Read gitonga Ekisodha 8 Bible Online

Ekisodha 8 - gitonga bible

Ekisodha 8

¹Khu hwane, PFHUMU Nungungulu a di embela Mosi, khuye: “PFHUMU Nungungulu a ngu ganela kharati, khuye: “Diga vathu vangu, va hongola va ya nyi thumela.

²Wa gumba va diga va hongola, nyi na tshanisa litigo lago latshavbo khu vanyakhele.

³Tsongo wu na tala khu vanyakhele nya vangi va na gu litago va ya bela ni nyumbani gwago, ni makhuvini u lalago umo, dawuni gwago ni dzinyumbani nya dzindruna dzago, ga vathu va tigoni gwago, ni matindzaloni u vawulelago umo mikati kala ni somboni sago nya gusugele umo.

⁴Vanyakhele va na lita vbatshani gwago, vbatshani ga vathu va tigoni gwago ni vbatshani ga dzindruna dzago.”

⁵PFHUMU Nungungulu a di engedza gambe a embela Mosi, khuye: “Embela Aroni, khuwe: Thawuludza mandza yago ni ndronga yago vbatshani nya mitsongo, ni omu nya sitsongwana ni matsivani u resa vanyakhele tigoni ga Egipito.”

⁶Aroni a di thawuludza mandza yaye vbatshani nya mati, vanyakhele va di duga va fenengedza litigo latshavbo la Egipito.

⁷Khavbo avbo, dzinyanga nidzo dzi di gira idzosaye khu wugengeli wawe nya gusihalege; dzi resa vanyakhele tigoni ga Egipito.

⁸Faro a di rana Mosi ni Aroni a va embela, khuye: “Lombelelani ga PFHUMU Nungungulu gasi a duse vanyakhele avbo gwangu ni ga vathu vangu, eni nyi na tshula vathu va duga gasi va ya ningela miphaso nya dzimhamba ga PFHUMU Nungungulu.”

⁹Mosi a di ganela ga Faro, khuye: “Somo mandzani gwago! U na nyi embela gikhati muni nyi yelago gu ya lombelela, nyi lombelela khu uwe, dzindruna dzago ni vathu va tigoni gwago, gasi va ndreyiswe vanyakhele avbo gwago ni dzindrangani gwago, va manege tsongoni basi.”

¹⁰Uye a di hakha, khuye: “Mindru.” Mosi a di khuye: “Gu na girege kha nga idzo u ganedego khidzo, gasi u khale nu gu dziti gukhuwe mwalo a fananago ni PFHUMU Nungungulu wathu.

¹¹Vanyakhele va na mwalalega avbo gwago, ni dzindrangani gwago, ga dzindruna dzago ni ga vathu vago; va na khala basi tsongoni.”

¹²Khu guralo, Mosi ni Aroni va di duga; na va khugide mbeli ga Faro, Mosi a diya lila ga PFHUMU Nungungulu khu kotani ya vanyakhele a nga rumelago ga Faro.

¹³PFHUMU Nungungulu a di gira esi Mosi a nga lombago, vanyakhele va difa, va mwalalega dzinyumbani, dzindrangani ni marembweni.

¹⁴Va di va wungedzela kha nga matala nya makhongolo, tigoni gu di nunga.

¹⁵Aholu, avbo Faro a nga dzipwago na hefemudzidwe, a di bangisa gambe monyo waye, a bomba gu yingisa kha nga idzo a nga ganelago khidzo PFHUMU Nungungulu.

¹⁶PFHUMU Nungungulu a di engedza gambe gu embela Mosi, khuye: “Embela Aroni, khuwe: Khusedza ndronga yago u veta kudzudzwane nya mafu, gu na manega dzindraya tigoni gwatshavbo gwa Egipito”

¹⁷Va di gira kharato; Aroni a di khusedza mandza yaye ni ndronga yaye a veta kudzudzwane nya mafu, gu duga dzindraya dzi pomela vathu ni sirengo. Kudzudzwane watshavbo wu di vbindrugedza wu khala dzindraya tigoni gwatshavbo gwa Egipito.

