Read gitonga Ekisodha 19 Bible Online

Ekisodha 19 - gitonga bible

Ekisodha 19

¹Khu ngima nya wuraru, hwane nya gu sanana sa Israyeli na si dugide khu tigoni ga Egipito, khu litshigu nya guphele nya ngima yoyo furi, si di vboha giwulani gya Sinayi.

²Na va khugide khu Refidhimi, va di vboha giwulani gya Sinayi, va gu zumba avbovbo, Israyeli a di zumba mbeli nya gigomo.

³Mosi a di lita kala vbafuvbi ni Nungungulu. Khu mugigomoni PFHUMU Nungungulu a di mu rana, a mu embela, khuye: “U na ganela esi ga nyumba ya Jakobe, u tivisa esi ga sanana sa Israyeli, khuwe:

⁴Enu mu si wone esi nyi giridego ga Vagipiti, ni edzi nyi mi rwadego khidzo khu dzimbapi nya lighama nyi gu mi wuyisa avbo gwangu.

⁵Olu mwa gu yingisani lito langu, mu vegisa gidzumeledzwano gyangu, mu na khala thomba yangu vbakari nya mayigo yatshavbo, kholu litigo latshavbo la gu lumba Eni.

⁶ Enu mu na khalani litigo nya vaphasi nya mhamba, litigo li agidego. Aya khu magana u na ya embelago sanana sa Israyeli.”

⁷Mosi a dita ramba madhota nya libandla a gu va embeledzela magana yaya yatshavbo, kha nga idzo PFHUMU Nungungulu a nga mu rumago khidzo.

⁸Vathu vatshavbo va di hakha khu gumogo, khavo: “Satshavbo esi PFHUMU Nungungulu a ganedego, ethu hi na si thuma.” Mosi a di ya bikela ga PFHUMU Nungungulu magana ya vathu.

⁹PFHUMU Nungungulu a di embela Mosi, khuye: “Wona, Eni nyi nguta nyi ta manana nago ndrani nya lipfhi nya gusivbale, gasi vathu va fela gupwa gikhati nyi na ganelago nago, va fela gu gu tumba gikhati gyatshavbo.” Kholu Mosi a di khade a embeledzela PFHUMU Nungungulu mahungu nya vathu vaye.

¹⁰PFHUMU Nungungulu a di embela gambe Mosi, khuye: “Indra ga vathu u ya va agisa muhuno ni mindru; va na handze guambala gwawe.

¹¹Va na khale na va dzi dongisede litshigu nya wuraru, kholu khu litshigu nya wuraru, PFHUMU Nungungulu a na tshiga na gu wonwa khu vathu vatshavbo vbatshani nya gigomo gya Sinayi.

¹²Gambe u na vegela vbingano vathu, wu dzundrulugelago gigomo, u va embela, khuwe: Dzi woneleni, mu nga gweli gigomoni, mwendro gu kuha basi dzibambe gakone. Kholu muthu watshavbo a na kuhago gigomo a na songwa.

¹³Mwalo a na mu kuhago khu mandza, aholu a na ya khu gu pfarwa khu giwindri, mwendro gu hekhwa khu matshari. Gani girengo, gani muthu kha na vbanya. Na gu wombwa pundru[13] khu gulaphisa vathu va na gwela gigomoni.”

¹⁴Khavbo avbo, Mosi a di tshiga khu gigomoni aya ga vathu. Uye a di agisa vathu, avo va di ya handza dzingandzu dzawe.

¹⁵A di embela vathu, khuye: “Dzi dongiseleni litshigu nya wuraru. Vbayegani malawu, mu nga tshangani ni nyamayi.”[14]

¹⁶ Khu litshigu nya wuraru, ni mambagugya, gu di dzuma mabara ni gulasa, vbatshani nya gigomo gu fenengedzwa khu lipfhi nya gusivbale, ni gudzuma nya gukhongolo nya pundru. Vathu vatshavbo va nga bani va romo lizumboni va di ndrendremela.

¹⁷Mosi a di dusa vathu khu lizumboni va hongola ga Nungungulu va ya emisedwa vbavbatshi nya gigomo.

¹⁸Gigomo gyatshavbo gya Sinayi gi di fenengedzwa khu wutshi, kholu PFHUMU Nungungulu a di tshiga avbo vbakari nya nilo. Wutshi wakone wu di lita wu tuvigela vbatshani kha nga wa vbagikhotunu, ni gigomo gyatshavbo gi di ndrendremela ngudzu.

¹⁹Pundru wu di engedzelana gu dzuma wu dzungurula khu tshivba. Mosi a di ganela; Nungungulu a hakha khu ndrani nya libara.

²⁰PFHUMU Nungungulu a di tshiga vbatshani nya gigomo gya Sinayi, PFHUMU Nungungulu a di rana khu tshokatunu nya gigomo, Mosi a di lita.

²¹PFHUMU Nungungulu a di embela Mosi, khuye: “Relela u ya laya vathu gukhuwe va nga hidzimeli va tsemakanya vbingano khavo va guta wona PFHUMU Nungungulu; gu ngafa vathu nya gutale ngudzu vbakari gwawe.

²² Ambari vaphasi nya mhamba navo va hidzimelago ga PFHUMU Nungungulu, va na phele khu gu dzi agisa gasi PFHUMU Nungungulu a si va songi.”

²³Mosi a di ganela ga PFHUMU Nungungulu, khuye: “Vathu kha va dzi kodzi gu lita gigomoni ga Sinayi, kholu uwe u hi layide khu tshivba, khuwe: Vega mivbingano yi dzuwulugela gigomo, mu gi agisa.”

²⁴PFHUMU Nungungulu a di khuye: “Tshiga. U na lita gambe uwe gumogo ni Aroni. Aholu vaphasi nya mhamba ni vathu va nga tutumeli gu lita ga PFHUMU Nungungulu, gasi nyi si va songi.”

²⁵Khu guralo, Mosi a di relela a hongola ga vathu aya va embeledzela satshavbo sesi.