Read gitonga Ekisodha 35 Bible Online

Ekisodha 35 - gitonga bible

Ekisodha 35

¹Mosi na ranide tshangano watshavbo nya sanana sa Israyeli, a di va embela, khuye: “Magana PFHUMU Nungungulu a rumidego gukhuye ma landriswe khaya:

² Mu na thuma livbandre na limwedo matshigu, aholu eli nya livbandre na mavili li na bani liri litshigu li agidego vbakari gwanu, litshigu nya guhefemule gasi gu rungudza PFHUMU Nungungulu. Oyu a na thumago litshigu lolo, a na songwa.

³Gu nga khondriswi nilo mudzindrangani gwanu khu litshigu nya Sabhadho.”

⁴Mosi a di embela gambe tshangano watshavbo nya sanana sa Israyeli, khuye: “Khayo aya Magana PFHUMU Nungungulu a rumidego khu gu ganela, khuye:”

⁵Mu na dzegani esi mu gu naso mu gira hwengo wa PFHUMU Nungungulu; muthu ni muthu a gu na ni monyo nya wuhindzi, khu gudzina gwaye, a nata bikela ga PFHUMU Nungungulu; ndralama, parata ni sugu;

⁶myendra nya wuzundzo nya livala nya nga la damboni, ni giwunguwungu ni guvbyuga ni seda ni mawoya nya phongo;

⁷malowo nya dzinvuta nya gupendrwe khu nyiwa nya gufuvile, ni malowo nya wuzundzo, ni mapulango nya sena;

⁸ni mafura nya gukhondrise khayo dzikandriya ni sinungedziso nya gugire khiso mafura nya gutodze ni libani nya gunungele gwadi;

⁹ni siwindri nya wuzundzo ni siwindri nya onikisi ni siwindri nya gute namegedza avbo nya efodhe, ni esi sa avba nya gikhweso gya vbakhanatunu.

¹⁰Vathu vatshavbo vbakari gwanu va gu na ni giningwa nya wumeseri, va nate va ta thuma esi PFHUMU Nungungulu a leletedego, a gu esi:

¹¹Wulanga nya Guage ni Tshatsha waye, ni sipfhulelo sakone, masindra, sivbaregedzo, ni mapulango nya mitalatsi, madingo ni dzitshina;

¹²Ngasa ni mipingo yaye; gikhalo nya ditshedzo ni mwendra wu gi bhiyago;

¹³meza ni mipingo yaye, ni sombo satshavbo, ni sibaba nya ningelo;

¹⁴gidzigaredzo nya dzikandriya ni sombo saye satshavbo, dzikandriya, ni mafura nya dzikandriya;

¹⁵giluvelo nya libani ni mipingo yaye, mafura nya gutodze, libani nya gunungele gwadi, ni mwendra nya gusege mwanya nya makhuvi nya guage;

¹⁶giluvelo nya miphaso nya guvbiswe ni gihuto gyakone nya sugu, mipingo ni sombo saye satshavbo; ginamelo ni girandro gyaye;

¹⁷mwendra nya likupakupa ni madingo ni dzitshina, ni mwendra wa vbamwanyatunu nya likupakupa.

¹⁸Sikhongwane nya wulanga nya guage ni sipharegedzo saye, ni esi nya likupakupa ni dzingodzi dzakone.

¹⁹“Guambala nya thumo nya wuphasi nya Wulanga nya Guage, a gu guambala nya gukategiswe ga muphasi nya mhamba Aroni ni guambala ga sanana saye, gasi va thume kha nga vaphasi nya mhamba.”

²⁰Khu guralo, tshangano watshavbo nya sanana sa Israyeli wu di khuga, wu tshiya Mosi wu hongola.

²¹Vathu vatshavbo nya myonyo nya yadi ni lihaladzo, na va tshulegide, va di hongola va yisa mihengo yawe ga PFHUMU Nungungulu, gasi yi ta thuma gu vbahisa Tshatsha nya Tshangano, ni mithumo yaye gumogo ni guambala nya guagiswe.

²²Vama ni vanyamayi ni vatshavbo nya myonyo nya wuhindzi; va dita na va pharide masindra ni dziphera ni maniya, ni mafumbu yatshavbo nya simburiselo nya gugirwe khu ndralama; moyo ni moyo a di ta bikela ningelo waye nya ndralama owu a wu dongisedego gu ningela PFHUMU Nungungulu.

²³Vathu vatshavbo va nga bani vari ni myendra nya wuzundzo nya livala nya nga la damboni, ni giwunguwungu, ni malowo nya phongo ni malowo nya dzinvuta nya gupendrwe khu nyiwa nya gufuvile, ni malowo nya wuzundzo, va di dzega va hongola naso.

²⁴Vatshavbo vale va nga dzi kodzago gu henga khu parata mwendro sugu, va di si yisa ga PFHUMU Nungungulu. Vatshavbo va nga bani vari ni mapulango nya sena dzindrangani gwawe nya guningane guthumiswa vbathumotunu, va di hongola nawo.

²⁵Vanyamayi vatshavbo va ningidwego gu kodza gu lugela, va di luga khu mandza yawe, va resa myendra nya wuzundzo nya livala nya nga la damboni, ni giwunguwungu ni gu vbyuga, ni seda.

²⁶Vanyamayi vatshavbo va kodzago ni gu gola va di lugela mawoya nya phongo.

²⁷Vathangeli va di yisa siwindri nya wuzundzo, Onikisi ni simbe ni simbe si vbwetegago gasi gu thedzedwa avbo nya efodhe ni avba nya gikhweso gya vbakhanatunu,

²⁸ni sinungedziso ni mafura nya dzikandriya, ni mafura nya gutodze ni libani nya gunungele.

²⁹Sanana satshavbo sa Israyeli, nya vama ni vanyamayi, va nga bani va gola khu myonyo yawe guhengela ga wevbi ni wevbi thumo owu PFHUMU Nungungulu, khu lito la Mosi, a nga khuye wu na thumwe, a di dzega miningelo yaye na tshulegide aya bikela ga PFHUMU Nungungulu.

³⁰Mosi a di embela sanana sa Israyeli, khuye: “Dzitini gukhenu PFHUMU Nungungulu hathide Bhezaleli, mwamana wa Uri, gyanana gya Huri, nya lihundzu la Judha,

³¹a mu tadzide khu Liphuvbo la Nungungulu, li mu ningidego guti, ni gugengela ni gu kodza mithumo ya mafumbu yatshavbo;

³²a mu ningide wugengeli nya gusike mithumo a wuya a yi gira khu ndralama, parata ni sugu;

³³ni gu koka siwindri nya wumburi, ni gu vata misimbo, ni gu gira mafumbu yatshavbo nya mithumo nya wumeseri.

³⁴A mu ningide uye ni Awoliyabhi, mwamana wa Ayisamaki, nya lihundzu la Dhani, giningwa nya guhevbudze vambe thumo nya wumeseri.

³⁵A va tadzide khu guti ni gugengela nya gukodze mithumo yatshavbo nya wumeseri, nya guvate ni gu luga myendra nya wuzundzo nya livala nya nga la damboni, ni giwunguwungu, ni guvbyuga ni linyu nya wumburi, gasi va kodza gu gira gwadi mithumo yatshavbo, ni mano nya gu tugule yimbe mithumo.