Read gitonga Ekisodha 10 Bible Online

Ekisodha 10 - gitonga bible

Ekisodha 10

¹PFHUMU Nungungulu a di embela Mosi, khuye: “Indra u ya ganela ni Faro, kholu nyi bangiside monyo waye ni myonyo ya dzindruna dzaye, nyifela gu wonegisa siliwugiso sangu vbakari gwawe,

²gasi uwe ufela gu embeledzela dzindzeveni ga sanana sago ni situgulwana sago edzi nyi nga va gira khidzo Vagipiti ni siliwugiso nyi giridego vbakari gwawe, gasi enu mufela gu dzitini gukhenu Eni kheni PFHUMU Nungungulu.”

³Khu kharati, Mosi ni Aroni va di ya ganela ni Faro, va mu embela, khavo: “PFHUMU Nungungulu wa Vahebheru, a ngu ganela kharati, khuye: “Kala lini na wu gu bomba gu dzi nogisa mbeli gwangu? Diga vathu vangu va hongola gasi va ya nyi thumela.

⁴Kholu wa gu simama gu bomba gu tshula vathu vangu va hongola, mindru nyi na guhula mbasa[4] tigoni gwago gwatshavbo.

⁵Mbasa yi na fenengedza mafuni gwatshavbo ni mafu kha ma na nga wonega. Yi na hodza satshavbo esi si nga tshalago ni esi si nga vbuluga maralala; yi na hodza ni misimbo yatshavbo yi thungago marembweni gwanu.

⁶Dzinyumba dzago ni dzinyumba dza sithumi sago satshavbo ni dzinyumba dza vathu vago vatshavbo va tigoni ga Egipito dzi na tala khu mbasa, eyi nya gu ambari vababe wago ni vakokwe vago gima kha va yi wona, gukhugela guvelegwa kala litshigu la muhuno.” Na vbedzide a di thendregedza a gu khuga mbeli ga Faro.

⁷Khavbo avbo, sithumi sa Faro si di mu embela, khiso: “Kala lini sathu na hi gu tshaniswa khu mwama yoyu? Tshula vathu vava va hongole va ya khozela PFHUMU Nungungulu wawe. Ina khu woni gukhuwe Egipito gu ngu mbemba, gani?”

⁸Khavbo avbo, Mosi ni Aroni va di yiswa nyaluphye mahoni ga Faro. Uye a di va embela, khuye: “Indrani mu ya khozela PFHUMU Nungungulu wanu. Aholu khu vamani va na hongolago?”

⁹Mosi a di khuye: “Ethu hi na hongola gumogo ni madzaha yathu, sikhosane sathu, sanana sathu nya sikhwathana ni esi nya sagadzyana; hi na dzega dzinvuta ni dzimombe dzathu, kholu ha gu ya phasela PFHUMU Nungungulu.”

¹⁰Faro a di ganela gwawe, khuye: “A gu bani nari guralo, PFHUMU Nungungulu a na khale ni enu. Aholu eni kha nyi na mi diga mu hongola ni vagadzi vanu, ni sanana sanu!” Wonani nya gukhenu mu ngu gira gikungo nyambasi gyadi!

¹¹Ahihi, kha gu giregi kharato! Indrani enu vama basi, mu ya girela miphaso PFHUMU Nungungulu, kholu khiso mu si lombidego. Khavbo avbo, va di tutumiswa va khuga mahoni ga Faro.

¹²Khu guralo, PFHUMU Nungungulu a di embela Mosi, khuye: “Khusedza mandza yago vbatshani nya litigo la Egipito gu nata mbasa. Yi na vbuvba yi bela tigoni gwatshavbo ga Egipito, yi ta hodza mwasi watshavbo wa tigoni, ni satshavbo esi si tshidwego khu ndzadzi nya maralala.”

¹³Khavbo avbo, Mosi a di khusedza ndronga yaye vbatshani nya litigo la Egipito, PFHUMU Nungungulu a di wusa phuvbo khu Khugadambo yi furugedza tigoni litshigu rumba, wutshigu ni mihani. Ni dzimindru, phuvbo ya Khugadambo yi di resa mbasa.

