Read gitonga Ekisodha 37 Bible Online

Ekisodha 37 - gitonga bible

Ekisodha 37

¹Bhezaleli a di gira ngasa nya mapulango nya sena yi gu na ni mikono mivili ni gipandre gulapha, kono moyo ni gipandre guanama ni kono moyo ni gipandre gukhugega.

²A di yi londra khu ndralama nya guhutwe khu ndrani ni vbavbandze, a yi girela libhandri nya ndralama li yi dzuwuluga.

³A di ruma gu pfhudwa masindra mana nya ndralama a ma khokhotela dzikhonani dza dzina nya ngasa, mavili khu phuvbo mwedo, mavili gambe khu limbe liphuvbo.

⁴A di gira gambe mipingo nya simbo nya sena a yi londra khu ndralama,

⁵a bedza khumo nya masindra sikhongwane si khokhotedwego muwubambe nya ngasa, gasi gu yi pinga khayo.

⁶A di gira gambe gikhalo nya ditshedzo khu ndralama nya guhutwe gwadi, gi gu na ni mikono mivili ni gipandre gulapha ni kono moyo ni gipandre guanama.

⁷Giride gambe dzikerubhimi dzimbili nya gupfhudwe khu ndralama a dzi emisa khu mahegiso nya gikhalo nya ditshedzo, khu phuvbo ga eno ni phuvbo ga eyi.

⁸Kerubhimi mweyo yi di khala khu phuvbo ga eno, yimbe yi gu khala khu phuvbo ga eyi. Kharati, dzikerubhimi dzi khala khu mudzitshokani dza dzimbili nya gikhalo nya ditshedzo, dzi khala gilo gimwegyo basi.

⁹Dzi di thawuludza mambapi vbatshani dzi gu fenengedza gikhalo nya ditshedzo, dza dzimbili dzikhovbe dzawe dzi di khedzisana, dzi khedzisa vbavbatshi, vbagikhalotunu nya ditshedzo.

¹⁰Khu gulandrela a di gira meza khu mapulango nya sena yi gu na ni mikono mivili gulapha, kono moyo guanama ni kono moyo ni gipandre gukhugega.

¹¹A di yi londra khu ndralama nya guhutwe gwadi, a yi girela libhandri nya ndralama li yi dzuwuluga maphuvbo yatshavbo.

¹²A di yi hunga maphuvbo yatshavbo khu lipulango nya gugule gipimo nya dzinyala dzina, a li fumbela khu libhandri nya ndralama.

¹³A di pfhula masindra mana nya ndralama a ma khokhotela mudzikhonani dza dzina dzi girago mawundru ya mana nya meza.

¹⁴Vbafuvbi ni ngongola, masindra ma di khedzisana, gasi gu bedza khumo misimbo nya gupinge khiyo meza.

¹⁵A di gira mipingo nya misimbo nya sena gasi gu pinga khiyo meza.

¹⁶A di gira sombo satshavbo si nga bani si fanede gu khala vbamezatunu a gu esi: Dzimbiya, mikho, sifugo nya guthele libani ni sikombe nya mawadwa; satshavbo khu ndralama nya guhutwe.

¹⁷A di gira gidzigaredzo nya dzikandriya khu ndralama nya guhutwe, a di gira khu ndralama nya gupfhudwe, gidzigaredzo, tshina yakone, sifugwana, sipfupfu ni senge, satshavbo si wumba gilo gimwegyo basi nyamba yingwa.

¹⁸Livbandre na limwedo matamo ma di gu duga khu dzibambe gakone, mararu khu phuvbo mwedo, ni mambe mararu khu yimbe phuvbo.

¹⁹Litamo li diri ni sifugwana siraru nya gufanane ni senge nya alimondi ni sipfupfu ni senge. Ma diri idzosaye kharati matamo yatshavbo ma dugago khu vbagidzigaredzotunu nya dzikandriya.

²⁰Vbalitamotunu la vbakari nya gidzigaredzo gu di romo sifugwana sina nya gufanane ni genge nya alimondi ni sipfupfu ni senge saye.

²¹Gu diri ni gipfupfu gimwegyo vbavbatshi nya matamo ya mavili ma dugago khu vbagidzigaredzotunu, ni gipfupfu gimwegyo vbavbatshi nya matamo ya mavili ma handzamedzago. A diri kharati matamo yatshavbo nya gidzigaredzo nya dzikandriya.

²²Sipfupfu sesi, ni matamo yaya ni gidzigaredzo gyakone, satshavbo si di gira gilo gimwegyo basi nyamba yingwa, gyatshavbo gi di pfhudwa khu ndralama nya guhutwe.

²³A di gira dzikandriya dzakone nya livbandre na dzimbili, ni sitshimo sakone ni simbiyana nya guthele umo nguma, satshavbo khu ndralama nya guhutwe.

²⁴Gasi gu pfhula gidzigaredzo nya dzikandriya ni sombo saye satshavbo, a thumiside gipimo nya taleta nya ndralama nya guhutwe.

²⁵A di gira giluvelo nya libani khu mapulango nya sena, nya kono moyo gulapha ni kono moyo guanama. Maphuvbo yaye ya mana ma diri pimo moyo, aholu gukhugega a diri mikono mivili dzikeho dzaye dzi di patidwe gumogo nagyo gu khala gilo gimwegyo basi.

²⁶Vbatshani nya giluvelo a di londra khu ndralama nya guhutwe, kharato gambe dzibambe gwatshavbo ni dzikeho. A di gira libhandri nya ndralama li dzuwuluga giluvelo gyatshavbo.

²⁷A di gira masindra mavili nya ndralama khu vbatshani nya libhandri maphuvbo ya mavili, eno ni eno, gasi gu bedza khumo mipingo nya gu gi rwale khiyo.

²⁸A di gira mipingo khu misimbo nya sena a yi londra khu ndralama.

²⁹A di gira gambe mafura nya guagiswe nya gutodze, ni libani nya gunungele khu edzi va girago khidzo vapfangi nya sinungedziso.