Read gitonga Ekisodha 28 Bible Online

Ekisodha 28 - gitonga bible

Ekisodha 28

¹Vbakari nya sanana sa Israyeli, rana ndriyago Aroni ni sanana saye va hidzimela avbo gwago, u na va hatha va khala vaphasi nya mhamba mbeli gwangu. Aroni ni sanana saye a gu esi: Nadhabhi, Abhiyu, Eleyazari ni Itamari.

²U na girela ndriyago Aroni dzingandzu nya miphaso gasi gu mu ninga wuzundzo ni wumburi.

³U na embela gambe vameseri vatshavbo nyi va ningidego guti ni liphuvbo nya wugengeli, va sona guambala gwa Aroni, gasi a agisedwa thumoni nya wuphasi nya mhamba mbeli gwangu.

⁴Guambala va yelago gu sona khogu: Gikhweso gya vbakhanatunu, efodhe, ni gifenengelo nya gulaphe ni ngandzu nya gulugedwe khu wumburi, gihugu ni keka. Khugo ogu guambala va na girelago Aroni ni sanana saye, gasi va ema mbeli gwangu va gira wuphasi nya mhamba.

⁵Va na thumisa ndralama ni mwendra nya livala la damboni, ni giwunguwungu, ni owu nya guvbyuge, ni wuluva nya gulugedwe nya wumburi.

⁶Efodhe yi na girwa khu ndralama ni mwendra nya livala la damboni, ni mwendra nya giwunguwungu ni owu nya guvbyuge nya gulugwe khu wumeseri.

⁷Yi na bani yiri ni dzingodzi dzimbili nya guvbaragedze khidzo magatani dzi na sonwago wubambe nya maphuvbo ya mavili gasi yi hungwa khidzo.

⁸Ni keka wu na hungago efodhe wu yi tiyisa, gu vbwetega nya mwendra wamoyo, wu na lugwa idzosaye wu khala lifumbu limwedo ni efodhe; wu na lugwa khu ndralama, livala la damboni, nya gufuvile nya giwunguwungu ni matshakafula nya wumburi.

⁹U na dzega siwindri sivili nya wumburi nya Onekisi u lova avbo malina ya sanana sa Israyeli.

¹⁰Livbandre na limwedo malina u na ma lova avbo nya giwindri gimwegyo, ni mambe nya livbandre na limwedo avbo nya gimbe giwindri, gulandra khu longoloko nya guvelegwe gwawe.

¹¹U na lova avbo nya siwindri sa sivili malina ya sanana sa Israyeli, khu edzi vameseri va kodzago khidzo gu khandra milowo avbo nya siwindri nya lisima, siwindri sa sivili si na tshanganiswa si hungwa khu sikhweletedzo nya ndralama.

¹²U na hungelela siwindri sesi sa sivili dzingodzi dza magatani nya efodhe gasi si khala gialakanyiso ga sanana sa Israyeli, esi Aroni a na vbagarago magatani malina yawe gikhati atago mbeli ga PFHUMU Nungungulu, kha nga gidundrugiso.

¹³U na gira gambe sikhweletedzo sivili nya ndralama.

¹⁴U na gira dziketane dzimbili nya ndralama nya guhutwe dzi fanana ni ngodzi, mu dzi hungelela vbasikhweletedzotunu sa sivili.

¹⁵U na gira gambe gikhweso gya vbakhanatunu gi yelago gu ambadwa gikhati nya gulamudwe mahungu, va na gi sona gwadi va gi mburisela khu mwendra nya nga oyu va giridego khuwo efodhe; u na gira khu ndralama; ni muvala nya nga wa damboni, ni giwunguwungu ni guvbyuga; wu na lugwa gwadi wu mburisedwa khu thumo nya wumeseri.

¹⁶Mwendra wu na lapha idzosaye maphuvbo yatshavbo ya mana, wu fumbwa khu vbakari kha nga gikhweso. Gulapha ni guanama gupima khu gulapha nya mandza.

¹⁷U na namegedzela dzindzarara dzina nya siwindri nya lisima, u si fodzisela avbo nya mwendra wowu. Ndzarara nya guphele u na namega rubi, topazi, karibhuli ni esmeralidha;

¹⁸ndzarara nya wuvili, u na namega jaspe, safira ni dhayimane;

¹⁹ndzarara nya wuraru, u na namega opala, agata ni ametista;

²⁰ndzarara nya wu na, u na namega krizolito, onikisi ni jasiperi. Siwindri satshavbo sesi si na yingwa si tiyiswa khu ndralama,

²¹gu na bani guri likhumi na sivili siwindri gukhedza khu malina ya sanana sa Israyeli. Avbo nya giwindri ni giwindri gu na lowa lina limwedo nya yale nya likhumi na mavili mahundzu ya na Israyeli. Malina ma na khu gu khandrwa kha nga gifungo.

²²U na gira gambe dziketane khu ndralama nya guhutwe dzi lugwa kha nga karara dzi hunga gikhweso gya vbakhanatunu.

