Read gitonga Joba 10 Bible Online

Joba 10 - gitonga bible

Joba 10

¹Hefemulo wangu wu ngu garadzega khu guvbanya; nyi na phefemula esi si nyi garadzago monyoni gwangu, khu guralo, nyi na ganela khu guvbisega nya hefemulo wangu.

²Nyi na embela Nungungulu, kheni: “U nga nyi rwegi nandru, nyi yeyedze igyo nyi gu ghohedego.

³Ina si ngu gu tsakisa gu khala khu gu nyi tsayisa, u si khathali khu thumo u giridego khu mandza yago u diga va nya guvivbedwa khu monyo va gira makungo va ma golago, gani?

⁴U na ni maho nya nyama, gani? Ina mawonelo yago ma gu fanana ni ya vathu, gani?

⁵Ina matshigu yago ma ngu fanana ni ya muthu, gani? Ni myaga yago nya guvbanye, yi ngu fanana ni myaga nya muthu, gani?

⁶Gasi uwe wa gu tsaka khu gu vbweta gu mana nandru avbo gwangu, gani?

⁷Avbo u dzitigo gwadi gukhuwe nyi mwalo nandru; gambe mwalo uye a nyi vbulugisago mandzani gwago!

⁸Khandri mandza yago ma nyi wumbidego ni gu nyi tiyisa, olu muhuno u nyi vbadzulelago, gani?

⁹Alakanya gukhuwe, u nyi wumbide khu libumba; olu wa gu vbweta gukhuwe nyi bwelela nyi khala gambe nguma, gani?

¹⁰Ina kha wa nyi guhula kha nga mahwe, u wuya u nyi tiyisa gukhwatshi nyi wusa, gani?

¹¹U nyi fenengedzide khu lidowo ni givili, u bwelo khavbo u tshanganisa marambo yangu gumogo ni misivba.

¹²U nyi ningide womi, u nyi sayisa khu lihaladzo, wuwadi wago wu vegedzide womi wangu.

¹³Ambari u na si sihide silo sesi monyoni gwago, nyi ngu siti iso u nga bani u si alakanya.

¹⁴Nya gu ghoha, u ngu nyi wona; aholu khu tsetseleli gighoho gyangu.

¹⁵Nya gu bani nyiri gighohi, nyi na ni libango; nya gu bani nyi lulamide, kha nyi kodzi ni gu khusedza hungo, kholu nyi tade khu dzitshoni nyi wona wusiwana wangu.

¹⁶Gikhati nyi wugago, uwe wa gu nyi sota gukhwatshi u nghala, u dzi wonegisa avbo gwangu, khu ndzila nya guthise ni gusamadzisa.

¹⁷Wa gu rana dzifakazi dzi ta nyi rwega nandru, u engedzela gu nyi wugela, dzimhango dzi nyi thegela khu gipitipiti.

¹⁸U nyi dusede ginani khu rumbuni ga mayi wangu? Na nyi fede umomo nyamba wonwa khu muthu.

¹⁹Na nyi dzegede gu duga khu rumbuni nyi bela phalani gukhwatshi kha nya manega tigoni!

²⁰Ina matshigu yangu kha ma rola, gani? Nyi dige gasi nyi mane gutangala vbadugwana,

²¹na nyi si khugi, gasi nyiya wulanga nyi na gumba wuya gambe, tigoni nya gidema ni mutsani nya lufu;

²²tigoni nya gidema, gukhwatshi vbakari nya wutshigu, mutsani nya gufe nya pfilupfilu nya yikhongolo, avbo guwonegela gu fananago ni gidema.”