Read gitonga Ekisodha 5 Bible Online

Ekisodha 5 - gitonga bible

Ekisodha 5

¹Khu hwane nya esi, Mosi ni Aroni va diya ga Faro, va ya, khavo: “PFHUMU Nungungulu wa Israyeli, a ngu ganela kharati, khuye: Diga vathu vangu va duga, va ya nyi girela buzo giwulani.”

²Faro a di va hakha, khuye: “Khu mani PFHUMU Nungungulu nya gukala nyi yingela esi a ganelago, nyi diga va na Israyeli va duga? Eni kha nyi muti PFHUMU Nungungulu, gima kha nyi na diga va na Israyeli va hongola danga.”

³Avo va di mu embela gambe, khavo: “Nungungulu wa Vahebheru a dzi wonegiside gwathu; hi dzumedzise hi duga hi endra matshigu mararu mugiwulani hi ya girela miphaso nya dzimhamba PFHUMU Nungungulu wathu, gasi a si hi bayisi khu mitungu mwendro khu matshari.”

⁴Aholu mufumeli wa Egipito a di va embela, khuye: “Uwe Mosi ni uwe Aroni, khu ginani mu hungatelago vathu, mu va kutsedzela gu diga mithumo yawe? Bwelelani mu ya mithumoni gwanu.”

⁵Faro a di engedza gambe a ganela, khuye: “Olu tengo nya vathu vovo wu engedzedego gu dandra tigoni, khu ginani mu vbwetago gu va hungatela mithumoni gwawe.”

⁶Khu litshigu lolo kamwe, Faro a di laya dzindruna ni vathangeli nya litigo, khuye:

⁷“Gukhugela olu guya mbeli, mu nga ningini gambe vathu mwasi nya guwumbe khuwo sitini, kha nga idzo mu nga bani mu olovedza gu gira khu gale kala olu. Va digeni va hongola va ya dzi vbwetela vabune mwasi.

⁸Ambari ulo, va henguleni tengo wa wumowo nya sitini vatago na va gu gira khu gale, nyamba vbungula ni gitini gimwegyo basi, kholu migara. Khigyo gi va girago va gulumela, khavo: Hi dige hi hongola hi ya phasela Nungungulu wathu.

⁹Va engedzeleni gu va lemedza vathu vovo khu mithumo, vafela gumba yingisela mitsheketo nya malipha.”

¹⁰Khavbo avbo, dzindruna ni vathangeli nya litigo va di duga va ya ganela ga vathu, khavo: “Faro a ngu ganela kharati, khuye: Gukhugela muhuno kha mu na ningwani gambe mwasi.

¹¹Indrani kamwe mwabune mu ya dzi vbwetela mwasi, gani evbini mu na ya wu manago, ambari ulo, kha mu na vbunguledwa mithumo yanu mu na hengudwani tengo wamoyo nya sitini kha nga gikhati mu nga bani muri ni mwasi.”

¹²Khavbo avbo, vathu va di phalalega ni litigo lastshavbo la Egipito va gimbila va vbweta mwasi.

¹³Dzindruna dzi di va garadza, khidzo: “Enedzani thumo wanu nya litshigu ni litshigu, kha nga idzo mu nga bani mu gu gira mu nga gu ningwa mwasi.”

¹⁴Vathangeli nya sanana sa na Israyeli, avo va rwegidwego thumo nya gughadhe vbakari gwawe, khu dzindruna dza Faro, va di kwamudwa va hengudwa pwani: “Khu ginani mu si enedzigo tengo nya sitini nya litshigu la vbanova ni muhuno kha nga gale?”

¹⁵Vathangeli nya sanana sa Israyeli va diya lila ga Faro, khavo: “Khu ginani u tshanisago kharati sithumi sago?

¹⁶Olu kha hi ngo ningwa gambe mwasi ethu sithumi sago; aholu va gu hi embela, khavo: “Girani tengo wamowo nya sitini! Sithumi sago si ngu kwamudwa. Aholu nandru khwa vathu vago.”

¹⁷Aholu uye a di va embela, khuye: “Enu kamwe mu migara ngudzu! Khigyo gi mi girago mu ganela, khenu: Hi dige hi ya phasela PFHUMU Nungungulu.

¹⁸Olu indrani mu ya thuma! Mwasi kha mu na ningwa, aholu guvbweta mu gira tengo wa wumowo nya sitini.”

¹⁹Vathangeli nya sanana sa Israyeli va di dzipwa na vari gutshanisekani nya gukhongolo, khu gu embedwa gupwani: “Kha mu na vbunguledwa gilo avbo nya tengo nya sitini mu fanedego gu gira khu litshigu ni litshigu.”

²⁰Avbo vathangeli va nga dugago khu ga Faro, va di manana ni Mosi ni Aroni, va nga bani va gu va lindrela,

²¹va gu va embela, khavo: “PFHUMU Nungungulu a na mi khedzise a gu mi lamula. Mu hi giride vathu nya gunyenyeze mahoni ga Faro ni sithumi saye, mu vegideni litshari mandzani gwawe vafela gu hi songa.”

²²Khavbo avbo, Mosi a di bwelela ga PFHUMU Nungungulu, aya, khuye: “Uwe Pfhumu! Khu ginani u tshanisa vathu vava? Khu ginani u nyi rumedego?

²³Gukhugela nyi dzudego nyi ta ganela ni Faro khu Lina lago, uye a gu engedzela gu tshanisa vathu vava, aholu Uwe khwa gira gilo gasi gu vbulugisa vathu vago.”