Read gitonga Ekisodha 14 Bible Online

Ekisodha 14 - gitonga bible

Ekisodha 14

¹Khavbo avbo, PFHUMU Nungungulu a di embela Mosi, khuye:

²“Embela va na Israyeli va bwelela hwane, vaya zumba vbafuvbi ni lidhoropa la Pi-Hayiroti, vbakari ni vbakari nya eno khu Migidholi eno khu yiphwa, na va gu wona Bhahali-Zefoni. Gu vbwetega mu tsitsa mitshatsha yanu bambe nya yiphwa.

³Kharato, Faro a na pimisa monyoni gwaye, khuye: Va na Israyeli va ngu legalega ni litigo, giwula gi va randrede.

⁴Khavbo avbo, Eni nyi na bangisa monyo wa Faro ni mabutho yaye yatshavbo nya nyimbi, khavbo va na dzitigo Vagipiti gukhavo Eni kheni PFHUMU Nungungulu. Avo va di gira kharato.

⁵Avbo Faro, mufumeli wa Egipito a embedwego gupwani vathu va thavide, uye gumogo ni vathangeli nya dzinyimbi dzaye va di hambanega mapimo va wugela va na Israyeli, va di khavo: “Ginani hi giridego, hi nga tshulago va na Israyeli va hongola, va diga gu hi thumela?”

⁶Faro a di dongisela kareta yaye nya nyimbi, a duga ni mabutho yaye nya nyimbi.

⁷A di dzega livbandre na limwedo mazana (600) dzikareta nya guhathwe ni dzimbe dzikareta dzatshavbo nya nyimbi dza tigoni ga Egipito, gu di khilede dzindrena umo nya idzo.

⁸Kholu PFHUMU Nungungulu a di bangisa monyo wa Faro, mufumeli wa Egipito, afela gu landra sanana sa Israyeli si nga bani si gimbila khu gutshudwa khu gyandza nya tshivba.

⁹Aholu, Vagipiti, gumogo ni dzikavalu dzatshavbo dza Faro, dzikareta dzaye, vakhileli vaye nya dzikavalu ni mabutho nya dzinyimbi, va di duga va landra va na Israyeli, va ya va mana na va zumbide bambe nya yiphwa, vbafuvbi ni Pi-Hayiroti, na va gu wona mbeli Bhahali-Zefoni.

¹⁰Avbo Faro a nga hidzimelago, va na Israyeli va di khusa maho va khedzisa, va wona Vagipiti na va gu va landra. Khavbo avbo, va na Israyeli va di tedwa khu hwanga nya wukhongolo ngudzu. Va womba huwa ga PFHUMU Nungungulu.

¹¹Va di embela Mosi, khavo: “Ina gu diri mwalo marowo tigoni ga Egipito gu kala u hi dusa gasi hi ta fela giwulani momu, gani? Khu ginani u hi giredego esi nya gu hi duse tigoni ga Egipito?

¹²Ina khandriso esi hi nga gu embela tigoni ga Egipito gani, gikhati hi nga khethu: Hi dige hi thumela Vagipiti. Kholu a diri tshukwana gu thumela Vagipiti guvbindra gu ta fela giwulani.”

¹³Khavbo avbo, Mosi a di embela vathu, khuye: “Mu nga thavi; tiyani mu na wonani esi PFHUMU Nungungulu a na girago gasi gu mi vbanyisa muhuno; kholu Vagipiti mu va wonago muhuno olu, gima kha mu na nga va wona gambe kala gupindruga.

¹⁴PFHUMU Nungungulu a na mi dwanela, eno mu na degula henu kape.

¹⁵Khavbo avbo, PFHUMU Nungungulu a di embela Mosi, khuye: “Khu ginani u ta lilago gwangu? Embela va na Israyeli va bela ndzilani va gimbila.

¹⁶Uwe khusedza ndronga yago u thawuludza mandza yago vbatshani nya yiphwa, u yi kabanisa khu vbakari, gasi sanana sa Israyeli, si kodze gu gimbila phwani funguni nya gubange.