²³U na gira gambe masindra mavili nya ndralama u ma vega mu dzitshokhani dza dzimbili nya gikhweso gya vbakhanatunu.

²⁴Mikarara ya mivili nya ndralama u na yi hunga vbamasindratunu ma guromo dzitshokhani nya gikhweso gya vbakhanatunu;

²⁵U na hunga dzitshokha dza dzimbili nya dziketane umo nya sikhweletedzo sa sivili nya ndralama, u ta dzi hunga khu mbeli, ni dzingodzi magatani nya Efodhe.

²⁶U na gira gambe masindra mavili nya ndralama u ma vega dzitshokhani dza dzimbili nya gikhweso gya vbakhanatunu khu phuvbo ga ndrani gu khedzanago ni Efodhe.

²⁷U na gira gambe mambe masindra mavili nya ndralama u ma sona avbo nya dzingodzi dza dzimbili dza magatani nya Efodhe khu vbavbatshi, mbeli gwaye vbafuvbi ni avbo dzi patanago khu vbatshani nya keka nya Efodhe.

²⁸Gu na tshanganiswa masindra nya gikhweso ni aya nya Efodhe ma gu hungwa khu ngodzi nya livala la damboni, gasi gikhweso gya vbakhanatunu gi tiyiswa nyamba tshulega vbakekatunu nya Efodhe.

²⁹Avbo Aroni a na belago Wulangani nya Guage a na rwala khanani gwaye, malina ya sanana sa Israyeli ma lovidwego vbagikhwesotunu nya mahungu, gasi gu khala gialakanyiso nya gupindruge mbeli ga PFHUMU Nungungulu.

³⁰U na vega gambe gikhwesoni nya mahungu “Urimi” ni “Tumimi”[19] dzi fela gu manega avbo nya khana ya Aroni, gikhati aya belago mbeli ga PFHUMU Nungungulu; khu magirelo yoyo, Aroni a na rwala monyoni gwaye, gulamula ga sanana sa Israyeli mbeli ga PFHUMU Nungungulu kala gupindruga.

³¹Mwendra watshavbo nya guambadwe ni Efodhe, u na wu luga khu dzikhindra nya livala nya nga la damboni.

³²Wu na podwa vbakari kha nga gikatawu gasi gu bedza khavbo hungo, thamoni gwatshavbo gu na komedwa gasi gu si pferugi.

³³Khu mahegiso ga vbavbatshi, u na wu sonela maroma nya livala nya nga la damboni, ni giwunguwungu ni guvbyuga ni vanyangendre nya ndralama u dzuwulugisa ngongola yatshavbo nya mwendra.

³⁴Si na landrelana, kharati: Nyangendre nya ndralama gu handzamedza liroma; mumbe nyangendre nya ndralama gu handzamedza liroma kala gu enedza ngongola yatshavbo kala vbavbatshi nya mwendra.

³⁵Aroni a na wu ambala gasi guya thuma thumo waye nya wuphasi nya mhamba, gudzuma nya vanyangendre gu na pwala gikhatini a belago Wulangani nya Guage, mbeli ga PFHUMU Nungungulu, ni gikhati a dugago, gasi uye a sifi.

³⁶U na pfhula libhareti nya ndralama nya guhutwe u khandra avbo milowo kha nga idzo gu girwago avbo nya dziphera, khuwe: “A phasedwego ga PFHUMU Nungungulu.”

³⁷Libhareti leli u na li hunga giwombotunu nya gihugu khu keka nya livala nya nga la damboni.

³⁸Li bani li romo vbagiwombotunu ga Aroni, khu magirelo yaya, Aroni a na rwala hungoni gwaye sighoho si girwago khu sanana sa Israyeli gikhati si dusago miningelo yawe nya miphaso. Li na khala giwomboni ga Aroni gikhati gyatshavbo a naya emago mbeli ga PFHUMU Nungungulu, gasi sanana sa Israyeli si mane wuhindzi mahoni ga PFHUMU Nungungulu.

³⁹U na luga ngandzu ni gu gira gihugu khu mwendra nya gumbure, u gira keka wu lugidwego khu thumo nya wumeseri.

⁴⁰Sanana sa Aroni u na si girela dzingandzu ni mikeka ni sihugu nya wuzundzo kha nga giwonegiso nya wudhumo ni wumburi.

⁴¹Khu guambala gogo u na ambagisa ndriyago Aroni ni sanana saye; u va agisela gasi va ema thumoni nya wuphasi nya mhamba mbeli Gwangu.

⁴²U na va girela gambe sikhunyula nya mwendra gasi gu fenengedza wumbwiri wawe gukhugela giwununi kala dzikhungumudzini.

⁴³Aroni ni sanana saye va na si ambala gasi va kodza gubela Tshatshani nya Tshangano, va kodza gu hidzimela vbagiluvelotunu va ta thuma Makhuvini nya Guage, gasi va si mani nandru vafa. Owu wu na bani wuri nayo nya gupindruge ga Aroni ni situgulwana saye.