¹⁴Mbasa yi di gwela tigoni gwatshavbo ga Egipito, yi ta mbaka khu talo malangani gwatshavbo ya Egipito. Gima yi di si gu manegi mbasa nya yingi nya kharati, gukhugela guhegulani, gambe gima kha yi na nga manega yimbe nya nga kharato.

¹⁵ Mbasa yi di fenengedza mafu yatshavbo ma vbindrugedza ma sivbala hayo phum. Yi di hodza mwasi watshavbo wa tigoni ni mihandro yatshavbo nya misimbo yi nga tshidwago khu maralala. Kha gwa tshala ni lihagane nya gunagane misimboni, mwendro mwasi tigoni gwatshavbo ga Egipito.

¹⁶Khavbo avbo, Faro a di vbiredza gu ranisa Mosi ni Aroni, a ta va embela, khuye: “Nyi ghohide ga PFHUMU Nungungulu wanu ni ga enu.”

¹⁷Olu girani wuhindzi mu nyi tsetselela giwono gyangu gikhati gegi basi, ni gu mu lombelela ga PFHUMU Nungungulu wanu, gukhenu a vbindrisele hwindzo gwangu tungu wowu nya guthise.

¹⁸Mosi a di khuga mbeli ga Faro aya lombelela ga PFHUMU Nungungulu.

¹⁹Khavbo avbo, PFHUMU Nungungulu a di vbindrugedza phuvbo, gu bela phuvbotshani, yi furugedza khu Muhwadambo, yi vbiyela mbasa yatshavbo yi ya guhudwa phwani nya Gufuvile. Kha gwa tshala ni mbasa mweyo basi tigoni gwatshavbo ga Egipito.

²⁰Aholu PFHUMU Nungungulu a di gira Faro a banga hungo ni monyo, a bomba gu tshula va na Israyeli va hongola.

²¹ Khavbo avbo, PFHUMU Nungungulu a di embela Mosi, khuye: “Khusedza mandza yago u nonedza ndzadzini, gu na manega gidema tigoni ga Egipito, gidema nya gu vathu va na gimbila khu gu phuphuthela!”

²²Mosi a di khusedza mandza a nonedza ndzadzini, gidema nya guthise gi di fenengedza tigoni gwatshavbo ga Egipito, hugo phum, gipimo nya matshigu mararu.

²³Vathu va di tandrega gu wonana, mwalo muthu a nga dzi kodzago gukhuga wulanga waye ndrani nya matshigu yoyo ya mararu. Aholu ni evbini va nga bani va guvbanya va na Israyeli gu di manega guwonegela.

²⁴Khavbo avbo, Faro a di rana Mosi a mu embela, khuye: “Indrani mu ya phasela Nungungulu wanu. Aholu mitshambi yanu nya dzinvuta ni dzimombe yi na tshale avba. Sanana sanu mu ngu dzi kodza gu hongola naso.”

²⁵ Aholu Mosi a di khuye: “U na hi ninga gambe uwe sirengo nya miphaso nya guhodzwe ni esi nya guvbiswe hi yelago gu ya gira khiso dzimhamba ga PFHUMU Nungungulu wathu.”

²⁶Sifuyo sathu gambe hi na hongola naso. Kha gu na nga tshala ni girengo gimwegyo basi; kholu khiso hi na si thumisago gu gira khiso miphaso hi khozela PFHUMU Nungungulu wathu. Kala hi gu ya vboha iyoyo, kha hi pimi gilo gukhethu dzimhamba muni hi yelago gu ya mu phasela khidzo. Isoso hi na ya siti basi na hi vbohide.

²⁷Aholu PFHUMU Nungungulu a di bangisa monyo wa Faro, a bomba gu va tshula va hongola.

²⁸Khavbo avbo, Faro a di embela Mosi, khuye: “Khuga mbeli gwangu! Dzi wonele, u nga engedzi gambe, ni litshigu limwedo gu wona khovbe yangu, kholu litshigu lolo u na wonago khovbe yangu, dziti nya gukhuwe u fude.”

²⁹Khavbo avbo, Mosi a di hakha, khuye: “Kha nga u ganedego; gima kha nyi na nga wona gambe khovbe yago.”