Read gitonga Esiteri 9 Bible Online

Esiteri 9 - gitonga bible

Esiteri 9

¹Khu litshigu nya likhumi na mararu nya ngima nya likhumi na mivili, a gu ngima nya Adhari, a gu litshigu si vbohidego khilo sileletelo ni nayo wa mufumeli, gu di fanede gu tadzisega khu litshigu leli, kholu valala va Vajudha va di gu lirela gu va sasela, aholu Vajudha va di li vbindrugedza li khala nari litshigu nya gu sasele khilo valala vawe.

²Kholu Vajudha vatshavbo, va di tombana madhoropani gwawe ga satshavbo sipandrengulu nya mufumo wa mufumeli Asuwero, gasi gu songa vatshavbo avo va nga vbweta gu va wugela. Mwalo ni moyo a nga bani na gu tiyela Vajudha, kholu mafumbu yatshavbo ma di gu va thava.

³Manganagana yatshavbo nya sipandrengulu, vamwamangulu, ni vathangeli vatshavbo va nga bani va gu thumela mufumeli, va di ema gumogo ni Vajudha khu kotani nya guthave Moridhekayi.

⁴Kholu Moridhekayi a diri ni gikhalo nya gukhugege vbawufumutunu, ni ndruma yaye, yi di phalalegide ni mayigo yatshavbo ya mufumeli; Moridhekayi a diya na gu engedzelana gu dandriswa a mana wugulu nya wukhongolo.

⁵Khu guralo, Vajudha, va di sasela khu matshari valala vawe vatshavbo. Va va mbembisela muphelo, va thuma guhaladza vbatshani ga valala vawe.

⁶Likhokholani ga Suza, Vajudha va sasede ni gu mbembisa livbandre mazana (500) vama,

⁷vafa gumogo ni likhumi sanana sa Hamani, mwamana wa Hamedhati, nala wa Vajudha a gu esi: Parisandrata ni Dhalifone, ni Asipata,

⁸ni Porata, ni Adhaliya, ni Aridhata,

⁹ni Farimasita, ni Arisayi, ni Aridhayi ni Vhayizata.

¹⁰Avo nya likhumi nya sanana sa Hamani, mwamana wa Hamedhati, nala wa va na Judha, va di songetedwa; aholu kha va nga phanga thomba yawe.

¹¹Khu litshigu lolo, va di ta tivisa ga mufumeli, tengo nya vathu va fudego dhoropani ga Suza.

¹²Khavbo avbo, mufumeli a di embela pfhumugadzi Esiteri, khuye: “Likhokholani la Suza, Vajudha va songide livbandre mazana (500) vama ni likhumi sanana sa Hamani; va gu bani va giride kharato Suza, tsindza ahati ga simbe sipandrengulu nya mufumo wangu va na bani va giride kharini? Gasi olu nyi embele, iso u si vbwetago u na si mana, niso u lombago, u na ningwa.”

¹³Esiteri a di hakha, khuye: “Mufumeli wangu, wa gu dzumela nyi ngu lomba gukheni Vajudha va vbanyago omu dhoropani ga Suza, mindru avba gugyago gu girwa kha nga idzo wu rumedwego khidzo nayo wa muhuno, va ya vbayega vbasivbandratunu likhumi sirumbi sa sanana sa Hamani.”

¹⁴Khu guralo, mufumeli a di ganela khuye gu na girege kharato, gu duswa nayo dhoropani ga Suza; khavbo avbo, sirumbi sa sanana sa Hamani si di vbayegwa vbasivbandratunu.

¹⁵Khu hwane, Vajudha va dhoropani ga Suza va di tshangana khu litshigu nya likhumi na mana nya ngima nya Adhari, va songa dhoropani ga Suza, mazana mararu (300) vathu, aholu kha va nga phanga gilo.

¹⁶Vambe Vajudha va nga bani vari ga mambe mayigo ya mufumeli va di tshangana va dzi vhikela womi wawe, va dugelela ga valala vawe: Va songa livbandre na mavili ni livbandre magumi mazana (75.000) nya valala, aholu kha va nga va phanga gilo.

¹⁷Esi si giregide khu litshigu nya likhumi na mararu nya ngima nya Adhari, khu litshigu nya likhumi na mana va di khala va hefemula, litshigu lolo va li vega nari litshigu nya buzo ni gutsaka.

