Read gitonga Ekisodha 12 Bible Online

Ekisodha 12 - gitonga bible

Ekisodha 12

¹PFHUMU Nungungulu a di ganela ga Mosi ni Aroni tigoni ga Egipito, khuye:

²“Owu ngima wu na bani wuri nya guphele, gwanu, khuwo ngima nya guphele ga migima yatshavbo nya mwaga.

³Embelani tshangano watshavbo wa Israyeli, khenu: Khu litshigu nya likhumi nya ngima yoyu, muthu ni muthu a na duse tshambini wu lumbago ngamo yaye: Nvuta mweyo khu ndranga ni ndranga.

⁴Aholu ndranga yile yi gu na ni vathu nya vadugwana ngudzu nyamba dzi kodza gu vbedza nvutana, yi na patana ni vaakelane waye, gukhedza khu tengo nya vathu, gupima khu guhodza nya muthu ni muthu.

⁵Guvbwetega nvutana mweyo mwendro giphongwana nyamba hasa, nya matune, gya tshambini, nya mwaga moyo basi.

⁶Mu na gi sayisa kala litshigu nya likhumi na mana nya ngima yoyu; tshangano watshavbo wa Israyeli wu na gi songa gupfolani nya lidambo.

⁷Va na dzega novba wakone va todza khuwo mihasimo ya mivili ni vbatshani nya mwanya nya dzinyumba va na hodzelago umo.

⁸Wutshigu wowo, va na hodza nyama nya guvawudwe niloni; va na yi hodza gumogo ni sibaba nyambana mela ni tongwe nya guvave.

⁹Nyama yi nga hodzwi yimbihu; gambe mu nga yi phuli khu mati, aholu yi na vawudwe yatshavbo niloni gumogo ni hungo, mawundru ni mahembe.

¹⁰Mu nga tshiyi gilo kala vbadzimindrutunu. Gwa gu tshala gilogyo, gi vbiseni niloni.

¹¹Mu na hodzani, kharati: Mu na hungide mikeka siwununi gwanu; na mu ambade silato migondroni gwanu, na mu pharide ndronga mandzani, mu na hodza khu guvbiredza. Eyi Phasika ya PFHUMU Nungungulu.

¹²Ni wutshigu wowo, nyi na vbindra tigoni ga Egipito, nyi na songa satshavbo sanana nya matiwula ya tigoni ga Egipito, nya vathu ni sifuyo; nyi na lamula vanungungulu vatshavbo va Egipito. Eni kheni PFHUMU Nungungulu!

¹³ Novba wa mudzinyumbani mu na bani muri umo, wu na khala giwonegiso nya gu mi vhikele: Nya gu wona novba, nyi na vbindra mbeli, enu mu vbuluga ga mhango nya gusonge, gikhati Eni nyi na mbembisago litigo la Egipito.

¹⁴Litshigu lolo li na khala gidundrugiso gwanu; mu na li alakanya khu gu girani buzo nya gurungudze PFHUMU Nungungulu; mu na li vegisa ga mimelana ni mimelana nya situgulwana sanu. Kha nga nayo wu tiyisidwego kala gupindruga.

¹⁵Mu na vbedza livbandre na mavili matshigu na mu gu hodza sibaba nyambana mela. Gukhugela litshigu nya guphele, mu na dusani mela watshavbo dzinyumbani gwanu, kholu muthu watshavbo a na hodzago gibaba nya guthedwe mela, ndrani nya matshigu yatshavbo yaya nya livbandre na mavili, gukhugela litshigu nya guphele kala litshigu nya guhegise, muthu yoyo, a na fuviswe a si lumbi gambe vathu va na Israyeli.

¹⁶Khu litshigu nya guphele, mu na girani tshangano nya guagiswe; mu na gira gambe idzosaye khu eli nya livbandre na mavili. Ga matshigu yaya, mu nga thumi gilo, vbavbandze basi nya gululamisele esi si ninganago gu a hodza muthu; khiso basi mu na si vegisago.

