Read gitonga Ekisodha 18 Bible Online

Ekisodha 18 - gitonga bible

Ekisodha 18

¹Jetro, muphasi nya mhamba wa Medhiyani, sade wa Mosi, a dipwa silo satshavbo esi Nungungulu a giridego ga Mosi ni ga vathu vaye va na Israyeli; edzi PFHUMU Nungungulu a dusidego khidzo Israyeli khu tigoni ga Egipito.

²Jetro, sade wa Mosi, a di dzega Zipora, ngadza Mosi, a nga bani a mu rumede gu ya khala gaya gwawe,

³gumogo ni sanana saye sa sivili, gimwegyo lina laye nya gupwani khu Gerisoni, kholu a di khuye: “Eni nyi mu luveli tigoni ga vane,”

⁴ni gimbe nya gupwani khu Eliyezeri, kholu a di khuye: “Nungungulu wa babe wangu a nyi phaside a nyi vbulugiside gu songwa khu litshari la Faro.”

⁵Jetro, sade wa Mosi, ni mwangadzi wa Mosi ni sanana saye, va di endrela Mosi mugiwulani a nga bani a ghovide umo, gigomoni ga Nungungulu.

⁶Uye a di embela Mosi, khuye: “Eni kheni sade wago Jetro, nya guta gwago gumogo ni mwangadzi wago ni sanana sago sa sivili.”

⁷Khavbo avbo, Mosi a di duga a khinga sade waye, a khidzima a mu bhejari. Va ambisana mahungu khu gurula, va bela tshatshani gwa Mosi.

⁸Mosi a di embeledzela sade waye satshavbo esi PFHUMU Nungungulu a nga girago ga Faro ni Vagipiti khu kotani ya Israyeli, sigaradzo satshavbo va si manidego ndzilani, edzi PFHUMU Nungungulu a va vbulugisidego khidzo.

⁹Jetro a di nengela khu satshavbo esi nya sadi PFHUMU Nungungulu a giredego va na Israyeli, khu gu va tshula mandzani ga Vagipiti.

¹⁰Jetro a di khuye: “A na rungudzwe PFHUMU Nungungulu a mi vbulugisidego mandzani ga Vagipiti ni mandzani ga Faro, Uye a tshudego vathu mandzani ga Vagipiti.

¹¹Olu nyi ngu dziti gukheni PFHUMU Nungungulu khongolo guvbindra vanungungulu vatshavbo, kholu a va phalalegiside ga esi va nga bani va dzi gugumugisa khiso ni dzihanyi.”

¹²Khavbo avbo, Jetro, sade wa Mosi, a di ningela miphaso nya guvbiswe ni dzimhamba ga Nungungulu. Aroni ni madhota yatshavbo ya Israyeli ya dita hodza gumogo ni sade wa Mosi mbeli ga Nungungulu.

¹³Khu mindru gakone, Mosi a di khala phathani a lamula vathu. Vathu va di ema mbeli ga Mosi gukhugela ni dzimindru kala gupfolani na lidambo.

¹⁴Sade wa Mosi na wonide satshavbo iso a nga bani a gu gira ga vathu, a di mu wudzisa, khuye: “Ginani u girago ga vathu, khu ginani vathu va emago mbeli gwago gukhugela dzimindrudzile kala gupfolani nya lidambo?”

¹⁵Khavbo avbo, Mosi a di hakha sade waye, khuye: “Kholu vathu vava va guta gwangu gu ta wudzisa Nungungulu.”

¹⁶Muthu a gu bani nari ni mahungu ni muthu kwawe, va guta gwangu nyi ta va lamula, nyi va tivisa sileletelo sa Nungungulu ni milayo yaye.

¹⁷Sade wa Mosi a di mu embela, khuye: “Khandridzo edzi u girago.

¹⁸Kholu u na garala uwe, ni vathu vava u gu navo va na garala navo, kholu thumo wowu wu lemede ngudzu gu wu rwala uwe wenga.

¹⁹Olu, nyi yingise; nyi na gu ninga wusingalagadzi, Nungungulu a na khale ni uwe! Uwe u na khala muemeli nya vathu mbeli ga Nungungulu, u bikela mahungu yawe ga Nungungulu.”

²⁰U na va hevbudza sileletelo ni milayo, u va nonedza ndzila va fanedego gu gimbila khiyo, ni mithumo va yelago gu yi thuma.

²¹Uwe hatha vbakari nya vathu vatshavbo, vama nya gukari nya vadi ni lisine, va thavago Nungungulu, vama va tumbegidego, va si dzumeligo gurengeledwa, u va vega kha nga vathangeli nya likhumi mazana, nya lizana, nya livbandre magumi ni nya likhumi.

²²Avo va na lamula vathu vava gikhati gyatshavbo. Mahungu yale nya makhongolo, va na ma tisa avbo gwago, aholu aya mambe yatshavbo nya madugwana va na ma vbedza avo, kharati u na vbungula rwalo wago, avo va na hengela nago gu wu rwala.

²³Wa gu gira kharati, nu gu leletedwa khu Nungungulu, uwe u na mana tshivba nya guthume u ya mbeli, gambe vathu vava va na bwelela magaya gwawe na va manide gurula.

²⁴Mosi a di yingisa magana ya sade waye, a gu gira satshavbo esi a nga embedwago khuye.

²⁵Mosi a di hatha vbakari nya vathu vatshavbo va na Israyeli, vama nya vadi a va emisa mbeli nya vathu kha nga vathangeli nya likhumi mazana, nya lizana, nya livbandre magumi ni nya likhumi.

²⁶Avo va di lamula vathu gikhati gyatshavbo; mahungu nya gugaradze va di ma yisa ga Mosi, aholu aya mambe mahungu yatshavbo nya guvbevbuge va di ma vbedza avo.

²⁷Khavbo avbo, Mosi a di vbanganana ni sade waye, Jetro a di bwelela a hongola tigoni gwaye.