Read gitonga Esiteri 1 Bible Online

Esiteri 1 - gitonga bible

Esiteri 1

¹Esi si giregide matshiguni ya mufumeli Kiserise,[1] uye a fumidego lizana ni magumavili na livbandre na sivili (127) sipandrengulu, gukhugela Indiya kala Etiyopiya.

²Khu matshigu yale, mufumeli Asuwero na khade vbagikhalotunu gwaye nya wufumu gi manegago dhoropani ga Suza, tsindza nya mufumo,

³khu mwaga nya wuraru nya gufume gwaye, Asuwero a di girela buzo dzindruna dzaye gumogo ni sithumi saye satshavbo. A di tombanisa vagimbidzisi nya dzinyimbi dza Vaperisiya ni Vamedhi, manganagana ni vathangeli nya sipandrengulu va di manega vatshavbo.

⁴Gasi guta va yeyedza dzithomba ni guzundzega nya mufumo waye, a va yeyedza gambe wumburi ni wugulu nya mufumo waye kala guvbela lizana ni livbandre na mararu magumi (180) matshigu.

⁵Na ma vbede matshigu yaya, mufumeli Asuwero a di ramba vathu vatshavbo va vbahidego likhokholani la Suza, gukhugela vakhongolo kala sanana, a va girela buzo gipimo nya livbandre na mavili matshigu, tandralani nya tsindza wa mufumeli.

⁶Avbovbo gu di ghwimbidwe myendra nya guage, neyi nya livala la damboni, na yi hungidwe khu dzingodzi nya dzikhindra nya guage ni giwunguwungu, na si khweleketidwe khu masindra nya parata, yi vbayegwa vbamadingotunu nya siwindri nya wumburi. Gu diri gambe ni sikhalo nya ndralama ni parata, vbavbatshi gakone gu di giridwe khu siwindri nya guage niso nya gufuvile, nya sugu ni siwindri nya gukhedzige.

⁷Wadwa wu di sedwa khumo nya sikombe nya ndralama nya gu hambanelane, wadwa nya wufumu wu diri wungi ngudzu, kha nga idzo a nga golago khidzo mufumeli.

⁸Maselelo yakone ma diri ni nayo, mwalo a nga bani a gurumedzwa gu sela na si dzini; kholu mufumeli a di leletiside dzindruna dzaye gukhuye muthu ni muthu a gira iso a si golago.

⁹Uye nuye pfhumugadzi Vhasiti a di girela buzo vanyamayi vakwawe va nyumbani ga mufumeli Asuwero.

¹⁰Khu litshigu nya livbandre na mavili, mufumeli na tsakide khu gu sela wadwa, a di ranisa Mewumani, Bhizita, Haribhona, Bhegita, Zetari ni Karikasi, mithenwa yi nga bani yi thumela mufumeli Asuwero,

¹¹a va ruma gu ya rana pfhumugadzi yaye Vhasiti na ambade gihugu nya wufumu gasi guta yeyedza manganagana gumogo ni vathu wumburi waye, kholu uye a di mburide ngudzu.

¹²Aholu Vhasiti kha dzumela gu landrisa iso a embedwego khu mithenwa ya mufumeli; khu guralo, mufumeli a di vbisega ngudzu, a mu gorogela,

¹³a ya wudzisa vagengeli va vidzidwego khu guti ni wulamuli ga gikhati gile, kholu nayo wa mufumeli a diri wa gu lamula gumogo ni vale va wutigo wulamuli.

¹⁴Manganagana yaye ma diri aya: Karisena, Setari, Adimata, Tarisisi, Meresi, Marisena ni Memukani, livbandre na mavili manganagana ya Perisiya ni Medhiyani ma nga bani ma khala mbeli ga mufumeli, na mari vbamalangatunu nya guhegule vbasikhalotunu nya wufumu.

¹⁵A di va wudzisa, khuye: “Khu gu landrisa nayo, ginani hi fanedego gu gira khu pfhumugadzi Vhasiti, olu a bombidego gu landrisa nayo wa mufumeli Asuwero a leletedego mithenwa?”

¹⁶Memukani a di mu hakha, khuye: Pfhumugadzi Vhasiti kha hosela basi uwe mufumeli, aholu hosede gambe ni manganagana ya sipandrengulu ni vathu vatshavbo va guromo tigoni gwago.

¹⁷Esi si giridwego khu pfhumugadzi, si na tidwa khu vanyamayi va tigoni gwatshavbo; khu guralo, kha va na ninga githawo vama vawe; kholu va na, khavo: “Mufumeli Asuwero raniside pfhumugadzi yaye Vhasiti, aholu, uye kha dzumela guta.

¹⁸Kholu olu muhuno gunene, dzipfhumugadzi dzatshavbo dza va Perisiya ni va Medhi, va pwidego mahungu yaya ya pfhumugadzi, va na gira navo kharato va si ningi githawo ga manganagana ya mufumeli; khu guralo, gu na manega guyeyisa ni gumbana githawo.

¹⁹Aholu uwe mufumeli, wa gu dzumela gira, kharati: Dusa khwepa nya nayo wu lowa umo nya milayo ya Vaperisiya ni Vamedhi, gasi wu si vbindrugedzwi. Laya gukhuwe Vhasiti a si hidzimeli gambe vbafuvbi gwago uwe mufumeli Asuwero. Gasi uwe mufumeli vbweta mumbe u mu wonago na lulamide gu vbindra Vhasiti, a ta khala pfhumugadzi yago.

²⁰Gikhati thetho wowu wa mufumeli wu na tiviswago tigoni gwago gwatshavbo gu andridego ngudzu, vatshavbo vanyamayi va na ninga githawo ga vama vawe, gukhugela ga sitetema kala ga sisiwana.”

²¹Mawonelo yaya ma di tsakisa mufumeli gumogo ni manganagana yaye. Khu kharato mufumeli a di gira idzo a nga laywago khidzo khu Memukani.

²²Mufumeli a di rumela malangalila umo nya sipandrengulu satshavbo sa tigoni gwaye, gipandrengulu ni gipandrengulu gi mana khwepa nya nayo wu lovidwego va wupwa khu lidimi lawe gumogo ni malovelo va ma pimago. Nayo yoyo wu di leletela gukhuwo, mwama watshavbo fanedwe khu gu nari uye hungo nya ndranga yaye, ni gu ninga nayo khu lidimi la tigoni gwaye.