Read gitonga Ekisodha 21 Bible Online

Ekisodha 21 - gitonga bible

Ekisodha 21

¹Esi khu sileletelo u na si vegago vbakari gwawe:

²Wa gu renga khumbi nya Muhebheru, yi na gu thumela livbandre na moyo myaga, aholu khu mwaga nya livbandre na wuvili, yi na tshulega basi nyamba livba gilo.

³Ya gu bani yi dzude avbo gwago na yiri yonga, yi na duga gambe yonga. Aholu, ya gu bani yi dzude ni mwangadzi, yi na duga ni mwangadzi waye.

⁴A gu bani mune waye a yi ningide nyamayi, nyamayi yoyu a gu velega sanana nya sikhwathana mwendro sagadzyana, nyamayi ni sanana sa gu lumba mune waye, khumbi nya mwama yi na duga yonga.

⁵Aholu khumbi ya gu ganela, khiyo: “Eni nyi ngu mu gola mune wangu, mwangadzi wangu ni sanana sangu, kha nyi dzini gutshulega nyi hongola.”

⁶Khu guralo, mune waye a na yi resa mbeli ga Nungungulu,[15] a yi hidzimisa vbafuvbi ni lidimba mwendro avbo nya hasimo; khavbo avbo, mune waye a na yi pola ndzeve khu ndrombo.[16] Khumbi yeyi yi na mu thumela kala gupindruga.

⁷Mwama a gu rengisa gyanana gyaye nya gyagadzyana a gi gira khumbi, igyo kha gi na nga duga kha nga idzo dzi dugago khidzo dzikhumbi nya vama.

⁸Gya gumba tsakisa mahoni ga mune waye gu gi dzega gi khala mwangadzi waye, uye a na dzumedzisa gukhuye gi dzegiswa; aholu kha na dzumedziswa gu gi rengisa ga va nya mayigo, kholu kharato gu bani a gi hosede ngudzu.

⁹Aholu a gu gi ningela ga mwanaye nya mwama, a na gi phare kha nga gyanana gyaye nya gyagadzyana.

¹⁰A gu gi dzegela mumbe nyamayi, a nga vbunguleli guhodza ga oyu nya guphele ambari guambala gwaye, ambari dzifanelo dzaye nya wugadzi.

¹¹ Mune waye a gumba gi girela silo sesi sa siraru, nyamayi a ngu kodza gu khuga nyamba livba dzitsapawu.

¹² Uye a bayisago muthu, a mu songa, fanede gu songwa nuye.

¹³ Aholu a gu bani na sa gira kha gwenye, nari a di ningedwa mandzani gwaye khu Nungungulu, nyi na gu vegela wulanga a yelago gu thavela avbo.

¹⁴Aholu muthu a gu wugela muthu kwawe khu khorosa a gira gikungo nya gu mu songe, muthu yoyo ambari na sihade vbagiluvelotunu gwangu, mu dzege aya songwa.[17]

¹⁵Uye a bayisago babe mwendro mayi waye, fanede gu songwa.

¹⁶ Uye a bago muthu a mu rengisa, mwendro aya manwa naye ndrangani gwaye, fanede gu songwa.

¹⁷ Uye a valago babe waye mwendro mayi waye, fanede gu songwa.

¹⁸vathu vavili va gu dwana, moyo waye a bayisa kwawe khu giwindri mwendro khu suku, nyamba mu songa, aholu a dwala,

¹⁹a gu kala a khala tshukwana a kodza gutshetela khu ndronga, wule a nga mu bayisago, kha na ningwa nandru; aholu a na mu livba matshigu yale a luzidego khu gu khala vbadawutunu khu gudwala nyamba thuma, fanede gambe gu mu thumisa kala a halawuga.

²⁰Muthu a gu bayisa khumbi yaye nya mwama mwendro nya nyamayi khu simbo, va gu fela mandzani gwaye, va na phodzedwa;

²¹aholu a gu vbanya litshigu limwedo mwendro mavili, kha na phodzedwa kholu uye dzitsapawu dzaye.

²²Va gu dwana vathu va bayisa nyamayi nya mimba, ya gu ghoheka mimba yaye, aholu uye a sifi, a na livbwa tengo wu na lombwago khu mwama waye, nivbo yoyo wu na livbedwa mbeli ga valamuli.

²³Aholu a gufa nyamayi wule a na livbiswa womi khu womi,

²⁴liso khu liso, likhwaha khu likhwaha, gyandza khu gyandza, ngondro khu ngondro,

²⁵gu vbiswa khu gu vbiswa, gilondra khu gilondra, phandza khu phandza.

²⁶Muthu a gu veta khumbi yaye nya nyamayi mwendro nya mwama a yi pola liso, a na yi tshula yi hongola khu kotani nya liso laye.

²⁷A gu dusa likhwaha la khumbi yaye nya mwama mwendro nya nyamayi, a na yi diga yi hongola na yi tshulegide khu kotani nya likhwaha laye.

²⁸Mombe ya gu ghumula muthu nya mwama mwendro nya nyamayi, yi mu songa, mombe yoyo, yi na pfarwa khu siwindri, ni nyama yakone kha yi na hodzwa; aholu mune mombe kha na ningwa nandru.

²⁹Aholu mombe yoyo, a gu nari giolovedzo gyaye nya gughumulele vathu, ni mune wakone na embedwe, aholu a si theli kota khu gu yi segela, ya gu songa mwama mwendro nyamayi, mombe yi na pfarwe khu siwindri, ni mune wakone nuye a na songwe.

³⁰A gu dzumedziswa guya khu gu livba, a na ningela tengo watshavbo va na mu lumbago gasi gu dzegisa womi waye.

³¹Mombe ya gu songa gyanana nya gikhwathana mwendro nya gyagadyana, yi na girwa idzo gu rumwago khu nayo yoyu.

³²Mombe ya gu ghumula khumbi nya mwama mwendro nya nyamayi, gu livbwa tengo nya magumararu dzisekeli nya parata ga mune khumbi, mombe yi na pfarwa khu siwindri.

³³Muthu a gu tula nambo, mwendro a gu kemba liphala a si li segi, ya gu thega umo mombe mwendro buru,

³⁴mune nambo a na livba khu dzitsapawu ga mune girengo, aholu girengo gi fudego gi na lumba uye.

³⁵Mombe ya muthu ya gu paya yi songa mombe ya mumbe muthu, va na rengisa eyi nya guvbanye va gu kabana tengo wakone, ni eyi nya gufe gambe va na kabana.

³⁶Aholu mombe yile ya gu bani yi tidwa khu gale gupwani yi ngu payela sirengo sikwawe, aholu mune wakone a si theli kota khu gu yi hungelela, a na livba mombe khu mombe, eyi nya gufe yi na lumba uye.