Read gitonga Ekisodha 15 Bible Online

Ekisodha 15 - gitonga bible

Ekisodha 15

¹ Khavbo avbo, Mosi ni sanana sa na Israyeli va di emba ndzimo yeyi nya gurungudze PFHUMU Nungungulu, khavo: “Nyi na embelela ga PFHUMU Nungungulu a wonegisidego gidhumo gyaye nya gikhongolo: Rinyide phwani kavalu ni mukhileli wakone.

² PFHUMU Nungungulu khuye tshivba ni ndzimo yangu. Khuye muvbanyisi wangu. Khuye Nungungulu wangu, nyi na mu rungudza; Nungungulu wa vababe vangu; khu guralo, nyi na mu khusedza.

³PFHUMU Nungungulu ndrena nya tshivba, Lina laye khuye PFHUMU Nungungulu.

⁴Dzamiside phwani dzikareta nya nyimbi dza Faro gumogo ni mabutho yaye nya nyimbi; ni dzindrena dzaye nya guhathwe dzi dzamide nondrwani nya Yiphwa nya Gufuvile.

⁵Va fenengedzidwe khu mavimbi, va gu rika nondrwani kha nga giwindri.

⁶Nyamudye wago, Uwe PFHUMU Nungungulu, gu wonegiside tshivba; nyamudye wago, Uwe pfhumu Nungungulu, gu phalalegiside valala.

⁷Khu wufumu wago nya wukhongolo, U ngu pfhungumula avo va gu wugelago, U rumela likhulo lago li va vbisa kha nga mavivi nya mwasi,

⁸khu furugedzo wa dzithonvuni gwago, mati ma di wungedzedwa; mavimbi ma di ema ma gira libhiyo; nondrwa wu di banga vbakari nya yiphwa.

⁹Nala a di khuye: Nyi na va tutumisa, nyi na va mola nyi va phanga; hefemulo wangu wu na khura khu avo, nyi na homola litshari langu nyi va mbembisa; nyi na va songa khu mandza yangu.

¹⁰Aholu Uwe u di furugedza khu phuvbo yago, yiphwa yi ta va fenengedza. Va di rika kha nga rikiso nondrwani nya mati nya guete.

¹¹Khu mani a fananago nago, Uwe PFHUMU Nungungulu vbakari ga vanungungulu vatshavbo? Khu mani nya gungangamele gu fanana ni Uwe, a fanedego gu thawa ni gu rungudzwa? U giride siliwugiso.

¹²U thawuludzide libogo lago la nyamudye; va gu midzwa khu mafu.

¹³Khu wuwadi wago u thangede vathu vago U va dzegisidego, U di va hetedza khu tshivba yago U va yisa wulangani gwago nya guage.

¹⁴Mayigo ma dipwa esi, ma gu ndrendremela; vathu va Filisitiya va di tala khu hwanga;

¹⁵Vafumeli va Edhomi va di thuruga; dzindrena dza Mowabhi dzi di tala khu rerema; vathu vatshavbo Vakhanani va di vbela tshivba.

¹⁶Va di modwa khu hwanga ni gundrendremela khu kotani nya tshivba nya libogo lago. Va emide va banga kha nga siwindri, kala va vbindra vathu vago, Uwe PFHUMU Nungungulu! Kala va vbindre vathu u va dzegisidego.

¹⁷Uwe u na va bedza tigoni, u ya va vega mugigomoni gi gu lumbago; wulanga u va dongisedego gu ya va vbanyisa avbo, Uwe PFHUMU Nungungulu, wulanga nya miphaso wu giridwego khu mandza yago, Uwe PFHUMU Nungungulu.

¹⁸PFHUMU Nungungulu a na fuma gikhati gyatshavbo kala gupindruga.”

¹⁹Kholu dzikavalu dza Faro gumogo ni dzikareta dzaye nya nyimbi ni vakhileli nya dzikavalu va bede pwani. PFHUMU Nungungulu a di reda mati ya phwani ma ta va khubhunyeta, kholu sanana sa Israyeli si di gimbila khu mawundru lilondreni nya gubange, vbakari ni vbakari nya yiphwa.

²⁰Khavbo avbo, Miriyamu, nyamayi nya muprofeti, ndruye wa Aroni, a di phara tandrandra mandzani, vanyamayi vatshavbo va di duga vbavbandze ni mitandrandra yawe, va hana.

²¹Miriyamu a di va thulela ndzimo, khuye: “Embani ga PFHUMU Nungungulu, kholu khu lisine khongolo; mbembiside phwani kavalu ni mukhileli wakone.”

²²Khu hwane Mosi a di thangela va na Israyeli, va khuga khu phwani nya Gufuvile, va bela giwulani gya Suri. Va vbedzide matshigu mararu na va gu gimbila mugiwulani nyamba mana mati.

²³Va di vboha Mara, aholu kha va dzi kodza gu sela mati ya Mara, kholu ma di guvava. Khu kotani nya isoso wulanga wule wu di ranwa pwani Mara.

²⁴Vathu va di ngurangura va wugela Mosi, khavo: “Hi na sela ginani?”

²⁵Mosi a di lomba ga PFHUMU Nungungulu, PFHUMU Nungungulu a di mu nonedza simbo. Uye a di wu rinya matini. Mati ma di vbindrugedza ma tshamba. Khavbo vbale PFHUMU Nungungulu a va ningidego milayo ni sileletelo, khavbo gambe a va lingidego, a va embela, khuye:

²⁶“Wa gu yingela lito la PFHUMU Nungungulu khu monyo wago watshavbo, u thuma ogu gu lulamidego mahoni gwaye; wa gu yingela milayo ni sileletelo saye satshavbo, gima kha nyi na rumela gwago mitungu nya nga eyi nyi tshanisidego khiyo Vagipiti, kholu Eni kheni PFHUMU Nungungulu nyi gu vbanyisago.”

²⁷Khavbo avbo, va di vboha wulanga wu ranwago pwani Elimi, gu nga bani guromo avbo likhumi na sivili sifefe nya mati ni livbandre na mavili magumi migindru; va di tsitsa avbo mitshatsha yawe vbafuvbi ni mati.