Read gitonga Ekisodha 9 Bible Online

Ekisodha 9 - gitonga bible

Ekisodha 9

¹Khu hwane, PFHUMU Nungungulu a di embela Mosi, khuye: Indra u ya ganela ni Faro, u mu embela, khuwe: “PFHUMU Nungungulu wa Vahebheru a ngu ganela kharati, khuye: Tshula vathu vangu va hongola va ya nyi thumela.

²Kholu, wa gu bomba gu va tshula va hongola, u simama gu va moledzela khu tshivba,

³wona gukhuwe gyandza gya PFHUMU Nungungulu gi na bayisa mitshambi yago yi guromo mapanini, gi bayisa dzikavalu, dziburu, dzingameriya, dzimombe ni dzinvuta; wu na bani wuri tungu nya wukhongolo ngudzu.

⁴PFHUMU Nungungulu a na vega vbingano, a hambanisa mitshambi ya Israyeli ni mitshambi ya Egipito. Kha gu nafa gilo ga esi si lumbago sanana sa Israyeli.”

⁵PFHUMU Nungungulu a di vega gikhati nya gukari a ganela, khuye: “Mindru, PFHUMU Nungungulu a na gira esi tigoni.”

⁶Khu mindru gakone, PFHUMU Nungungulu a di gira kharato; gu difa mitshambi yatshavbo ya Vagipiti, aholu ga mitshambi ya sanana sa Israyeli, gu mwalo girengo gi ngafago.

⁷Faro a di ruma gu yati esi si dugeledego, va mu tivisa gupwani ambari ni girengo gimwegyo basi gi mwalo gi fudego vbakari nya mitshambi ya Israyeli; ambari ulo a di simama gu bangisa monyo waye, a si tshuli vathu va hongola.

⁸Khu guralo, PFHUMU Nungungulu a di embela Mosi ni Aroni, khuye: “Tadzani sandza sanu khu nguma wa vbagikhotunu, Mosi a na wu swaya vbatshani, mbeli ga Faro.

⁹Wu na vbindrugedza wu khala kudzudzwane wu na fenengedzago litigo latshavbo la Egipito. Gu na duga sithunya nya gufufute wusila, milini nya vathu ni sirengo, tigoni gwatshavbo ga Egipito.”

¹⁰ Khavbo avbo, va di baga nguma wa vbagikhotunu va ya ema mbeli ga Faro. Mosi a di swaya nguma vbatshani, uwo wu di vbindrugedza wu khala mbatata, gu duga sithunya nya makhoro milini nya vathu ni sirengo.

¹¹Dzinyanga dzi di tandrega gu ema mbeli ga Mosi khu kotani nya sithunya, kholu va di tade khu sithunya, idzosaye ni vatshavbo vambe Vagipiti.

¹²Aholu PFHUMU Nungungulu a di bangisa monyo wa Faro, a si yingisi Mosi ni Aroni, kha nga idzo PFHUMU Nungungulu a nga embelago khidzo Mosi.

¹³PFHUMU Nungungulu a di embela Mosi, khuye: Wuga dzimindrudzile ngudzu, u ya dzi wonegisa mbeli ga Faro, u mu embela, khuwe: “PFHUMU Nungungulu wa Vahebheru a ngu ganela kharati, khuye: Tshula vathu vangu va hongola va ya nyi thumela.

¹⁴Kholu gikhati gegi nyi na rumela mitungu yangu yatshavbo gwago ni ga sithumi sago ni ga vathu va tigoni gwago gasi u dziti gukhuwe mwalo mumbe nya gufanane ni eni mafuni gwatshavbo.

¹⁵Kholu nari gukhwatshi nyi khuside libogo langu; nari pwani nyi thumiside tshivba yangu nyi gu veta khu tungu, uwe ni vathu vago, olu na mu mbembide mu vbela mafuni.

¹⁶Aholu nyi gu digide u vbanya, khu gufela gukheni u wone tshivba yangu, ni gukheni lina langu li tidwe tigoni gwatshavbo.

¹⁷Aholu, uwe u nga gu simama sago gu dzi gugumugisa, u bomba gu tshula vathu vangu va hongola, gani?

