Read gitonga Ekisodha 29 Bible Online

Ekisodha 29 - gitonga bible

Ekisodha 29

¹“Gasi gu va wumbela gu khala vaphasi nya mhamba va nyi thumela, u na gira, kharati: U na kasa gimombyana mwendro dzinvuta dzimbili nyamba hasa,

²u dzega gambe sibaba nyambana mela, ni sikatyana nyambana mela nya gusugwe ni mafura, ni dzifiyoso nyamba thedwa mela nya guthedwe mafura. Satshavbo u na si gira khu wuguvbi nya tirigu.

³U na si thela gitundruni u resa gasi guta gira ndruwo, u ningela gumogo ni gimombyana ni dzinvuta dzimbili.

⁴U na rana Aroni gumogo ni sanana saye va hidzimela kala Tshatshatunu nya Tshangano, u na va handza khu mati.

⁵U vbedza, u dzega guambala u ambagisa Aroni, ngandzu ni gifenengelo nya Efodhe, ni gikhweso gya vbakhanatunu u na gi hungago khu keka nya Efodhe.

⁶U na mu ambagisa gihugu hungoni gwaye, vbagihugutunu u vega hari nya guage nya libhareti.

⁷U na dzega mafura nya gutodze u guhula hungoni gwaye, u mu todza.

⁸U na ruma sanana saye si hidzimela niso, u ta si ambagisa dzingandzu.

⁹U na hunga Aroni ni sanana saye khu mikeka u va ambagisa sihugu. Thumo nya wuphasi nya mhamba wu na lumba avo khu nayo kala gupindruga. Khidzo kharati u na wumbelago Aroni ni sanana saye.”

¹⁰U na vbindrisa gimombyana gita mbeli nya Tshatsha nya Tshangano. Aroni ni sanana saye va na handzega mandza hungoni nya gimombyana.

¹¹U na paya gimombyana mbeli ga PFHUMU Nungungulu, nyangwani nya Tshatsha nya Tshangano.

¹²U na naganisa nyala yago novbani nya gimombyana u todza giluvelo, u vbaladza novba watshavbo vbavbatshi nya giluvelo.

¹³U na dzega gambe mafura yatshavbo aya mafumbelago mahembe, ni gifumbelo nya libindri, ni dzitshwa dza dzimbili gumogo ni mafura yakone u si vbisa satshavbo vbatshani nya giluvelo.

¹⁴Aholu nyama nya gimombyana, ni lidowo lakone, ni swanyi wakone u na ya si vbisa vbavbandze nya lizumbo. Eyi i mhamba nya guhandze sighoho.

¹⁵Khu hwane u na dzega nvuta mweyo, Aroni ni sanana saye va na yi handzega mandza hungoni.

¹⁶Nu yi payide, u na dzega novba wakone u wu guhula maphuvbo yatshavbo nya giluvelo.

¹⁷U na pilela nvuta khu sipandre, na wu handzide mahembe ni mazondzo yakone u si vega khu sipandre ni hungo.

¹⁸U na vbisa nvuta yatshavbo vbatshani nya giluvelo. Eyi i mhamba nya miphaso nya guvbiswe ya PFHUMU Nungungulu, phaselo nya mahema nya gusalalegise gasi gu rungudza PFHUMU Nungungulu.

¹⁹Khu gulandrela u na dzega eyi yimbe nvuta, Aroni ni sanana saye va na yi handzega mandza hungoni.

²⁰U na yi sindza u vbedza, u dzega novba wakone u todza khuwo mahegiso nya ndzeve ya nyamudye ya Aroni ni dzindzeve dza nyamudye dza sanana saye, ni nyala yaye nya nyaghonwe nya gyandza gya nyamudye, ni nyala nya nyaghonwe nya ngondro wa nyamudye ya moyo ni moyo nya avo. Novba wutshalago u na wu vbaladza maphuvboni gwatshavbo nya giluvelo.

²¹U na dzega novba wu na bani wuri vbatshani nya giluvelo ni mafura nya gutodze u mitedzela Aroni ni guambala gwaye, ni sanana saye ni guambala gwawe navo. Khu kharato, Aroni ni guambala gwaye a na agiswa; sanana saye ni guambala gwawe si na agiswa niso.

²²U na dusa mafura nya nvuta, ngila ni mafura ma fumbelago mahembe ni gifumbelo nya libindri ni dzitshwa dza dzimbili ni mafura ma dzi fumbelago ni litumbi la nyamudye, kholu nvuta nya guwumbele vaphasi nya mhamba.

²³U na dzega gambe gitandri nya sibaba nyambana mela, u dusa gibaba gimwegyo ni kati moyo ni fiyoso mweyo, si guromo mbeli ga PFHUMU Nungungulu.

²⁴Satshavbo sesi u na si vega mandzani ga Aroni ni mandzani ga sanana saye, u si ndziwitela mbeli ga PFHUMU Nungungulu.

