Read gitonga Ekisodha 34 Bible Online

Ekisodha 34 - gitonga bible

Ekisodha 34

¹PFHUMU Nungungulu a di embela Mosi, khuye: “Vata siwindri sivili nya gufanane ni esi nya guhegule. Nyi na lova avbo magana nyi nga bani nyi lovide ga esi nya guphele u nga pandrago.

²Dzi dongisele gasi mindru vbadzimindrutunu, u gwela gigomotunu gya Sinayi. U na ta ema mbeli gwangu tshokatunu nya gigomo.

³Gu nga gweli mumbe muthu nago. Gambe gu nga emi muthu vbafuvbi ni gigomo. Gu nga manegi dzinvuta mwendro dzimombe na dzi gu hava vbafuvbi ni gigomo.”

⁴Khu guralo, Mosi a di vata siwindri sivili nya idzosaye ni esi nya guhegule, khu mindru gakone, ni dzimindru, a di gwela gigomoni gya Sinayi, kha nga idzo a nga rumwago khidzo khu PFHUMU Nungungulu, na pharide mandzani siwindri sile sa sivili.

⁵PFHUMU Nungungulu a di tshiga nari lipfhini, a di khala vbafuvbi gwaye, a gu pwadza lina la PFHUMU Nungungulu.

⁶ PFHUMU Nungungulu a di vbindra mbeli gwaye, a gu ganela, khuye: “PFHUMU Nungungulu! PFHUMU Nungungulu! Nungungulu nya wuhindzi ni gupwela wusiwana; A hwelago gu goroga, A tadego khu wuwadi ni gutumbega,

⁷ wuhindzi waye wu thaphelago kala ga gitugulwana nya likhumi mazana, A tsetselelago guvivba, guyeyisa ni gughoha; aholu A si tshuligo vale va gu ni nandru; A tsayisago sihoso sa vavelegi ga sanana sawe ni ga sanana sa sanana sawe, kala gu vboha ga melana nya wuraru mwendro nya wu na.”

⁸Mosi a di dzegela gu noga ngudzu kala vbavbatshi a gu khidzima a khozela;

⁹a ganela, khuye: “Olu, nya gu bani nyi mane makategwa mbeli gwago, Pfhumu, gira wuhindzi U gimbila vbakari gwathu; kholu khu lisine, ava vathu nya gubange mihungo. Aholu, hi tsetselele guvivba gwathu ni sighoho sathu, U hi hakhe hi khala thomba yago.”

¹⁰Khavbo avbo, a di hakha, khuye: “Nyi na hunga nago gidzumeledzwano. Nyi na gira siliwugiso mbeli nya vathu vatshavbo, esi nya gu gima si si gu wonwi ga limbe litigo mwendro ga limbe lihundzu, gasi vathu vatshavbo va gu randredego va fela gu wona mithumo ya PFHUMU Nungungulu, kholu si ngu samadzisa ngudzu sigiro nyi na gu si thumago khu mandza yago.”

¹¹Vegedza gwadi esi nyi gu rumago muhuno. Nyi na tutumisa mbeli gwago Vaamori, Vakhanani, Vahiti, Vaperezi, Vahevhi ni Vajebhuzi.

¹²Dzi wonele, u nga tshuki sago u hunga pwanano ni vathu va tigoni u na belago umo, gasi avo va si khali naphwi vbakari gwanu.

¹³Aholu mu na pfhungumulela malanga yawe nya miphaso, mu pandrelela sifananiso sawe, mu kokelela sihuru sawe nya miphaso.

¹⁴U nga khozeli mumbe nungungulu, kholu PFHUMU Nungungulu, lina laye khuye Nyawufu; Nungungulu nya wufu.

¹⁵U nga giri gidzumeledzwano ni vathu va tigoni momu, kholu gikhati va bhayago ni vanungungulu vawe, ni gu bani va phasela vanungungulu vawe, va nga gu rana nuwe gu ya hodza esi sa vbamiphasotunu gwawe;

¹⁶mwendro gu wudza dzimbiri dzawe, u lowodza sanana sago. Vanyamayana vovo gikhati va bhayago ni vanungungulu vawe, va nga khulugisa sanana sago si bhaya niso ni vanungungulu vovo.

¹⁷ U nga dzi gireli vanungungulu nya gupfhudwe khu sikete.

