Read gitonga Ekisodha 11 Bible Online

Ekisodha 11 - gitonga bible

Ekisodha 11

¹PFHUMU Nungungulu a di embela Mosi, khuye: “Nyi nga na gu resa gambe tshanisa mweyo ga Faro ni ga vathu va Egipito. Khuwo tungu nya guhegise, hwane nya uwo, a na mi tshula mu duga omu. Gikhati a na mi tshulago, a na khu gu mi tutumisa.

²Olu embela vathu gukhuwe, vama vatshavbo ni vanyamayi vatshavbo moyo ni moyo a na lombe ga muakelane waye sombo nya parata ni ndralama.”

³PFHUMU Nungungulu a di gira gu va na Israyeli va mana wuhigo mahoni ga Vagipiti. Mosi abune a diri ni tshivba nya guthavisege tigoni ga Egipito, mahoni ga sithumi sa Faro ni ga vathu va tigoni.

⁴Mosi a di engedza gambe a ganela, khuye: “PFHUMU Nungungulu a ngu ganela kharati, khuye: Ni vbakari nya wutshigu nyi na vbindra khu vbakari ga Egipito.”

⁵Si nafa sanana satshavbo nya matiwula tigoni ga Egipito, gukhugela matiwula ya Faro, wule a na khalago vbagikhalotunu nya wufumu waye, kala matiwula ya githumi nya nyamayi gi tshindrago sivbila ni matiwula yatshavbo nya sirengo.

⁶Gu na bani guri gililo nya gikhongolo ngudzu tigoni gwatshavbo ga Egipito, egi nya gu gima gi di si gu manegi, ne kha gi na manega gambe.

⁷Aholu, ga sanana satshavbo sa Israyeli, kha gu na manega muthu mwendro gifuyo gi na huhudwago khu yimbwa, mufela gu dzitini gukhenu PFHUMU Nungungulu vegide mivbingano, a hambanisa litigo la Egipito ni Israyeli.

⁸Khavbo avbo, sithumi sago satshavbo si na relela si ta gwangu si ta nyi khidzimela, khiso: “Duga uwe ni vathu vago vatshavbo u va thangelago. Hwane nya ugo, nyi na duga.” Khavbo avbo, Mosi a di duga khu ga Faro na garadzegide ngudzu.

⁹PFHUMU Nungungulu a di embela Mosi, khuye: “Faro kha na mi yingisa, gasi siliwugiso sangu si fela gu engedzelana tigoni momu ga Egipito.”

¹⁰Mosi ni Aroni va giride siliwugiso satshavbo sesi mahoni ga Faro, aholu PFHUMU Nungungulu a di bangisa monyo wa Faro, uye a di bomba gu tshula sanana sa Israyeli si duga tigoni gwaye.