¹⁸Dzinyanga dzi di pima gu gira idzosaye khu wugengeli wawe nya gusihalege, gasi guvelegisa dzindraya, aholu dzi di tandrega. Dzindraya dzi di pomela vathu ni sirengo.

¹⁹Khu guralo, dzinyanga dzi di embela Faro, khidzo: “Khu Nungungulu a girago esi.” Aholu monyo wa Faro wu di banga, kha nga idzo a nga ganelago PFHUMU Nungungulu.

²⁰PFHUMU Nungungulu a di engedza gu embela Mosi, khuye: “Wuga vbadzimindrutunu ngudzu, u ya ema mbeli ga Faro gikhati a dugago a hongola matini, u mu embela, khuwe: PFHUMU Nungungulu a ngu ganela kharati, khuye: Tshula vathu vangu va duga va fela gu ya nyi khozela.

²¹Kholu wa gumba tshula vathu vangu va duga, nyi na rumela mabhawa gwago ni ga sithumi sago, ga vathu va tigoni gwago, ni dzinyumbani gwago. Mabhawa ma na tala dzinyumbani ga Vagipiti, ma fenengedza myamba ni tigoni va na gu bani vari umo.

²²Khu litshigu lolo, nyi na kasa litigo la Goseni, umo va vbanyago vathu vangu; gasi iyo kha gu na manega talo nya mabhawa, u fela gu dziti gukhuwe Eni kheni PFHUMU Nungungulu tigoni momu.

²³Nyi na vega vbingano, nyi hambanisa vathu vangu ni avo vago. Igyogyo giwonegiso gi na dugelela mindru, avba gugyago.”

²⁴PFHUMU Nungungulu a di gira kharato. Myamba nya yikhongolo nya mabhawa nya gutale ma di bela nyumbani ga Faro ni dzinyumbani ga dzindruna dzaye, ni litigo latshavbo la Egipito, li di tshaniswa khu mabhawa.

²⁵Khavbo avbo, Faro a di rana Mosi ni Aroni a va embela, khuye: “Indrani mu ya ningela miphaso nya dzimhamba ga Nungungulu wanu tigoni momu.”

²⁶Mosi a di hakha, khuye: “Ahihi, kha si yeli gu gira kharato, kholu hi nga girela PFHUMU Nungungulu wathu miphaso yi dzi kodzago gu khunguvanyisa Vagipiti. Ha gu gira miphaso yi lolelago mahoni ga Vagipiti, ina kha va na hi pfara khu siwindri va hi songa, gani?

²⁷Hi dige hi gira liendro nya matshigu mararu, hi hongola giwulani hi ya phasela PFHUMU Nungungulu wathu dzimhamba gukhedza khu edzi, Uye a na gu hi lombago khidzo.”

²⁸Khavbo avbo, Faro a di ganela, khuye: “Eni nyi na mi tshula mu hongola, gasi mu ya ningela dzimhamba nya miphaso ga PFHUMU Nungungulu wanu giwulani; aholu, mu nga hongolini hwindzo ngudzu. Nyi lombeleleni neni!”

²⁹Mosi a di hakha, khuye: “Wona, olu nyi khugago khavba gwago, nya gu ya lombelela ga PFHUMU Nungungulu gasi mindru mabhawa ma mwalalega avbo gwago uwe Faro, ga dzindruna dzago ni ga vathu va tigoni gwago. Egi basi gi vbwetegago khu gu Faro a si engedzi gu hi pemba, a bomba gutshula vathu vava va hongola va ya ningela miphaselo ga PFHUMU Nungungulu.”

³⁰Khavbo avbo, Mosi a di khuga ga Faro, a hongola aya lombelela ga PFHUMU Nungungulu.

³¹PFHUMU Nungungulu a di gira kha nga idzo a nga mu lombago khidzo Mosi. Mabhawa ma di mwalalega ga Faro ga dzindruna dzaye ni ga vathu vaye, nyamba tshala ni limwedo basi.

³²Aholu Faro a di engedza gambe gu bangisa monyo waye, a bomba gu tshula vathu va hongola.