Read gitonga Esiteri 6 Bible Online

Esiteri 6 - gitonga bible

Esiteri 6

¹Wutshiguni wowo, mufumeli Asuwero, kha nga mana ligovbe. Khu guralo, a di rumela gu resedwa Libhuku nya Matimo li ta hevbudwa mbeli ga mufumeli.

² Gu di lovidwe gupwani Moridhekayi a di nga ya bika khu gikungo gi nga bani gi lugidwe khu Bhigitani ni Teresi mithenwa yi nga bani yi ghadha vbanyangwatunu, pwani va di gu vbweta gu songa mufumeli.

³Khavbo avbo, mufumeli a di ganela, khuye: “Gasi Moridhekayi ginani a giredwego ni gu bongwa khu thumo wowu a giridego?” Sithumi si nga bani si mu thumela, si di hakha, khiso: “Gimwalo ni gimwegyo a giredwego.”

⁴Mufumeli a di bwelo gambe a wudzisa, khuye: “Khu mani a guromo phathani?” Khu gikhati gyogyo Hamani a di ngari gu bela nyumbani ga mufumeli gasi guta ganela ni mufumeli khu gu vbweta gu songa Moridhekayi vbamadingotunu a nga bani a ma rumede gu tsitswa.

⁵Sithumi sa mufumeli si di ya mu embela, khiso: “Hamani emide nyangwatunu.” Mufumeli a di hakha, khuye, a na bele.

⁶Hamani na gu bela, mufumeli a di mu wudzisa, khuye: “Ginani hi yedego gu girela muthu a vbwetago gu zundzwa khu mufumeli?” Hamani a di pimisa khu monyoni gwaye, khuye: “Khu mani a yelago gu zundzwa khu mufumeli vbavbandze gwangu?”

⁷Uye a di hakha, khuye: Uwe mufumeli wa gu alakanya gu zundza muthu,

⁸mu ninge dzingandzu nya wufumu, edzi u olovelago gu ambala; u mu resela ni kavalu u olovelago gu khilela, u mu vega gihugu nya wufumu hungoni gwaye.[3]

⁹Gasi dzingandzu dzedzi, ni kavalu yeyi, dzi na ningwe moyo nya linganagana nya guthavisege gasi a ambagise muthu yoyu wago uwe mufumeli u vbwetago gu mu zundza, bwelo khavbo a mu dzundrulugisela ni dzindzila dzatshavbo dza dhoropani na gu huwelela, khuye: Muthu a godwago gu zundzwa khu mufumeli a gu giredwa silo nya nga esi!

¹⁰Khu guralo, mufumeli a di embela Hamani, khuye: “Khuga kamwe olu khu guvbiredza u dzega dzingandzu ni kavalu kha nga guganela gwago u ambagisa Mujudha wule Moridhekayi, a thumelago phathani nya wufumu! U nga hambanisi ni gimwegyo nya iso u ganedego.”

¹¹Khavbo avbo, Hamani a di dzega dzingandzu a ambagisa Moridhekayi a mu khiledza kavalu a dzundruwugela naye dzindzilani dza dhoropani na gu huwelela, khuye: “Khidzo kharati a giredwago, muthu a zundzegago ga mufumeli.”

¹²Khu hwane nya isoso, Moridhekayi a di bwelela a wuya phathani ga mufumeli, gasi Hamani a di dzegela gu bwelela khu gu vbiredza a hongola gaya na thuvigide khovbe.

¹³A ya tshamusela mwangadzi waye Zeresi gumogo ni dzipari dzaye, iso si nga mu dugelelago. Khavbo avbo, vagengeli vava gumogo ni mwangadzi waye Zeresi, va di mu embela, khavo: “Olu Moridhekayi a gu wa lifumbu nya Vajudha, u phedego gu dzi thesa migondroni gwaye, olu uwe khu na nga mu pala, aholu u na dzi thesa ngudzu mbeli gwaye.”

¹⁴Na va nga gu ganela naye, gu di vboha khu givbiredza mithenwa ya mufumeli, gasi guta dzega Hamani a ya buzotunu wa Esiteri.