Read gitonga Ekisodha 36 Bible Online

Ekisodha 36 - gitonga bible

Ekisodha 36

¹Bhezaleli ni Awoliyabhi ni vama vatshavbo nya guti ni wumeseri, ava PFHUMU Nungungulu a va tadzidego khu guti ni mapimo, gasi gu gira thumo watshavbo wu vbwetegago avbo nya wulanga nya guage, va na thuma satshavbo gukhedza khu sileletelo va hakhidego ga PFHUMU Nungungulu.

²Mosi a di rana Bhezaleli ni Awoliyabhi ni vama vatshavbo nya guti ni wumeseri, ava PFHUMU Nungungulu a va ningidego wugengeli, vatshavbo vale va nga rumwago khu myonyo yawe gu gira thumo wowu.

³Ava va di hakha khu ga Mosi, mihengo yatshavbo yi nga reswago khu sanana sa Israyeli, gasi gu gira khiyo thumo wa vbawulangatunu nya guage, gambe va na Israyeli dzimindru ni dzimindrudzile gugyago va di simama gu yisa mihengo ga Mosi.

⁴Khavbo avbo, vama vatshavbo va wu pimago thumo va nga bani vari vbathumotunu nya guvbahe wulanga nya guage, va di diga mithumo va nga bani vari nayo mandzani,

⁵vaya ga Mosi vaya mu embela, khavo: “Vathu va ngu resa guvbindrisa avbo gu vbwetegago gasi gu vbedza thumo watshavbo owu PFHUMU Nungungulu a rumidego gu wu girwa.”

⁶Khavbo avbo, khu guruma ga Mosi gu di tiviswa wughoveloni gwatshavbo mahungu nya gupwani: “Vathu vatshavbo, vama ni vanyamayi, va nga dzi garadzi gambe khu gu resa mihengo gasi guta thumiswa wulangani nya guage.” Khu guralo, gu di emiswa kharati vathu gu simama va resa mihengo.

⁷Kholu silo va nga bani vari naso si diri singi nya guenele gu gira thumo watshavbo bwelo khavo si tshala.

⁸Khu guralo, va nya gugengela ni gu pima gwadi thumo nya guvbahe vbakari nya vathumegeli, va di vbaha Tshatsha nya Guage, va thumisa likhumi myendra nya makhuvi nya gumbure na yi lugidwe khu dzikhindra nya linyu nya livala la damboni, nya giwunguwungu, nya guvbyuge, na yiri ni mufananiso nya dzikerubhimi; nya gulugedwe khu wumeseri.

⁹Gulapha nya mwendra ni mwendra nya makhuvi, gu di pima magumavili na livbandre na miraru mikono, guanama wu diri ni mikono mina; myendra yatshavbo yi diri ni pimo moyo.

¹⁰Livbandre myendra yi di yingwa yi khala mwendra moyo nya wukhongolo; yimbe gambe livbandre yi di yingwa niyo yi khala moyo.

¹¹Gu di hungwa dzingodzi nya livala la damboni mudzibambe nya mwendra wu nga bani wuri khu mahegiso, va gira gambe kharalo ga owu wumbe nya wuvili.

¹²Gu di hungeledwa livbandre magumi dzingodzi dzibambe nya mwendra nya guphele, ni livbandre magumi ga owu nya wuvili. Dzingodzi dzedzi, dzi di khedzisana.

¹³Va di gira livbandre magumi sikhweletedzo nya ndralama, gasi gutshanganisa khiso myendra nya makhuvi, khu guralo Tshatsha nya Guage wu di manega wuri moyo.

¹⁴Va di gira gambe myendra khu mawoya nya phongo, gasi gu gira tshatsha nya gu fenengedze vbatshani nya Tshatsha nya Guage; myendra yeyi yi diri likhumi na moyo.

¹⁵Gulapha nya mwendra ni mwendra gu diri ni magumararu mikono, guanama gu dzega mikono mina. Myendra yatshavbo nya likhumi na moyo yi diri pimo moyo.

