Read gitonga Nehemiya 4 Bible Online

Nehemiya 4 - gitonga bible

Nehemiya 4

¹Avbo Sambalati, a nga pwago gupwani hi womo guvbahani nya likhokhola, a di vila a vbisega ngudzu khu likhulo, a phela gu hembulula Vajudha.

²A di ganela mbeli ga vandriyaye ni ga masotshwa ya Samariya, khuye: “Ginani si girago sisiwana sesi nya Vajudha? Ina hi va diga va gira esi gani? Olu va girago miphaso, va na li wusa khu litshigu limwedo, gani? Ina va na wusa siwindri sesi si khadego litala nya nguma khu gu vbiswa, gani?”

³Aholu Tobhiya nya Muamoni a nga bani nari naye vbafuvbi a di khuye: “Esi va si vbahago, a nata ngehe ata si khungumula.”

⁴Nyi di lombelela ga Nungungulu nombelo yoyu, kheni: A ma Nungungulu wathu, nga yingisa idzo va hi valago khidzo! Ndrwadza va hi girelago yi na thegele mihungoni gwawe. Va na thegele mandzani ga valala va vbagedwa va yiswa wugumbini ga mambe mayigo.

⁵U nga va divaleli guvivba gwawe, u nga tshuki u futa sighoho sawe; kholu va gu goroside mbeli ga vavbahi vago.

⁶Kholu ha guvbaha libhiyo; libhiyo latshavbo hi li tshanganiside kala vbakari ni vbakari guya vbatshani, kholu vathu va thumago va di gu dzi ningedzela ngudzu.

⁷Avbo Sambalati, ni Tobhiya, ni Vaarabhi, ni va na Amoni ni va na Asidhodhi, va ngapwago nya gupwani thumo nya guvbahedze libhiyo la Jerusalema wu ngu hongola mbeli, ni gu malufa ma ngu vbela, va di vbisega ngudzu.

⁸Vatshavbo va di tshangana va luga gikungo nya gudhumele Jerusalema; ni gu wusa vhilinganya.

⁹Khu guralo, ethu hi di lombelela ga Nungungulu wathu, hi vega vawoneleli nya gukhevisele wutshigu ni mihani, gasi ndranga yathu yi si sasedwi khu valala.

¹⁰Khu guralo va na Judha va di khavo: “Vathu va vbede tshivba, narigu ndzilo yi ngari yingi; kha hi na nga kodza gu vbahedza kala li vbela.”

¹¹Valala vathu va di ganela, khavo: Kha va na ngati gilo, ambari gu wona, kala hi vboha vbafuvbi gwawe hi ya va sasela, hi va emisa thumoni gwawe.

¹²Vajudha va nga bani va gu vbanya vbakari ga valala vathu, va dzudego vata hi tivisa khu mahungu yoyo, gu kala gu vboha likhumi dzinyondro, khu malanga nala a yelago gubela khumo a hi sasela.

¹³Khu guralo, nyi di vega vakheviseli khu malangani ya vbavbatshi ni musihogoni nya libhiyo, nyi va vega khu mitsawa nya Mahundzu yawe, na vari ni matshari, sighalala ni wulaho wawe;

¹⁴Avbo nyi nga wona gukheni satshavbo si dongisedwe, nyi di khuga nyi ema nyi embela vathangeli, dzindruna ni vathu vatshavbo, kheni: “Mu nga thavi, dundrugani gukhenu PFHUMU Nungungulu khongolo, ni gu thavisega, mwa gudwanela vandriyanu, sanana sanu nya sikhwathana nesi nya sagadzyana, vagadzi vanu ni dzindranga dzanu.”

¹⁵Nala wathu na pwide nya gupwani gikungo gyawe hi gi pimide, ni gu, PFHUMU Nungungulu a pfhungumude makungo yawe, hi di bwelela marumbini, muthu ni muthu a hongola thumoni gwaye.

¹⁶Gukhugela litshigu lile, gipandre gya vbakari nya madzaha yangu, ma di thuma thumo nya guvbahe, gimbe gipandre gi phara matshari, sitshangu, malaho ni sikhweso nya simbi, vathangeli na va emide khu hwane nya ndranga yatshavbo ya na Judha.

¹⁷Avo va nga bani vari vaphasedzeli nya guvbahe libhiyo, va di phara thumo khu libogo limwedo, khu limbe libogo a phara litshari.

¹⁸Vavbahi moyo ni moyo a di vbaha nari ni litshari nyongani gwaye, gasi muwombi nya pundru a diri vbafuvbi gwangu.

¹⁹Nyi di ganela ga vathangeli, vasingalagadzi, ni vathu vatshavbo, kheni: “Thumo nya guvbahe khongolo ngudzu, gambe guvbweta guvbaha na hi tawuganede na hiri hwindzo ni hwindzo;

²⁰mwa gupwani guwomba nya pundru, tutumani muya tshangana avbo wu pwalago avbo, mwendro saye Nungungulu wathu a na hi dwanela.

²¹Hi di thumisa kharato, gimbe gipandre nya vathu gi di thuma na gi pharide matshari gukhugela dzimindrudzile kala dzi wonega dzinyeledzi nya wutshigu.

²²Khu gikhati gyogyo, nyi di ganela esi ga vathu, kheni: Moyo ni moyo wa na gyathu gumogo ni sithumi sawe, va nga khugi Jerusalema, gasi va kodze gu hi phasedzela gu ghadha vbawutshigutunu, gasi vbamihanitunu hi kodze guvbaha.”

²³Khu guralo, ambari eni, ni vandriyangu, sithumi sangu gumogo ni vawoneleli va nga nyi bangaladzago gu wuyani gwangu, a diri mwalo ni moyo a nga bani a tshula guambala gwaye, muthu ni muthu a di lala na pharide litshari mandzani gwaye.