¹⁸Vajudha navo va nga bani vari Suza, va tombanide khu litshigu nya likhumi na mararu ni likhumi na mana; khu litshigu nya likhumi na livbandre va hefemula, va li gira litshigu nya buzo ni gutsaka.

¹⁹Gu giregide gambe kharato ga Vajudha va omu nya sidhoropana ni mitalalani, va giride navo litshigu nya likhumi na mana nya ngima nya Adhari nari litshigu nya gutsake ni mibuzo nya gurumelane dzisagwati khu gyawe.

²⁰Moridhekayi a di lova mahungu yaya, a rumela malangalila ga Vajudha vatshavbo va manegelago ga sipandrengulu satshavbo sa mufumeli Asuwero, sa vbafuvbi ni sa hwindzo.

²¹A va dundrugisa gukhuye gukhugela olu kala ga matshigu matago, matshigu nya likhumi na mana ni likhumi na livbandre nya ngima nya Adhari, guvbwetega ma alakanywe matshigu yaya, ma giredwa mibuzo nya gutsake.

²²Khayo matshigu yaya Vajudha va nga dzi tshudzisago khayo ga valala vawe, khuye ngima, gutshaniseka gwawe ni gulila gu vbindrugedzidego gu khala matshigu nya mibuzo ni gutsaka; va leletiswa gupwani matshigu yaya va ma gira mari ya mibuzo nya gunengele ni gutsaka, ni gu rumelana dzisagwati khu gyawe, ni gu ninga giphaso sisiwana.

²³Khavbo avbo, Vajudha va di dzumela giolovedzo gegi va nga bani va phede gu gi landrisa, egi Moridhekayi a nga bani na va lovede, gi phede gu girega ga gikhati gile.

²⁴ Hamani, mwamana wa Hamedhati, Muagagi, nala wa Vajudha vatshavbo, a di hungide gikungo nya gumbembise Vajudha. A va lolela solo nya Purimi gasi a va mbembisela muphelo.

²⁵Aholu gikhati Esiteri a nga hongola ga mufumeli, uye a di dusa sileletelo si lovidwego, nya gukhuye, gikungo nya guvivbe gi giridwego khu Hamani, a girela Vajudha, gi na thegele gwaye, uye mune. Khavbo avbo, Hamani gumogo ni sanana saye a di tshwedziswa vbasivbandratunu.

²⁶Khigyo givangelo gi nga girago gu matshigu yoyo ma ranwa khu lina nya gupwani “Purimi” na si gukhugela khavbo ga “Puri.”[5] Khu kotani nya iso si nga bani si lovidwe vbakhwepatunu, ni mihimbo va yi wonidego khu mahungu yoyo.

²⁷Vajudha va di tiyisa matshigu yaya ma khala giolovedzo ga avo ni livelego lawe, gumogo ni ga avo va na gu dzi vbindrugedza va khala Vajudha, va na vegedza matshigu yaya ya mavili ma khala matshigu nya gu ma alakanye khu mwaga ni mwaga kha nga idzo gu lovidwego khidzo ni gikhati gyakone.

²⁸Va di hunga gu ma alakanya ni gu ma sayisa matshigu yaya gikhati gyatshavbo, mapangoni gwawe gwatshavbo, ni sipandrengulu sawe satshavbo, ni madhoropani gwatshavbo. Matshigu yaya nya Purimi, gima kha ma na fuva vbakari nya Vajudha, ambari ni vatugulu vawe gima kha va na divala gu ma alakanya.

²⁹Khu guralo, pfhumugadzi Esiteri, nyamahegyane wa Abhiyayili, ni Mujudha Moridhekayi, va di ningwa fanelo nya gulove va tivisa nayo yoyo nya lidangalila nya wuvili nya Purimi.

³⁰A rumela gu poswa malangalila ga vatshavbo Vajudha va vbanyago umo nya lizana ni magumavili na livbandre na sivili (127) sipandrengulu sa mufumeli Asuwero, ni magana nya gurule ni gutumbega.

³¹A va tivisa gu alakanya matshigu yaya nya Purimi ni gu dundruga dzinango dzakone, kha nga idzo Moridhekayi yoyu nya Mujudha, ni pfhumugadzi Esiteri va nga leletisago khidzo Vajudha, va ma vegisa kha nga idzo va vegisago khidzo matshigu nya guhale naya nya gililo, avo gumogo ni vatugulu vawe.

³²Khu guralo, sileletelo sa Esiteri si tiyiside nayo nya Purimi bwelo khavbo si lowa gambe libhukuni.