagiluvelotunu gya Nyumbani ga Nungungulu wanu, a guromo Jerusalema.

¹⁸Gasi khu ndralama ni parata yi na gu tshalago, uwe ni vandriyago mu na thuma khiso iso mu na gu si wona nari guhaladza ga Nungungulu wanu, nya nga idzo mu na gu dzi wona khidzo.

¹⁹Sombo sile u ningidwego gasi si ya thumela Nyumbani ga Nungungulu wago, u na ya si ningela mbeli ga Nungungulu, wa Jerusalema.

²⁰Simbe si na gu vbwetegago Nyumbani ga Nungungulu wago, iso u yelago gu ningela, u na si dusa khu nyumbani nya thomba ya mufumeli.

²¹ Eni mufumeli Aritasesi, nyi ngu ninga nayo ga enu mwatshavbo vaphari nya dzithomba mu guromo khu tshatugo nya tsongo, gukheni, satshavbo iso a na gu mi lombago Ezira, muphasi nya mhamba ni mulovi nya Nayo wa Nungungulu, gu vbwetega mu vbiredzela gu si gira.

²²Kala lizana dzitaleta nya parata, lizana mipimo nya tirigu, lizana mapipa nya vbinyu, lizana mapipa nya mafura; ni munyu nyambana tengo.

²³Satshavbo esi si leletedwago khu Nungungulu wa ndzadzini, si na giredwe nyumba yaye khu gukhathala, gasi Nungungulu wa ndzadzini a si gorogeli mufumo wa mufumeli gumogo ni sanana saye.

²⁴Gambe hi ngu mi tivisa gukhethu, vatshavbo vaphasi nya mhamba, va na Levhi, vaembeleli, vasayisi nya dzinyangwa, va na Netine, ni vathumegeli va Nyumbani ga Nungungulu, va nga dusi gikhaba ambari mihengo mwendro khupo.

²⁵Uwe Ezira, khu wugengeli wa Nungungulu wago u gu nawo, emisa vakhedziseli ni valamuli va kodza gu lamula vathu vatshavbo va guromo khisikheyi nya tsongo, u emisa vathu va mitigo milayo ya Nungungulu wago; avo va si mitigo mu va hevbudza.

²⁶Vatshavbo vale va si landrisigo milayo ya Nungungulu wago ni milayo ya mufumeli, va fanede gu lamudwa khu gu songwa, mwendro gu tutumiswa, mwendro gu hodzwa thomba yaye, mwendro gu khothedwa pasoni.

²⁷A na rungudzwe PFHUMU Nungungulu wa vababe vathu, uye a vegidego mahungu nya nga aya monyoni ga mufumeli wathu, gasi hi zundza Nyumba ya PFHUMU Nungungulu wa Jerusalema.

²⁸Uye a nyi giridego nyi mana mathomo ga mufumeli, ni ga dzindruna nya hudzwe yaye, ni ga vathangeli vatshavbo nya dzindrena dza mufumeli! Nyi di tiyiswa hwambo, khu kotani nya gyandza gya PFHUMU Nungungulu gi guromo vbatshani gwangu; nyi tombaniside vasingalagadzi va na Israyeli, gasi nyi hongola nawo.