¹⁶Va di yinga livbandre myendra yi gira mwendra moyo, va gira gambe kharato ga eyi yimbe myendra nya livbandre na moyo.

¹⁷Va di hungelela livbandre magumi dzingodzi khu dzibambe nya mwendra wu nga bani na wuri khu mahegiso.

¹⁸Va di gira gambe livbandre magumi sikhweletedzo nya sugu gasi gu tshanganisa Tshatsha wu khale wuri moyo basi.

¹⁹Va di pfhulela gambe Tshatsha khu malowo nya dzinvuta nya guthedwe nyiwa nya gufuvile, va pfhulela gambe khu malowo nya guvbevbuge.

²⁰Va di vata gambe mapulango nya sena gasi gu emisa khayo Tshatsha.

²¹Lipulango ni lipulango li diri ni likhumi mikono gulapha, ni kono moyo ni gipandre guanama.

²²Lipulango ni lipulango li diri ni dziphingwi dzimbili gasi gu yingana ni makwawe. Mapulango yatshavbo nya wulanga nya guage ma di girwa kharato.

²³Va di gira magumavili mapulango gasi va emisa ndzari ya phuvbo ga Marandzi.

²⁴Vbavbatshi nya mapulango yaya nya magumavili, va di vega magumana migonyo nya parata, mivili mivili khu lipulango gasi gu khweletedza khumo sitshanganiso.

²⁵Ga ndzari nya wuvili nya wulanga nya guage khu phuvbo ga Wuronga, va di gira magumavili mapulango,

²⁶ni magumana migonyo yaye nya parata; mivili mivili khu lipulango ni lipulango.

²⁷Khu magumbini nya wulanga nya guage, khu phuvbo ga Muhwadambo, va di gira livbandre na limwedo mapulango.

²⁸Va di gira gambe mapulango mavili dzikhonani dza dzimbili nya Tshatsha nya Guage,

²⁹mapulango yaya, ma di hambanide khu vbavbatshi, aholu ma ya yingwa khu vbatshani khu masindra nya guhegule; khidzo gu nga giregago ga mapulango ya mavili nya dzikhona dza dzimbili.

³⁰Khu guralo, mapulango yatshavbo ya vbatshani ma diri livbandre na mararu, na mari ni likhumi na livbandre na moyo migonyo nya parata, mivili mivili khu lipulango ni lipulango.

³¹Va di gira gambe livbandre mitalatsi nya sena; gu hunga mapulango nya ndzari mweyo nya Wulanga nya Guage,

³²ni yimbe livbandre nya guhunge mapulango nya ndzari nya wuvili nya Wulanga nya Guage, ni yimbe gambe livbandre gasi gu hunga mapulango ya ndzari nya Wulanga nya Guage ya Muhwadambo.

³³Talatsi wa vbakari wu di gu vbindra khu vbakari ni vbakari nya mapulango, gukhugela mahegiso kala mahegiso.

³⁴Va di londra mapulango khu ndralama, bwelo khavbo va gira masindra yakone khu ndralama, gasi gu vbindra khumo mitalatsi; mitalatsi niyo va yi londra khu ndralama.

³⁵Va di gira mwendra nya livala nya nga la damboni, ni giwunguwungu, ni guvbyuga ni linyu nya wumburi, wumburisedwa gwadi khu dzikerubhimi nya gulugedwe gwadi khu wumeseri.

³⁶Va di gira madingo mana nya simbo nya sena, nya gulondrwe khu ndralama ni sikhweletedzo nya ndralama, va ma girela dzitshina dzina nya parata nya gupfhudwe.

³⁷Gasi gu sega vbamwanya, va di gira mwendra nya makhuvi nya muvala nya nga wa damboni, ni giwunguwungu ni guvbyuga, ni linyu nya gulugedwe gwadi khu wumeseri, wu mburisedwa.

³⁸Gasi gu ghwimba mwendra wowu, va di gira livbandre madingo ni sikhweletedzo sakone; va yi londra khu ndralama mihungo yakone, ni mitalatsi, aholu dzitshina dzakone nya livbandre dzi di girwa khu sugu.