Read gitonga Ekisodha 3 Bible Online

Ekisodha 3 - gitonga bible

Ekisodha 3

¹Mosi a di gu havisa dzinvuta dza sade waye Jetro, muphasi nya mhamba wa Medhiyani. Tshigu mwedo a di ghula dzinvuta a guya hwindzo ngudzu, mugiwulani kala a vboha gigomoni ga Horebhi;[2] gigomo gya Nungungulu.

² Avbovbo, Ngilozi ya PFHUMU Nungungulu yi di dzi wonegisa gwaye vbakari nya malavbelavbe nya nilo mugipopwanani. Mosi a di ema a khedzisela gipopo gi nga bani gi khondra, aholu gi di si tsagami.

³A di ganela khu monyoni gwaye, khuye: “Nyi nga gu hidzimela nyi fela gu nga wona gwadi gisamadziso gegi nya gikhongolo; khu ginani gipopo gi si tsagamigo khu nilo?”

⁴Avbo PFHUMU Nungungulu a nga wona gukhuye Mosi a ngu hidzimela gasi guta wona gwadi, a di mu rana khu vbakari nya gipopo, khuye: “Mosi! Mosi!” Uye a di hakha, khuye: “Nyi womo avba.”

⁵Nungungulu a di engedza, khuye: “U nga hidzimeli avba. Tshula silato migondroni gwago, kholu wulanga u gandrago litigo li agidego.”

⁶A di engedza gambe a mu embela, khuye: “Eni kheni Nungungulu wa vababe vago, Nungungulu wa Abrahama, Nungungulu wa Isaki ni Nungungulu wa Jakobe.” Mosi a di fenengedza khovbe yaye kholu, a di thava gu wona Nungungulu.

⁷PFHUMU Nungungulu a di engedza, khuye: “Khu lisine nyi wonide gutshaniseka ga vathu vangu va tshaniswago tigoni ga Egipito, gambe dzihuwa dzawe dzi vbohide dzindzeveni gwangu khu kotani nya vatshanisi vawe. Nyi ngu wuti wuvi wawe.

⁸Khu guralo, nyi tshigide gasi guta va tshudzisa mandzani ga Vagipiti, nyi va dusa tigoni momo, nyi va yisa tigoni nya gunone, nya guaname, tigoni gu gogago mahwe ni wulombe, litigo va vbanyago umo Vakhanani, Vahiti, Vaamori, Vaferezi, Vahevhi ni Vajebhuzi.

⁹Kholu dzihuwa dza sanana sa Israyeli dzi vbohide kala eno Gwangu, gambe nyi wonide tshanisa nya yikhongolo va giredwago khu Vagipiti.

¹⁰Olu delu, nyi na gu rumela ga Faro, gasi u ya dusa vathu vangu, va na Israyeli khu tigoni ga Egipito.”

¹¹Khavbo avbo, Mosi a di embela Nungungulu, khuye: “Kheni mani eni, nya gukala nyi ya mahoni ga Faro nyi ya dusa va na Israyeli khu tigoni ga Egipito?”

¹²Nungungulu a di mu hakha, khuye: “Khu lisine eni nyi na bani nyiri nago. Egi khu giwonegiso nya gupwani kheni nyi gu rumelago; hwane nya gu bani nu duside vathu vangu khu tigoni ga Egipito, mu nata khozela Nungungulu gigomoni momu.”

¹³Mosi a di embela Nungungulu, khuye: “Wona nya gukhuwe nya gu hongola ga sanana sa Israyeli nyi ya si embela, kheni: Nungungulu wa vababe vanu a nyi rumede gwanu; avo va na nyi wudzisa, khavo: Khu mani Lina laye? Nyi na va embela ginani?”

¹⁴ Nungungulu a di embela Mosi, khuye: “ENI KHENI WULE A GU ENI.” A engedza a mu embela, khuye: “U na embela sanana sa Israyeli, khuwe: ENI KHENI- a nyi rumede gwanu.”

¹⁵Nungungulu a di ganela gambe ga Mosi, khuye: U na ganela kharati ga sanana sa Israyeli khuwe PFHUMU Nungungulu wa vababe vanu, Nungungulu wa Abrahama, Nungungulu wa Isaki ni Nungungulu wa Jakobe, a nyi rumede gwanu; Eli khu Lina langu kala gupindruga, nyi na alakanywa kharati khu mimela ni mimelana.

¹⁶Indra u ya tshanganisa madhota ya na Israyeli, u ma embela, khuwe: Nungungulu wa vababe vanu, Nungungulu wa Abrahama, Nungungulu wa Isaki ni Nungungulu wa Jakobe, a dzi wonegiside gwangu a nyi embela, khuye: Khu lisine nyi mi endrede, ni gu wona esi mu girwago tigoni ga Egipito.

¹⁷Khu guralo, Eni nyi ganede, kheni: Nyi na mi dusani khu wugumbini wa tigoni ga Egipito, nyi mi yisani tigoni ga Vakhanani, ga Vahiti, ga Vaamori, ga Vaferezi, ga Vahevhi ni Vajebhuzi, tigoni gu gogago mahwe ni wulombe.

¹⁸Avo va napwa lito lago. U na ya dzega madhota ya na Israyeli u hongola navo ga Faro, mufumeli wa Egipito, u ya mu embela, khuwe: PFHUMU Nungungulu wa Vahebheru, dzude gwathu, olu hi tshule hi dzega pfhuka nya matshigu mararu hi hongola giwulani, gasi hi ya phasela PFHUMU Nungungulu wathu.

¹⁹Khu guralo, eni nyi ngu dziti gwadi gukheni mufumeli wa Egipito, kha na nga mi diga mu duga, vbavbandze nya guye khu gu gurumedzwa khu gyandza nya tshivba.

²⁰Khu guralo, nyi na thawuludza gyandza gyangu nyi bayisa vathu va Egipito khu sisamadziso satshavbo nyi na si girago vbakari gwawe. Hwane nya ugo a na mi digani mu duga.

²¹Eni nyi na gira vathu vava va mane wuhindzi mahoni ga Vagipiti; khu magirelo yoyo, gikhati mu na dugago, kha mu na duga liphanga mandzani.

²² “Nyamayi ni nyamayi, a na lomba ga muakelane waye, ni oyu a vbanyago naye ndranga mweyo sombo nya parata ni esi nya ndralama ni guambala mu na ambagisago sanana sanu nya madzaha ni esi nya vanyamahegyane, khu magirelo yaya mu na phangani Vagipiti.”