Read gitonga Ekisodha 22 Bible Online

Ekisodha 22 - gitonga bible

Ekisodha 22

¹Muthu a guba mombe mwendro nvuta a songa mwendro gu rengisa, a na livba livbandre dzimombe khu mombe mweyo ni dzinvuta dzina khu nvuta mweyo.

²Mbafa ya gu manwa na yi gu pandra nyumba yiba, ya gu songwa avbovbo, mwalo nandru wule a yi songidego.

³Aholu ya gu songwa na gugide, novba waye wu fanede gu livbwa. Mbafa yi fanede gu livba; ya gu hamuga nya gulivbe khigyo, yi na rengiswe, gasi gu livba wuvafa waye.

⁴Girengo gi bidwego gya gu manwa mandzani ga mbafa na gi nga gu vbanya, gani mombe, gani buru, gani nvuta, mbafa yi na livba guvili.

⁵Muthu a gu havisa sifuyo saye thembweni nya sivbila mwendro nya miwuvha, aholu a diga sirengo si ya hodza thembweni ga vane, a na hatha esi nya sadi a fanyidego thembweni gwaye aya livba khiso.

⁶Muthu a gu rotha nilo a vbisa likhabi, luvbya li thapela li ya vbisa dzimbewu thembweni ga vane, oyu a nga vbisa luvbya fanede gu livba satshavbo si ghohekidego khu kotani nya luvbya.

⁷Muthu a gu vega dzitsapawu mwendro silo saye ga mumbe muthu, silo sesi si bidwa ndrangani mule, mbafa ya gu manwa yi na livba guvili.

⁸Ya gumba manwa mbafa, mune ndranga a na reswa a ta sambanya mbeli ga Nungungulu gukhuye khaba silo sa muthu kwawe.

⁹Ga gu manega gu dwanisana khu silo nya gukari, nya nga mombe, buru, mwendro gifuyo gya phandroni, guambala mwendro ni gimbe gilo gi dzimedego, mahungu ma na bikedwa mbeli ga Nungungulu, wule a na ningwago nandru khu Nungungulu a na livba guvili muthu kwawe.

¹⁰Muthu a gu fiseta muthu kwawe buru, mombe mwendro nvuta ni gimbe gifuyo a gu lelisa, girengo gyogyo gifa mwendro gu fanyega litundru, mwendro gu dzegwa nyamba wonwa khu muthu,

¹¹avbovbo gu na vbwetega va vavili va ya mbeli ga PFHUMU Nungungulu, va ya sambanya gasi gu tidwa pwani khaba gifuyo gya muthu kwawe; mune gifuyo a na dzumela gusambanya gogu, kha na mu livbisa gilo.

¹²Aholu gya gu bani gi bidwe ndrangani gwaye, uye a na livba ga mune girengo.

¹³Gya gu bani giri gi di hodzwa khu sirengo nya likhabi, oyu a lelisidwego a na resa sipandre si tshadego gasi gu ta nonedza a tiyisa lisine laye. Kharato, kha na nga livba egi gi hodzidwego khu sirengo nya likhabi.

¹⁴Muthu a gu lomba girengo ga muthu kwawe, gi ta fanywa litundru mwendro gufa, nari mwalo vbafuvbi mune wakone, a na livba.

¹⁵Aholu mune girengo a gu bani nari vbafuvbi, kha na livbwa. A gu bani nari a di lombisa khu dzitsapawu, a na livbwa tengo va nga dzumelanago.

¹⁶Mwama a gu sengedzela gyagadzyana nya likendzi gi si gu tumbiswigo, a gu lala nagyo a na dusa gyuma nya lowolo a gi dzega gi khala mwangadzi waye.

¹⁷ Aholu babe wa nyamahegyane a gu bomba gu mu ninga gyanana gyaye, mwama a na livba khu dzitsapawu tengo nya gyuma wu ninganago lowolo nya makendzi.

¹⁸U nga digi ndroyi yi vbanya.

¹⁹ Muthu watshavbo a lalago ni gifuyo a na songwe.

²⁰ Oyu a phaselago vambe vanungungulu vbavbandze ga PFHUMU Nungungulu basi, a na fuviswe.

²¹ U nga vengeli muluveli a vbanyago vbafuvbi gwago mwendro gu mu tshanisa, kholu enu nenu mu diri valuveli tigoni ga Egipito.

²²Mu nga tshanisi noni mwendro khulungu.

²³Kholu mwa gu va tshanisa, avo va womba huwa avbo gwangu, Eni nyi na va yingisa gulila gwawe;

²⁴Likhulo langu li na vbisa, nyi mi songa khu matshari, gasi vagadzi vanu va khale dzinoni ni sanana sanu si khala niso dzikhulungu.

²⁵ Wa gu lombisa dzitsapawu moyo nya gisiwana a lumbago vathu vangu u vbanyago naye u nga giri khu gu mu livbisa bhindzu, u nga lombisi khu gufela gukhuwe dzi velegele.

²⁶ Muthu kwanu a gu gu pharisa libhadzi laye gasi gu livba nandru nya gukari a gu nawo avbo gwago, u fanede gu li bweledza gwaye na li si gu pfoli lidambo,

²⁷kholu khigyo basi gifenengelo a gu nagyo gasi guvhikela girame mili waye. A gu lala a na fenengela ginani? A gu lila avbo gwangu Eni nyi na mu yingisa, kholu Eni nyi ngu pwela wusiwana vathu.

²⁸ U nga nyenyi PFHUMU Nungungulu wago, gambe u nga vali muthangeli wanu.

²⁹U nga hweli gu dusa hwengo nya mihandro ya thembweni gwago ni ya gikhwatini gwago. U na nyi ninga matiwula nya sanana sago.

³⁰U na gira idzosaye ni matiwula nya mombe yago ni dzinvuta dzago. Matiwula ma fanede gu khala livbandre na mavili matshigu ni mayi waye, khu eli nya livbandre na mararu matshigu, mu na ta gira ningelo avbo gwangu.

³¹ Enu mu vathu mu agisedwego Eni. Gima mu nga hodzi nyama nya girengo gi songidwego khabini khu sirengo nya likhabi. Nyama nya guralo rinyelani dzimbwa.