¹⁷Mu na vegisani Buzo yoyo nya Sibaba nyambana mela, kholu khilo litshigu lolo nyi nga dusago mabutho yanu khu tigoni ga Egipito. Mu na alakanya litshigu leli khu melana ni melana, kha nga nayo wu hungidwego kala gupindruga.

¹⁸Gukhugela ni silambo nya litshigu nya likhumi na mana, umo nya ngima nya guphele, kala ni silambo nya litshigu nya magumavili na limwedo, mu fanede gu hodzani sibaba nyambana mela.

¹⁹Matshigu yoyo nya livbandre na mavili, mu nga manegi ni gilo nya guvave mudzinyumbani gwanu, kholu uye a na hodzago gibaba nya guthedwe mela, muthu yoyo, gani muluveli, gani givelegwa gya tigoni, a na fuviswa tshanganoni nya vathu va na Israyeli.

²⁰ Mu nga tshuki mu hodza sibaba nya guthedwe mela. Dzinyumbani gwanu gwatshavbo mu na hodza esi nyambana mela.”

²¹Mosi a di ramba madhota yatshavbo ya Israyeli a ma embela, khuye: “Indrani mu ya hatha nvutana gupima khu dzindranga dzanu, mu paya Phasika.”

²²Mu na dzegani litamo nya hisope[5], mu li nega novbani wu na bani wu thedwe gyomboni, khu novba wa gyomboni, mu na todzani mihasimo ya mivili ya vbamwanyatunu nya nyumba; ni moyo wanu a nga dugi khu nyumbani kala gugya.

²³Kholu PFHUMU Nungungulu a na vbindra gasi gu ya songa Vagipiti, avbo a na wonago novba avbo nya mihasimo nya mwanya, a na vbindra mbeli, kha na nga dzumedzisa Musongi gubela dzinyumbani gwanu a mi songa.

²⁴Khu guralo, mu na sayisani sileletelo sesi, si na bani siri nayo wu hungago enu ni sanana sanu kala gupindruga.

²⁵Na mu vbohide tigoni mule PFHUMU Nungungulu a tumbisidego gu mi ninga, mu na sayisa milayo yeyi kha nga a ganedego.

²⁶Mwa gu wudziswa khu sanana sanu, khiso: “Ahati phaselo yoyu, wa gu tshamusela ginani?

²⁷Enu mu na va hakhani, khenu: Phaso nya Phasika nya gurungudze PFHUMU Nungungulu a nga vbindrago mbeli nya dzinyumba dza sanana sa Israyeli tigoni ga Egipito, litshigu a nga mbembisa Vagipiti a gu vbanyisa dzindranga dzathu.” Khavbo avbo, vathu va di noga va khozela.

²⁸Va na Israyeli va di duga va ya gira esi PFHUMU Nungungulu a nga layago Mosi ni Aroni; va gira kharalo.

²⁹ Ni vbakari nya wutshigu, PFHUMU Nungungulu a di songa matiwula yatshavbo ya Vagipiti, gukhugela matiwula ya Faro, a nga yela guphara ndronga nya wufumu, kala matiwula ya gibotshwa gi khothedwego pasoni, ni matiwula yatshavbo nya sifuyo.

³⁰Faro a di wuga ni vbakari nya wutshigu, uye ni dzindruna dzaye ni vathu vatshavbo va Egipito. Gu di pwala gililo nya gikhongolo ngudzu tigoni ga Egipito, kholu gu diri mwalo ndranga nyambana girumbi.

³¹Khu guralo, na gu ngari wutshigu, Faro a di rana Mosi ni Aroni a va embela, khuye: “Vbiredzani mu duga vbakari nya vathu vangu, enu ni sanana sa Israyeli; Indrani mu ya khozela PFHUMU Nungungulu kha nga gu lomba gwanu.

³²Dzegani gambe dzinvuta dzanu ni mitshambi yanu nya dzimombe, kha nga mu lombidego mu duga! Indrani mu ya nyi kategisa neni.”

³³Vagipiti va di gurumedza vathu gu duga khu tigoni gwawe, kholu va di khavo: “Hi nafa hatshavbothu!”