¹⁸Wona, mindru khu gikhati gegi, nyi na wisa ndzadzi nya maralala nya gulemele ngudzu, aya nya gu gima ma si gu wonwi tigoni gwatshavbo ga Egipito, gukhugela gutumbunuga ga ilo kala muhuno.

¹⁹Olu rumela gu ya wuyisa sifuyo sago, ni silo sago satshavbo si guromo vbavbandze. Kholu ndzadzi nya maralala yi na thegela vathu vatshavbo ni sirengo satshavbo si na gu bani si romo vbavbandze, satshavbo si na gu bani sa sa khothedwa mudzinyumbani si nafa.”

²⁰Sithumi sa Faro si nga yingisago sileletelo sa PFHUMU Nungungulu, si di vbiredzela gu wuyisela sithumi ni sifuyo sawe dzinyumbani.

²¹Aholu uye a ngamba khathala khu lito la PFHUMU Nungungulu monyoni gwaye, a di diga sithumi ni mitshambi yaye vbavbandze.

²²Khavbo avbo, PFHUMU Nungungulu a di embela Mosi, khuye: “Khusedza mandza yago ndzadzini, gasi yiwa ndzadzi nya maralala tigoni gwatshavbo ga Egipito, yi thegela vathu, sifuyo ni mwasi watshavbo tigoni ga Egipito.”

²³Mosi a di khusa ndronga yaye a gu nonedza damboni, khavbo avbo, PFHUMU Nungungulu a di dzumisa mabara ni gu wisa maralala gu dzura nilo mafuni. PFHUMU Nungungulu a di wisa ndzadzi nya maralala tigoni ga Egipito.

²⁴ Gu di manega maralala na ma pfanganide ni nilo, khu mawelo nya guthise ngudzu, nya gu gima gu di si gu wonwi tigoni gwatshavbo ga Egipito, gukhugela guvbahwa nya ilo.

²⁵Tigoni gwatshavbo ga Egipito ndzadzi nya maralala yi di mbembisa silo satshavbo si nga bani siri vbavbandze, gukhugela vathu kala ni sirengo, maralala ma di songa ni mwasi wa khabini, ma komolela ni misimbo yatshavbo.

²⁶Vbavbandze basi ga litigo la Goseni, umo si nga bani si gu vbanya umo sanana sa Israyeli, umomo kha ma manega maralala.

²⁷Khavbo avbo, Faro a di ruma gu ya rana Mosi ni Aroni, a ta va embela, khuye: “Olu nyi ghohide; PFHUMU Nungungulu lulamide; aholu eni ni vathu vangu hi sighohi.

²⁸Lombelelani ga PFHUMU Nungungulu, kholu hi garade, gasi gu si manegi gambe mabara ni maralala nya guthise ngudzu. Eni nyi na mi tshulani mu hongola nyamba himbedzedwa khu gilo.”

²⁹Mosi a di mu embela, khuye: “Avbo nyi na dugago khu dhoropani nyi na ya khusedza mandza nyi lomba ga PFHUMU Nungungulu; mabara ma na degula ni ndzadzi nya maralala yi na khamuga, ufela gu dziti gukhuwe litigo la gu lumba PFHUMU Nungungulu.

³⁰Aholu eni nyi ngu dziti gukheni uwe gumogo ni madhota yago ni olu gambe kha mu na nga thava mbeli ga PFHUMU Nungungulu.”

³¹Wu di ghohetedwa wuluva wu nga bani wu thede senge, ni tirigu yi nga bani yi thede makonva.

³²Aholu sivbila ni mala kha sa nga ghohetedwa kholu si di bani si si gu rumbugi.

³³Khavbo avbo, Mosi a di khuga mahoni ga Faro a duga vbavbandze nya lidhoropa. A di khusedza mandza ga PFHUMU Nungungulu; mabara ma di degula, ni ndzadzi nya maralala yi di khamuga, yi siwi gambe tigoni.

³⁴Faro na wonide gukhuye ndzadzi yi khamugide gumogo ni mabara ni maralala, a di simamisa a ghoha khu gu dzi bangisa monyo waye uye ni sithumi saye.

³⁵Kharati, monyo wa Faro wu di banga; gima kha nga dzumela gutshula sanana sa Israyeli a si diga si hongola, kha nga idzo PFHUMU Nungungulu a nga ganelago khu likana la Mosi.