Read gitonga Nehemiya 11 Bible Online

Nehemiya 11 - gitonga bible

Nehemiya 11

¹Avo va nga bani va thangela vathu, va di khala Jerusalema, aholu ava vambe vathu va di lola dzisolo gasi guti vbakari nya mitsawa nya likhumi mapango gu hathwa moyo a yelago guya khala dhoropani nya gukatege Jerusalema; gasi ava vambe nya livbandre na sina sipandre, va vbaha ga mambe madhoropa.

²Vatshavbo vathu va di kategisa vale va nga dzi ningelago khu gugola gwawe guya vbanya dhoropani ga Jerusalema.

³Ava khu vathangeli va ngata khumo nya sipandrengulu, va dzude va ta vbaha Jerusalema; gasi umo nya madhoropa ya Judha, muthu ni muthu a di vbaha wulangani gwawe, madhoropani gwawe, a gu ava; va na Israyeli, vaphasi nya mhamba, va na Levhi, vathumegeli va nyumbani ga Nungungulu ni sanana sa sithumi sa Solomoni.

⁴ Jerusalema va vbahide navo nya gukari, nya va na Judha ni va na Bhejami. Va na Judha va diri ava: Ataya, mwamana wa Uziya, mwamana wa Zakariya, mwamana wa Amariya, mwamana wa Sefatiya, mwamana wa Malaleyeli, wa sanana sa Peresi;

⁵ni Mahaseya, mwamana wa Bharuki, mwamana wa Koli-Hozi, mwamana wa Hazaya, mwamana wa Adhaya, mwamana wa Joyaribi, mwamana wa Zakariya, mwamana wa Musilo.

⁶Tengo watshavbo nya sanana sa Peresi va nga bani va vbanya Jerusalema, wu diri mazana mana ni livbandre na limwedo magumi ni livbandre na vararu (468) vama nya dzindrena.

⁷Gasi va na Bhejami khava: Salu, mwamana wa Mesulamo, mwamana wa Joyedi, mwamana wa Pedhaya, mwamana wa Kolaya, mwamana wa Mahaseya, mwamana wa Itiyeli, mwamana wa Jesaya.

⁸Khu hwane gwaye, gu diri ni Gabhayi, ni Salayi; gupata vatshavbo, gu khala livbandre na mana mazana ni magumavili na livbandre na vararu (928).

⁹Muthangeli wawe a diri Joyeli, mwamana wa Zikiri; gyandza gyaye a diri Judha, mwamana wa Senuwa, vbawuthangelitunu nya lidhoropa.

¹⁰Vaphasi nya mhamba va diri ava: Jodhaya, mwamana wa Joyaribi, Jakini,

¹¹Seraya, mwamana wa Hilikiya, mwamana wa Mesulami, mwamana wa Sadhoki, mwamana wa Merayoti, mwamana wa Ayitubhi, muthangeli nya Nyumba ya Nungungulu,

¹²gumogo ni vandriyaye, va nga bani va thuma Nyumbani gwa Nungungulu, vatshavbo va khala livbandre na mararu mazana ni magumavili na vavili (822); ni Adhaya, mwamana wa Jerowami, mwamana wa Pelaliya, mwamana wa Andzi, mwamana wa Zakariya, mwamana wa Pasuri, mwamana wa Malaki,

¹³ni vandriyaye, va nga bani vari vathangeli nya mapango yawe, va girago tengo nya mazana mavili ni magumana na vavili (242); ni Amasayi, mwamana wa Azareyeli, mwamana wa Azayi, mwamana wa Mesilemote, mwamana wa Imeri,

¹⁴ni vandriyaye, nya lizana ni magumavili na livbandre na vararu (128) vama nya dzindrena ni tshivba, na va gu thangedwa khu Zobadiyeli, mwamana wa Gedholimi.

¹⁵Gasi va na Levhi va diri ava: Semaya, mwamana wa Hasubhi, mwamana wa Azirikamo, mwamana wa Hasabhiya, mwamana wa Bhuni,

¹⁶Sabhetayi ni Tozabhadi, vathangeli vava va na Levhi. Khavo va nga bani vari vathangeli va vbavbandze nya Nyumba ya Nungungulu.

¹⁷Mataniya, mwamana wa Mika, mwamana wa Zabhidhi, mwamana wa Asafi, muthangeli nya dzindzimo umo nya milombelo, ni Bhakebukiya, uye nya wuvili ga vandriyaye, gu landrela Habidha, mwamana wa Samuwa, mwamana wa Galali, mwamana wa Jedhutumi

¹⁸Vatshavbo va na Levhi va nga bani va gu vbanya Jerusalema lidhoropa nya gukatege, va diri mazana mavili ni livbandre na mararu magumi na vana (248).

¹⁹Gasi vawoneleli nya dzinyangwa va diri ava: Akubi, Talimoni ni vandriyaye ni vaemeledzi nya myanya, lizana ni livbandre na mavili magumi na vavili (172).

²⁰Vambe va na Israyeli, vaphasi nya mhamba ni va na Levhi, va di vbaha madhoropani ya Judha, muthu ni muthu a khala petoni gwaye.

²¹Vathumegeli va Nyumbani ga Nungungulu va di vbahide gipandre gya Ofeli, na va gu thangedwa khu Ziya ni Gisipa.

²²Muthangeli wa va na Levhi va nga bani va gu khala Jerusalema, a diri Uzi, mwamana wa Bhani, mwamana wa Hasabhiya, mwamana wa Mataniya, mwamana wa Mika, mwamana wa Asafe a nga bani nari muembeleli thumoni wa Nyumbani ga Nungungulu.

²³Kholu mufumeli a di leletede khu mahungu yawe gasi vaembeleli va ningwe tshatshazelo yawe nya litshigu ni litshigu.

²⁴Gasi uye a nga bani nari gyandza gya mufumeli ga mabhulo yatshavbo ma lumbago vathu a diri Petaya, mwamana wa Mesazabheli.

²⁵Gasi umo nya mitalala ni mahangeni gakone, vambe vathu nya lifumbu la na Judha, va di vbanya Kiriyati-Aribha ni mitalalani gakone, ni Dhibhoni gumogo ni mitalalani gakone,

²⁶ni Jesuwa, ni Moladha, ni Bheti-Paleti,

²⁷ni Hazari-Suwali, Bherisebha ni mitalalani gwaye;

²⁸ni Zikalagi ni Mekona ni mitalalani gwaye;

²⁹ni Eni-Rimoni, ni Zora Jerimoti;

³⁰ni Zanowa, ni Adhulami ni mitalalani gwaye; ni Lakisi ni mahange yaye ni Azeka ni mitalalani gwaye. Va di ya ghova gukhugela Bherisebha kala kovani ga Hinomi.

³¹Va na Bhejami va vbahide navo gukhugela Gebha kala Makemusi, Aya, kala Bheteli ni mitalalani gwaye;

³²ni Anatoti, ni Nobe, ni Ananiya,

³³ni Hazori, ni Rama, ni Gitayimi,

³⁴ni Hadhidhi, ni Zobhoyimi, ni Nebhalati,

³⁵ni Lodhi, ni Ono, ni kovani nya guhevbule mithumo nya wumeseri.

³⁶Wu diromo tsawa wa na Levhi nya Vajudha va ngaya vbaha vbakari ga va na Bhejami.