¹⁸Sayisa buzo nya sibaba nyambana mela: U na vbedza livbandre na mavili matshigu nu gu hodza sibaba nyambana mela, ndrani nya ngima nya Abhibhi; [29] kha nga idzo nyi gu layidego khidzo, kholu khuwo ngima u dugidego khuwo khu Egipito.

¹⁹Gyanana gyatshavbo nya matiwula gya gu lumba eni. Kharato gambe, matiwula yatshavbo nya vamatune nya sifuyo sago, esi nya sikhongolo ni esi nya sidugwana, u na si agisela eni, u na gira gialakanyiso.

²⁰ Aholu matiwula nya buru, u na ma dzegisa khu nvutana, wa gumba ma dzegisa u na ma funya thamo. Matiwula nya sanana sanu mu na ma dzegisa gikhati gyatshavbo; kha mu na hidzimela vbafuvbi gwangu na mwa sa phara gilo mandzani.

²¹ U na thuma livbandre na limwedo matshigu, aholu u na hefemula khu eli nya livbandre na mavili, ambari nari nango nya gilimo mwendro nya guvbwere.

²²U na alakanya gambe Mibuzo nya Dzisemana, mu gira miphaso nya dzimbewu nya guphele nya vbwero nya sivbila, ni buzo nya Guvbwere guvbelani nya mwaga.

²³Vama vatshavbo va tigoni gwanu va na ta dzi bikela gwangu, guraru khu mwaga, mbeli ga PFHUMU Nungungulu, Nungungulu wa Israyeli.

²⁴Kholu eni nyi na tutumisa mayigo mbeli gwago, nyi na thawuludza litigo lago, wa gu simama guta guraru khu mwaga, u ta dzi wonegisa ga PFHUMU Nungungulu wago, mwalo muthu a na gu girela lidiwo litigo lanu.

²⁵ Wa gu paya girengo u nyi girela miphaso, u nga ti u ta ningela novba wakone gumogo ni sibaba nya guthedwe mela, nvutana nya Buzo nya Phasika yi nga tshali wutshiguwule kala ga limbe litshigu.

²⁶ Mihandro nya guphele ya thembweni gwago u na resa Nyumbani ga PFHUMU Nungungulu wago. U nga phuli giphongwana khu mahwe ya mayi wakone.

²⁷PFHUMU Nungungulu a di embela gambe Mosi, khuye: “Lova magana yaya u ma vegisa, kholu nyi hungide khayo gidzumeledzwano nago gumogo ni sanana sa Israyeli.”

²⁸Mosi a di khala vbafuvbi ni PFHUMU Nungungulu magumana matshigu wutshigu ni mihani, a hala nyamba hodza gilo, nyamba sela mati, a di lovetela vbasiwindritunu magana nya gidzumeledzwano, a gu milayo nya likhumi.

²⁹Mosi a di tshiga khu mugigomoni gya Sinayi na pharide mandzani siwindri sivili nya gidzumeledzwano. Gikhati a nga bani a gu tshiga, a di si dziti gukhuye khovbe yaye yi di gu ngangamela, khu kotani nya olu a nga bani na khade a ganela ni Nungungulu.

³⁰Avbo Aroni ni sanana satshavbo sa Israyeli va khedzidego Mosi, va di wona khovbe yaye na yi gu ngangamela. Kha va nga tiyela gu hidzimela vbafuvbi gwaye.

³¹Khavbo avbo, Mosi a di va rana; Aroni ni vathangeli vatshavbo nya Tshangano va diya gwaye; uye a di ganela navo.

³²Khu gulandrela, si di hidzimela gwaye sanana satshavbo sa Israyeli, Mosi a di va embeledzela sileletelo satshavbo a nga si hakhago ga PFHUMU Nungungulu mugigomoni gya Sinayi.

³³Na vbedzide gu ganela navo, Mosi a di fenengedza khovbe khu mwendra.

³⁴Aholu, gikhati gyatshavbo Mosi a nga bani na gu bela gasi gu ya khala vbafuvbi ni PFHUMU Nungungulu a ganela naye, a di funungula mwendra kala a duga vbavbandze. A di embeledzela sanana sa Israyeli satshavbo a nga leletedwego.

³⁵Khu guralo, sanana sa Israyeli si di wona gukhiso khovbe ya Mosi yi ngu ngangamela, aholu Mosi a di fenengela gambe khovbeni khu mwendra, kala a gu ya bela gambe, gasi gu ganela ni Nungungulu.