Read gitonga Esiteri 3 Bible Online

Esiteri 3 - gitonga bible

Esiteri 3

¹Khu hwane nya satshavbo sesi, mufumeli Asuwero, a di khusedza Hamani, mwamana wa Hamedhati, Muagagi,[2] a mu vega gu khala muthangeli nya dzindruna dzaye dzatshavbo.

²Satshavbo sithumi sa mufumeli si nga bani si thuma ndrangani gwaye si di gu dzi nogisa si khidzima mbeli ga Hamani, kholu mufumeli, a di leletide kharato. Aholu, Moridhekayi kha dzumela gu dzi nogisa ambari gu mu ninga githawo.

³Khu guralo, sithumi sa mufumeli si nga bani si romo vbamwanyatunu si di mu wudzisa, khiso: “Khu ginani u kanyisago sileletelo sa mufumeli?”

⁴Va di mu khongotela khu matshigu nya gutale, aholu uye kha nga thela kota, kala va nga dzega mahungu va ya ma bika ga Hamani na va vbweta gu wona mwendro magana ya Moridhekayi ma tiyide, kholu uye a di ganede gukhuye Mujudha.

⁵Gikhati Hamani a nga wona gukhuye Moridhekayi kha dzi nogisi ambari gu khidzima a yeyedza githawo mbeli gwaye, a di tala khu likhulo.

⁶Aholu Hamani a di wona gukhuye kha gu phasi gilo gu mola Moridhekayi ekha, kholu va di mu tshamusede gukhavo Moridhekayi a diri wa lifumbu muni. Khu guralo, Hamani a di vbweta gu sasela Vajudha vatshavbo va nga bani varomo tigoni nya gufumwe khu Asuwero, nya valongo va Moridhekayi.

⁷Khu mwaga nya likhumi na mivili nya gufume ga mufumeli Asuwero, khu ngima nya guhegule a gu ngima nya Nisani, Hamani a di leletela gukhuye gu lodwa Puri a gu solo, khu litshigu ni litshigu, khu ngima ni ngima, kala ngima nya likhumi na mivili a gu ngima nya Adhari.

⁸Hamani a di embela mufumeli Asuwero, khuye: “Umo nya sipandrengulu sago satshavbo u si fumelago, gu na ni lifumbu nya gukari li phalalegidego vbakari nya vathu, milayo yawe yi hambanago ni ya vambe vathu, va si yingisigo milayo ya mufumeli; khu guralo, mufumeli, kha wu yedwi gu va diga va khale.

⁹Uwe mufumeli wa gu dzina, lova gukhuwe va na songwe; gasi eni nyi na pima tengo nya likhumi magumi mazana (10.000), nya dzitaleta nya parata nyi dzi vega mandzani ga avo va na thumago thumo yoyo, gasi dzi thedwa ndrani nya kwama wa mufumeli.”

¹⁰Khavbo avbo, mufumeli a di dusa phera ya mandzani gwaye, a yi ningela ga Hamani, mwamana wa Hamedhati, Muagagi, nala wa Vajudha.

¹¹Mufumeli a di embela Hamani, khuye: “Nyi ngu gu ninga parata gumogo ni vathu vovo gasi u gira khiso gu haladza gwago.”

¹²Khu litshigu nya likhumi na mararu nya ngima nya guhegule, gu di ranwa vatshavbo valovi va mufumeli, va ta leletedwa khu Hamani gu lova khwepa nya nayo wu rumedwa ga dzindruna dzatshavbo, ga vathangeli nya sipandrengulu, ga manganagana nya lifumbu ni lifumbu, wu rumedwa ga gipandrengulu ni gipandrengulu, khu malovelo nya idzo va lovago khidzo lifumbu lolo, gumogo ni lidimi lawe. Na wu lovidwe khu lina la mufumeli Asuwero, wu vetwa gitambo khu phera ya mufumeli, wu rumedwa.

¹³Malangalila yaya ma di rumedwa khu kureyu mayigoni yatshavbo ya mufumeli, gasi va pfhungumula, va songa ni gu mbembisa Vajudha vatshavbo, gukhugela madzaha, kala vakhongolo, sanana ni vanyamayi, khu litshigu la limwedo basi, litshigu nya likhumi na mararu nya ngima nya likhumi na mivili, a gu ngima nya Adhari, bwelo khavbo va phanga thomba yawe yatshavbo.

¹⁴Wumbe khwepa nya nayo yoyu, wu di rumedwa ga sipandrengulu satshavbo ni ga mafumbu yatshavbo gasi va dzi dongisela ga litshigu lile.

¹⁵Myango yi di rumedwa khu givbiredza khu nayo wa mufumeli, wu dugede likhokholani la Suza, gasi mufumeli ni Hamani va di khala vbavbatshi va sela; aholu dhoropani ga Suza gu diri ni pfilupfilu.