Read gitonga Ekisodha 31 Bible Online

Ekisodha 31 - gitonga bible

Ekisodha 31

¹PFHUMU Nungungulu a di engedza gambe a embela Mosi, khuye:

²“Wona gukhuwe Eni nyi ranide khu lina Bhezaleli, mwamana wa Uri, gyanana gya Huri nya lihundzu la Judha,

³Nyi mu tadzide khu Liphuvbo la Nungungulu, ni wugengeli ni guti ni mapimo nya gukodze mafumbu yatshavbo nya wumeseri,

⁴gasi a kodza gu sika mathumelo nya wumeseri; a pfhula ni guthumisa ndralama, parata ni sugu;

⁵a na kodza gu koka ni gu tshomega siwindri nya wuzundzo a si tshomega, ni gu vata misimbo ni gu gira mithumo yatshavbo nya wumeseri.

⁶Nyi mu ningide Awoliyabhi, mwamana wa Ayisamaki, nya lihundzu la Dhani gu khala muphasedzeli waye. Nyi tadzide khu guti myonyo ya vameseri, gasi va kodze gu thuma satshavbo esi nyi gu leletedego a gu esi:

⁷Tshatsha nya Tshangano, Ngasa nya Gidzumeledzwano ni gikhalo nya ditshedzo gi fenengedzago ngasa, ni sombo satshavbo nya Tshatshani:

⁸Meza ni sombo saye, gidzigaredzo nya dzikandriya nya ndralama nya guhutwe ni sombo saye satshavbo, ni giluvelo nya guvbisele avbo libani;

⁹ni giluvelo nya miphaso nya guvbiswe ni sombo saye satshavbo, ni ginamelo ni girandro gyaye;

¹⁰guambala nya thumo nya wukhozeli ni guambala gu agisedwego muphasi nya mhamba Aroni ni sanana saye gasi gu gu thumisa thumoni gwawe nya wuphasi;

¹¹mafura nya gutodze ni libani nya gunungele nya gu vegwe Makhuvini nya Guage. Va na gira satshavbo sileletelo nyi gu ningidego.”

¹²PFHUMU Nungungulu a di engedza a ganela ga Mosi, a mu embela, khuye:

¹³“Embela sanana sa Israyeli, khuwe: Vegisani Sabhadho yangu, kholu egi khigyo giwonegiso nya pwanano wangu nanu ga situgulwana ni situgulwana sanu kala gupindruga, gasi va dziti gukhavo eni kheni PFHUMU Nungungulu nyi mi agisago.

¹⁴Khavbo avbo, vegisani Sabhadho, kholu gilo gi agidego avbo gwanu. Oyu a yi nyenyezisago a na tsayiswa khu gu songwa; kholu muthu a gu thuma, gani i thumo muni khu litshigu lolo, a na fuviswa vbakari nya lihundzu laye.

¹⁵ Mu na thuma livbandre na limwedo matshigu, aholu ilo nya livbandre na mavili, Sabhadho nya guhefemule yi phasedwego PFHUMU Nungungulu; uye a thumago thumo nya gukari khu Sabhadho, a na songwa.

¹⁶Sanana sa Israyeli si fanede gu vegisa litshigu nya Sabhadho va li agisa kha nga gidzumeledzwano khu situgulwana ni situgulwana kala gupindruga.

¹⁷“Egi giyeyedzo avbo gwangu ni sanana sa Israyeli kala gupindruga; kholu khu livbandre na limwedo matshigu, PFHUMU Nungungulu giride ndzadzi ni mafu, khilo nya livbandre na mavili a di vbedza thumo waye, a gu hefemula.”

¹⁸Hwane nya gu PFHUMU Nungungulu na vbedzide gu ganela ni Mosi gigomoni gya Sinayi, a di mu ninga mapulango mavili nya Wufakazi, siwindri si lovidwego khu nyala ya Nungungulu.