³⁴Khu guralo, va na Israyeli va di rwala wuguvbi va nga bani va sugide wu si gu thedwi mela va dzega ni sombo sakone nya gusugele umo, va si fumbela khu myendra yawe va rwala magatani gwawe.

³⁵Va na Israyeli va di gira kha nga idzo va nga embedwago khu Mosi. Va di lomba ga Vagipiti sombo nya parata, nya ndralama ni myendra.

³⁶ PFHUMU Nungungulu a di va gira va mana wuhigo mahoni ga Vagipiti, va nga dzumelago gu va ninga esi va nga va lombago. Khu magirelo yoyo va di phanga Vagipiti.

³⁷Sanana sa Israyeli si dugide khu dhoropani ga Ramesi va phara ndzila nya guhongole Sukoti khu mawundru. Va diri gipimo nya livbandre na limwedo magumi mazana nya mazana (600.000) vama nyamba sayela vanyamayi ni sanana.

³⁸Vambe vathu nya vangi nya mambe mafumbu va dugide navo gumogo ni va na Israyeli ni mitshambi nya dzinvuta ni dzimombe nya gutale ngudzu.

³⁹Va di phula sibaba nya wuguvbi wu nga bani wu sugidwe nyamba thedwa mela, va nga rwalago gukhugela Egipito. Kha va thela mela kholu va nga duga khu guvbiredza khu gu tutumiswa tigoni ga Egipito, nyamba mana ni gikhati nya gudongisele dzimbuva nya ndzila.

⁴⁰ Gikhati va na Israyeli va vbedzidego na vari tigoni ga Egipito, gu ningana mazana mana ni magumararu (430) myaga.

⁴¹Litshigu va tshanganisidego mazana mana ni magumararu myaga, khilo litshigu mabutho yatshavbo ya PFHUMU Nungungulu ma dugidego khu tigoni ga Egipito.

⁴²Wutshigu wule PFHUMU Nungungulu a nga pila, a liredza gikhati nya gu va duse khu tigoni ga Egipito. Wutshigu wowo nya gupile gwaye, wu fanede gusayiswa kha nga gialakanyiso gya PFHUMU Nungungulu ga sanana satshavbo sa Israyeli, khu mimelana ni mimelana kala gupindruga.

⁴³Khavbo avbo, PFHUMU Nungungulu a di embela gambe Mosi ni Aroni, khuye: “Eyi khu milayo nya mahodzelo nya Phasika: Muluveli a vbanyago vbakari gwanu, kha yeli gu hodza Phasika.

⁴⁴Aholu khumbi yatshavbo yi rengidwego khu dzitsapawu, yi ngu dzi kodza gu yi hodza mwa gu bani mu yi haniside wugwera.

⁴⁵Gasi muluveli ni muthumegeli, a nga dzumedziswi gu hodza Phasika.

⁴⁶ Yi na hodzedwa nyumbani basi. Kha gu dzumedziswi gu duga vbavbandze ni nyama yakone, gambe u nga fanyi ni girambo gimwegyo nya iyo.

⁴⁷Tshangano watshavbo nya sanana sa Israyeli, wu na sayisa nayo yoyu.

⁴⁸Aholu muluveli u vbanyago naye a gu dzina gu gira nayo nya Phasika ya Nungungulu, a na phele khu gu hana wugwera uye ni vama vatshavbo va ndrangani gwaye, khavbo a na dzi kodzago gu hidzimela a hodza Phasika; kholu a na wonwa kha nga givelegwa gya tigoni gwanu; aholu oyu a ngamba hana wugwera, gima kha dzumedziswi gu yi hodza.

⁴⁹“Gu na bani guri nayo moyo basi wu vegidwego ga givelegwa gya tigoni ni ga valuveli va vbanyago vbakari gwanu.”

⁵⁰Sanana satshavbo sa na Israyeli si di gira kharalo. Va di landrisa satshavbo iso PFHUMU Nungungulu a nga layago Mosi ni Aroni, va gira kharato.

⁵¹Khilo kamwe litshigu lolo PFHUMU Nungungulu a dusidego sanana sa Israyeli tigoni ga Egipito, gukhedza khu mabutho yawe.