²⁵Khu hwane u na si dzega gambe mandzani gwawe u si vbisa vbagiluvelotunu, vbatshani nya phaso nya guvbiswe si gira mahema nya gunungele gwadi mbeli gwa PFHUMU Nungungulu; phaso nya guvbisedwe PFHUMU Nungungulu.

²⁶U na dzega khana nya nvuta yi nga thumiswago gu wumbela Aroni, u yi ndziwitela gasi gu yi bikela ga PFHUMU Nungungulu, khigyo gi na bani giri gipandre gyago.

²⁷Ga nvuta yile yi nga thumiswago gu wumbela Aroni ni sanana saye, u na agisa khana yi nga ndziwitedwa, ni libogo li nga ndziwitedwa, khu gyaye ni gyaye gikhati,

²⁸Aroni ni sanana saye va na ningwa nyama yeyi khu nayo wu na hungago va na Israyeli kala gupindruga, kholu khigyo gipandre gi ningedwago ga vaphasi nya mhamba, egi sanana sa Israyeli si na kasago avbo nya miphaso yawe nya wuhengeli; khiyo mhamba yawe va duselago PFHUMU Nungungulu.

²⁹Guambala ga Aroni ogu gu agisidwego, gu nata thumiswa khu sanana saye hwane gwaye, gasi va ta ambala litshigu va na wumbedwago ni gu todzwa.

³⁰Gyanana gyaye egi gi na mu tshikedzago thumoni gwaye nya wuphasi nya mhamba hwane gwaye, egi gi na belago Tshatshani nya Tshangano gasi gu ya khozela Makhuvini nya Guage, gi na ambala dzingandzu dzodzo, livbandre na mavili matshigu.

³¹U na dzega nvuta yi payidwego gasi gu wumbela vaphasi nya mhamba u phula nyama yakone wulangani wu agidego.

³²Aroni ni sanana saye va na hodza nyama nya nvuta ni sibaba si na bani siri gitandrini, vbamwanyatunu nya Tshatsha nya Tshangano.

³³Kharati, avo va na hodza esi si thumisidwego gu handza sighoho sawe gikhati va wumbedwego ni gu todzwa; valombo kha va yeli gu hodza silo sesi kholu si agide.

³⁴Ya gu tshala nyama ni sibaba nya guwumbedwe kala mindru, u na si vbisa si nga hodzwi, kholu si agide.

³⁵U na gira ga Aroni ni sanana saye satshavbo kha nga idzo nyi gu leletedego khidzo. Thumo nya gu va wumbele wu na dzega livbandre na mavili matshigu.

³⁶Khu litshigu ni litshigu u na paya gimombyana u gira phaso nya mhamba nya guhandze siwono, gudiga nya edzi dzimbe dzimhamba. Khu phaso yoyu nya guhandze mabango, u na agisa giluvelo, khu hwane u gi todza mafura gasi gu gi agisela thumo.

³⁷ Thumo nya guagise giluvelo wu na dzega livbandre na mavili matshigu, u na gi agisa; gi khala gilo gi agidego ngudzu; ni gevbini gi na kuhago giluvelo gi na agiswa.

³⁸Eyi khu miphaso u yelago gu ningela vbagiluvelotunu; sinvutana sivili nya mwaga moyo, matshigu yatshavbo kala gupindruga.

³⁹U na paya nvutana mweyo vbadzimindrutunu, yimbe nvutana u yi paya gupfolani nya lidambo.

⁴⁰Khu nvutana mweyo, u na ningela ndrengo nya wuguvbi wu sugidwego khu pimo nya gigasi nya mafura nya miolivha ni gikombe nya wadwa nya dziuvha u gira phaso nya gusedwe.

⁴¹Gupfolani nya lidambo u na paya nvutana nya wuvili u yi ningela gumogo ni phaso nya wuguvbi ni wadwa nga idzosaye ni eyi nya dzimindru, u girela PFHUMU Nungungulu phaso nya mahema nya gunungele gwadi.

⁴²Owu wu na bani wuri phaso nya guvbiswe, wu yelago gu ningedwa khu enu matshigu yatshavbo ga situgulwana sanu satshavbo. Wu na ningedwa vbamwanyatunu nya Tshatsha nya Tshangano, mbeli gwa PFHUMU Nungungulu, avbo nyi nata mananago nanu, nyi ganela nago.

⁴³Khuwo wulanga nyi na ta mananago avbo ni sanana sa Israyeli; wulanga wowo wu na agiswa khu wudhumo wangu.

⁴⁴Nyi na agisa Tshatsha nya Tshangano ni giluvelo; nyi na agisa Aroni ni sanana saye gasi va nyi khozela thumoni nya wuphasi nya mhamba.

⁴⁵Nyi na vbanya vbakari nya sanana sa Israyeli, nyi na bani nyiri Nungungulu wawe.

⁴⁶Va na nyiti gukhavo kheni PFHUMU Nungungulu wawe, nyi va dusidego khu tigoni ga Egipito, nyi fela gu ta vbanya vbakari gwawe; eni kheni PFHUMU Nungungulu wawe.