Read gitonga Ekisodha 6 Bible Online

Ekisodha 6 - gitonga bible

Ekisodha 6

¹PFHUMU Nungungulu a di embela Mosi, khuye: “Olu u na wona iso nyi na girago ga Faro; kholu khu gyandza gyangu nya tshivba a na va diga va hongola, khu gyandza gyangu nya tshivba, a na va tutumisa tigoni gwaye.”

²Nungungulu a di engedza a embela Mosi, khuye: “Eni kheni PFHUMU Nungungulu.”

³ Nyi dzi wonegiside ga Abrahama, ga Isaki ni ga Jakobe, kha nga Nungungulu nya Tshivba Yatshavbo, aholu, khu lina langu nya PFHUMU Nungungulu kha nya tidwa gwadi.

⁴Gambe nyi giride nago gidzumeledzwano gyangu, gasi gu va ninga litigo la Khanani, litigo va nga vbanyago umo kha nga valuveli.

⁵Gambe nyi pwide gulila ga sanana sa Israyeli, esi Vagipiti va nga si khozisago va si gira dzikhumbi. Nyi alakanyide gidzumeledzwano gyangu.

⁶Khu guralo, embela sanana sa Israyeli, khuwe: Eni kheni PFHUMU Nungungulu, nyi na mi dusani vbavbatshi nya rwalo nya gulemele wa Egipito, nyi na mi tshulani wugumbini gwawe, nyi na thawuludza libogo langu nya tshivba nyi mi dzegisa ni gu mi phodzela.

⁷Nyi na mi dzegani mu khala vathu vangu, Eni nyi na khala Nungungulu wanu, mu na dzitini nya gukhenu eni kheni PFHUMU Nungungulu wanu, nyi mi dusago vbavbatshi nya mirwalo ya Vagipiti.

⁸“Nyi na mi yisani nyi ya mi bedza ga litigo lile nyi nga sambanyago gukheni nyi na ninga Abrahama, Isaki ni Jakobe. Nyi na mi ningani gasi li khale thomba yanu. Eni kheni PFHUMU Nungungulu.”

⁹Khu magirelo yaya, Mosi a diya ganela esi ga sanana sa Israyeli, aholu iso kha sa mu yingela khu kotani nya gusaniseke gwawe ni wugumbi wawe.

¹⁰PFHUMU Nungungulu a di ganela gambe ga Mosi, khuye:

¹¹“Indra u ya embela Faro, mufumeli wa Egipito, a dige sanana sa Israyeli si duge tigoni gwaye.”

¹²Aholu Mosi a di ganela ga PFHUMU Nungungulu, khuye: “Wona gukhuwe sanana sa Israyeli kha si nyi yingisi. A na nyi yingisa kharini Faro, olu eni nyi si kodzigo gu ganela?”

¹³Khu guralo, PFHUMU Nungungulu a di ganela ga Mosi ni Aroni, a gu va ninga sileletelo nya guye embela sanana sa Israyeli ni Faro, mufumeli wa Egipito, gasi gu dusa sanana sa Israyeli khu tigoni ga Egipito.

¹⁴Ava khu vathangeli nya dzinyumba dza vababe vawe: Sanana sa Rubheni, matiwula ya Israyeli Khesi: Enoki, Palu, Heziromi ni Karimi. Edzi khu dzi nyumba dza Rubheni.

¹⁵Sanana sa Simiyoni, khesi: Jemuweli, Jamimi, Owadhi, Jakimi, Zowari ni Sawule, gyanana nya guvelege ni nyamayi nya mukhanani; eli khu linyangwa la Simiyoni.

¹⁶Aya khu malina nya sanana sa Levhi, gukhedza khu mimelana yawe: Gerisoni, Khowati ni Merari; myaga nya guvbanye gwa Levhi, lizana ni magumararu ni livbandre na mivili.

¹⁷Sanana sa Gerisoni, Khesi; Libini ni Simeyi, gukhedza khu lihundzu lawe.

¹⁸Sanana sa Khowati, khesi: Aniramo, Isari, Hebroni ni Uziyeli. Myaga nya guvbanye ga Khowati, lizana ni magumararu na miraru.

¹⁹ Sanana sa Merari, khesi: Mali ni Musi. Eli khu linyangwa la Levhi gu khedza khu mimelana yawe.

²⁰Anirami a di dzega hane waye Jokebedhi, a gu velega naye Aroni ni Mosi, myaga nya guvbanye ya Anirami yi diri lizana ni magumararu na livbandre na mivili.

²¹Sanana sa Isari, khesi: Kora, Nefege ni Zikiri.

²²Sanana sa Uziyeli, khesi: Misayeli, Elizafani ni Sitiri.

²³Aroni a di dzegana ni Eliseba, nyamahegyane wa Aminadhabhi, ndruye wa Nahasomi, a velega naye Nadhabhi, Abhiyu, Eleyazari ni Itamari.

²⁴Sanana sa Kora, khesi: Aseri, Elikana ni Abhiyasafi. Eli khu linyumba la na Kore.

²⁵Eleyazari, mwamana wa Aroni, a di dzega nyamayi moyo nya vanyamahegyane va Putiyeli. A di velega naye Fineya. Khavo ava vathangeli nya sanana sa Levhi, gukhedza khu lihundzu lawe.

²⁶Aroni ni Mosi khavo PFHUMU Nungungulu a nga va embelago, khuye: “Dusani sanana sa Israyeli khu tigoni ga Egipito, gulandra khu mabutho yawe.”

²⁷Khavo ava Mosi ni Aroni, va nga ya ganela ni Faro, mufumeli wa Egipito, gasi a duse khu tigoni ga Egipito, sanana sa Israyeli.

²⁸Litshigu PFHUMU Nungungulu a ganedego ga Mosi tigoni ga Egipito,

²⁹PFHUMU Nungungulu a di embela Mosi, khuye: “Eni kheni PFHUMU Nungungulu; embela Faro, mufumeli wa Egipito satshavbo nyi gu embelago.”

³⁰Khavbo avbo, Mosi a di hakha PFHUMU Nungungulu, khuye: “Wona nya gukhuwe eni kha nyi kodzi gu ganela; a na nyi yingisa kharini Faro?”