Read gitonga Ekisodha 23 Bible Online

Ekisodha 23 - gitonga bible

Ekisodha 23

¹ U nga swayi mahungu ma gu mwalo lisine. Mahunguni, u nga patani ni muthu nya guvivbedwe khu monyo, u gira wufakazi nya malipha.

²U nga dzi bedzi guvivbani khu gu landra talo nya vathu, gambe vbamahungutunu u nga emi ni va nya gutala u diga lisine.

³Ambari gu emela gisiwana u diga lisine.

⁴Wa gu mana mombe ya nala wago mwendro buru yaye na yi khulugide yi dzimela, u na yi vbwelegedza ga mune waye.

⁵ Wa gu wona buru ya oyu a gu vengago na yi thegide khu gu lemedwa, u nga mu digi ekha, aholu u fanede gu mu phasa gu yi wusa yi ema.

⁶U nga wegedzi mahungu ma lulamidego ya gisiwana gyanu huwoni nya gulamule mahungu.

⁷Thava gusingedza malipha mumbe muthu. U nga songi muthu a gu mwalo nandru, ni oyu a lulamidego, kholu Eni gima kha nyi na nga tshula muthu a gu na ni nandru nyi mu gira muthu nya gululame.

⁸ U nga dzumeli gu rengeledwa khu dzisagwati, kholu sagwati yi ngu sega maho ya ava va wonago, yi wuya yi wegedza mahungu phathani ya ava va lulamidego.

⁹ U nga tshanisi muluveli a vbanyago tigoni gwanu, uwe u ngu gu pima gwadi guvbanya ga muluveli tigoni ga vane, kholu uwe nuwe u khade muluveli tigoni ga Egipito.

¹⁰U na lima lithembwe lago gipimo nya livbandre na moyo myaga u hengeledzela dzimbewu dzago.

¹¹ Aholu khu mwaga nya livbandre na mivili u na diga lithembwe lago li hefemula, nyamba li lima. Sisiwana sa tigoni gwanu ni sirengo sa khabini si na hodza esi si tshalago. U na gira idzosaye khu lithembwe lago nya miwuvha ni eli nya miolivha.

¹² Umo nya livbandre na limwedo matshigu u na thuma mithumo yago, aholu khu litshigu nya livbandre na mavili u na diga gu thuma, u hefemula; gu na hefemula mombe yago, buru yago, gyanana gya khumbi yago ni muluveli a vbanyago tigoni gwanu va na hefemula navo.

¹³Mu na sayisa magana yatshavbo nyi mi embedego. Malina ya vambe vanungungulu ni gu ma khumbuga basi mu nga ma khumbugi. Ma nga tshuki ma pwala maganani gwanu.

¹⁴Khu mwaga mu na gira guraru mibuzo nya gu nyi rungudze.

¹⁵U na vegisa Buzo nya Sibaba nyambana Mela. U na vbedza livbandre matshigu na wu gu hodza sibaba nyamba thedwa mela, kha nga idzo nyi gu layidego khidzo, ga gikhati gi vegidwego ga ngima nya Abhibhi; kholu khuwo u dugidego khu tigoni ga Egipito. Ni moyo a nga hidzimeli vbafuvbi gwangu nari liphanga mandzani gwaye.

¹⁶U na vegisa gambe nango nya Buzo nya guvbwere dzimbewu nya guphele nya thumo wago, nya sile u yadego thembweni gwago; ni buzo nya guvbwere dzimbewu guvbelani nya mwaga, gikhati u vbwerago dzimbewu dza thembweni gwago.

¹⁷Vama vatshavbo va tigoni gwago va na ta dzi bikela mbeli ga PFHUMU Nungungulu nya Tshivba Yatshavbo guraru khu mwaga.

¹⁸U nga ningeli novba nya mhamba yangu khu sibaba nya guthedwe mela. Mafura nya nyama nya buzo wangu ma nga lali wutshigu kala vbadzimindrutunu.

¹⁹ U na resa Nyumbani ga PFHUMU Nungungulu wago matiwula nya mihandro nya guhegule nya litigo lago. U nga phuli phongo ndrani nya mahwe ya mayi waye.

²⁰Wona, nyi na rumela Ngilozi yangu yi gu thangela mbeli gasi yi gu sayisa ndzilani ni gu gu bedza wulangani nyi gu dongisedego.

²¹Thela kota khu ngilozi yangu, u yingisa lito laye. U nga yi tshanisi kholu iyo kha yi na timisela guvivba gwanu, kholu yi na thuma khu lina langu.

²²Aholu wa gu yingisa lito laye, u landrisa satshavbo esi yi gu embelago, Eni nyi na bani nyiri nala wa valala vago, nyi gu dwanela ga ava va gu wugelago.

²³Kholu Ngilozi yangu yi na gimbila mbeli gwago yi na gu bedza tigoni ga Vaamori, ga Vahiti, ga Vaperezi, ga Vakhanani, ga Vahevhi ni ga Vajebhusi, nyi na va fuvisa vathu vava.

²⁴U nga khidzimi u khozela vanungungulu wawe, u nga pimedzeli gu gira kha nga idzo va girago avo. Aholu uwe u na va songa vatshavbo, u pandrelela sifananiso sawe satshavbo.

²⁵Khozelani PFHUMU Nungungulu wanu, Eni nyi na kategisa guhodza gwanu ni mati yanu; nyi na vbedza madwali vbakari gwanu.

²⁶Tigoni gwanu mwalo nyamayi a na gu ghohekedwago khu mimba, mwendro gu khala gyumba nyamba velega, Eni nyi na engedzela tengo nya matshigu nya guvbanye gwago.

²⁷Nyi na rumela mbeli gwago tshivba yangu nya guthavise nyi wusa pfilupfilu vbakari nya vathu vatshavbo u na belago khu mayigoni gwawe, ni valala vago vatshavbo va na thava va tutuma mbeli gwago.

²⁸Nyi na rumela gambe dzimifi mbeli gwago dzi ya tutumisa Vahevhi, Vakhanani ni Vahiti.

²⁹Kha nyi na nga va tutumisa khu mwaga moyo basi, gasi litigo li si khali giwula, ni sirengo nya likhabi si si velegelani si tala si gu wugela.

³⁰Nyi na va tutumisa mbeli gwago khu vbadugwana vbadugwana kala uwe u gu velegelana u dzega litigo.

³¹Nyi na pandra mivbingano yago gukhugela Yiphwa nya Gufuvile kala Yiphwa ya Vafilistiya, ni gukhugela giwulani kala gu vboha tsongoni wa Ewufrate; kholu nyi na vega mandzani gwago vathu va vbanyago tigoni, uwe u na va tutumisa mbeli gwago.

³²U nga giri pwanano navo, mwendro ni vanungungulu vawe.

³³Avo va nga vbahi tigoni gwago, gasi va si gu kutsedzeli gu nyi ghohela; kholu wa gu khozela vanungungulu vawe, isoso khu lisine si na bani siri naphwi gwago.