Read gitonga Esiteri 8 Bible Online

Esiteri 8 - gitonga bible

Esiteri 8

¹Khu litshigu lolo kamwe, mufumeli Asuwero a diya ningela ga pfhumugadzi Esiteri ndranga yatshavbo ya Hamani nala wa Vajudha. Moridhekayi a di ta dzi wonegisa mbeli ga mufumeli, kholu, pfhumugadzi Esiteri a di mu tshamusede gukhuye khwa na gyawe.

²Mufumeli a di dusa phera yaye a nga bani a yi dzegide ga Hamani a ningelaga Moridhekayi; khavbo avbo, Esiteri a di vega Moridhekayi kha nga muthangeli nya thomba ya Hamani.

³ Khavbo avbo, Esiteri a di bwelela gambe a ya thega migondroni ya mufumeli na gu lila, a lomba mufumeli gasi a thindrekisa makungo nya wuvivbi nya gusongwe Vajudha ma nga bani ma lugidwe khu Hamani, Muagagi.

⁴Khu guralo, mufumeli a di khusedza ndronga yaye nya ndralama. Khavbo avbo, Esiteri a di khuga a ema mbeli ga mufumeli.

⁵A mu embela, khuye: “Nari pwani uwe pfhumu u ngu salalegiswa khu magana yangu, nyi manega na nyi lulamide mbeli ga mufumeli, nari eni nyi gu tsakisago khu lisine uwe pfhumu, nyi di vbweta gukheni wu lowe khwepa nya gufute gikungo gya Hamani, mwamana wa Hamedhati, Muagagi, egi a gi lovidego gasi gu mbembisa Vajudha vatshavbo va guromo tigoni gwago gwatshavbo, uwe mufumeli.

⁶Ina nyi nga tiya kharini, na nyi wona libango li hadzago gu dugelela va na gyathu, na? Nyi na tiya kharini gu wona valongo vangu na va gu mbembiswa, gani?”

⁷Mufumeli Asuwero a di phindrula pfhumugadzi Esiteri ni Moridhekayi Mujudha, khuye: “Wonani khenu nyi ningede mandzani ga Esiteri ndranga ya Hamani, uye a hungidwego ngolo, kholu a nga khusedza mandza a wugela Vajudha.

⁸Enu nenu, lovelani Vajudha, khu lina langu eni mufumeli, kha nga idzo mu si wonago na si gu yela gu wonani gwanu, mu bwelo mu vega gifungo nya phera yangu, kholu lidangalila mu lovago la gu lowa khu lina langu eni mufumeli gambe nayo wu si kodzigo gu vbindrugedzwa.”

⁹Khu ngima nya wuraru a gu ngima nya Sivhani khu litshigu nya magumavili na mararu, gu di ranwa vatshavbo valovi va mufumeli, gasi guta lova nayo mayelano khidzo Moridhekayi a nga leletisa khidzo ga Vajudha, gumogo gambe ni dzindruna, ni vamwamangulu, ni vakhongolo nya sipandrengulu, nya mufumo wu nga bani wu khugela Indiya kala Etiyopiya, lizana ni magumavili na livbandre na sivili (127) sipandrengulu; gipandrengulu ni gipandrengulu ni malovelo yaye, lifumbu ni lifumbu ni lidimi lawe; ga Vajudha nugo, gu di lowa khu malovelo yawe ni lidimi lawe.

¹⁰Nayo wakone wu di lowa khu lina la mufumeli Asuwero, li vetwa gitambo nya phera ya mufumeli; mikhwepa yi rumedwa khu myango na va khilede dzikavalu nya mufumo, nya mazambo ngudzu, nya gudugele mavbandroni ya mufumeli.

¹¹Malangalila yaya, mufumeli a di ma rumela ga Vajudha, va nga bani vari ga lidhoropa ni lidhoropa, gasi va gira tshangano va dzi wonela gasi va vhikela womi wawe, va mbembisa ni gu fuvisa ni wevbini tsawa nya vathu ni gipandrengulu wu dongidego matshari gasi gu sasela ni gu mbembisa mapango yawe gumogo ni sanana sawe, va bwelo khavbo va phanga thomba yawe.

¹²Esi si di fanela gu girwa khu tshigu mwedo, ga sipandrengulu satshavbo nya mufumo wa mufumeli Asuwero, a gu litshigu nya likhumi na mararu nya ngima nya likhumi na mivili a gu ngima nya Adhari.

¹³Limbe lidangalila nya khwepa yoyu, li di rumedwa gu tiviswa ga vathu vatshavbo nya sipandrengulu satshavbo, gasi Vajudha ga litshigu lile va khale na va dzi dongisede gu dzi vhikela ga valala vawe.

¹⁴Khu guralo, myango nya guphalalegise mikhwepa yi diya khu givbiredza kha nga gu leletisa ga mufumeli na yi gukhugela dhoropani gwa Suza tsindza nya mufumo, khu mazambo nya makhongolo ngudzu, na va khilede dzikavalu nya mufumo.

¹⁵Khavbo avbo, Moridhekayi, a di duga khu nyumbani nya wufumu na ambade dzingandzu nya wufumu nya livala nya nga la damboni ni guaga, na ambade gihugu nya wufumu nya ndralama ni libhadzi nya giwunguwungu nya seda; lidhoropa la Suza li di kulungela khu gu tsaka.

¹⁶Ga Vajudha gu di manega nari gutsaka, gunengela ni wuzundzo.

¹⁷Ga gipandrengulu gyatshavbo, dhoropani gwatshavbo gu nga bani gu vboha magana ya mufumeli ni nayo waye, gu di manega gutsaka ni gunengela, va gira ni mibuzo nya gutsake; khu kharato, vathu nya mambe mafumbu nya mangi ya mafuni, va di dzi vbindrugedza va khala Vajudha, kholu Vajudha va di gu ningwa ngudzu githawo.