¹⁷Eni nyi na bangisa myonyo ya Vagipiti, va fela gubela va va landra, nyi na pwala gidhumo khu kotani nya esi nyi na girago ga Faro ni ga mabutho yaye yatshavbo nya nyimbi, ni dzikareta ni vakhileli nya dzikavalu.

¹⁸Nyi na pwala gidhumo khu kotani nya esi nyi na girago ga Faro, ni dzikareta dzaye ni vakhileli nya dzikavalu; khavbo Vagipiti va na dzitigo nya gukhavo kheni PFHUMU Nungungulu.”

¹⁹Khavbo avbo, Ngilozi ya Nungungulu yi nga bani yi thangide mbeli nya mabutho ya Israyeli, yi di vbindrugedza yita va landra khu hwane gwawe. Lipfhi li di khuga khu mbeli gwawe lita khu hwane gwawe.

²⁰Li dita khala khu vbakari li hambanisa mabutho ya Vagipiti ni aya ya sanana sa Israyeli. Lipfhi li di gira gidema phuvbo mwedo, yimbe phuvbo, li gu wenengedza wutshigu. Khu guralo, ni wutshigu watshavbo kha ma dzi kodza gu hidzimelana vbafuvbi.

²¹Khavbo avbo, Mosi a di thawuludza mandza vbatshani nya yiphwa, PFHUMU Nungungulu a di reda yiphwa ni vbakari nya wutshigu, khu tshivba nya phuvbotshani. A di bangisa yiphwa, mati ma di kabanega khu vbakari.

²² Sanana sa Israyeli si di bela khu vbakari nya yiphwa na yi bangide, mati ma gu gira libhiyo khu nyambade ni nyamudye gwawe.

²³Vagipiti va di va landra khu hwane: Dzikavalu dzatshavbo dza Faro, ni dzikareta dzaye nya nyimbi ni vakhileli nya dzikavalu, va di bela navo kala vbakari nya yiphwa.

²⁴Khu mambagugya, PFHUMU Nungungulu khu ndrani nya nilo ni lipfhi, a di wona dzinyimbi dza Vagipiti a gu wusa pfilupfilu vbakari gwawe.

²⁵A di emisa marodha nya dzikareta dzawe, ma sara gugimbila. Khavbo avbo, Vagipiti va di ganela, khavo: “Hongoleni hi thave va na Israyeli, kholu PFHUMU Nungungulu a ngu ema navo a wugela Vagipiti.”

²⁶PFHUMU Nungungulu a di embela Mosi, khuye: “Khusa mandza u veta yiphwa gasi mati ma wuye ma ta langaladza Vagipiti ni dzikareta dzawe nya nyimbi ni vakhileli nya dzikavalu.”

²⁷Khavbo avbo, Mosi a di khusa mandza a veta yiphwa. Na wu khuga wuronga nya guge, mati ya phwani ma di wuya wulanga waye. Vagipiti khavo va gu ma thava, gasi ulo avo va gu ma khinga. PFHUMU Nungungulu a di mbembisa Vagipiti vbakari nya yiphwa.

²⁸Kholu gikhati ma widego mati, ma dita khubhunyeta dzikareta, ni vakhileli nya dzikavalu, ma gu langaladza mabutho yatshavbo nya nyimbi ya Faro ma nga belago phwani ma landra sanana sa na Israyeli. Mwalo ni moyo basi a nga tshalago.

²⁹Aholu sanana sa na Israyeli si di tshatuga khu mawundru vbakari nya yiphwa nya gubange na si gu giredwa libhiyo khu mati, khu nyamudye ni nyambade.

³⁰Khu guralo, litshigu lolo, PFHUMU Nungungulu a di vbanyisa sanana sa na Israyeli mandzani ga Vagipiti. Israyeli a di wona Vagipiti na va fude funguni wa phwani.

³¹Israyeli wonide gambe tshivba nya yikhongolo yi nga girwago khu PFHUMU Nungungulu gasi gupala Vagipiti. Vathu va di thava PFHUMU Nungungulu va khodwa gwaye ni ga githumi gyaye Mosi.