Read gitonga Joba 16 Bible Online

Joba 16 - gitonga bible

Joba 16

¹Khu guralo Joba a di hakha, khuye:

²“Gale na nyi pwide magana nya nga aya mu nyi embelago; aholu enu mwatshavbo kha muri vatangadzisi va gilo.

³Ina magana yaya nyamba phasa gilo kha ma na nga vbela, gani? Gasi ginani gi gu girago u hakha kharato?

⁴Eni neni nyi di hadza gu ganela nga enu; nari gupwani libango li nga nyi dugelela li diri vbakari gwanu, nyi di hadza gu ganela magana nya gu mi khuvekise, nyi kutsunga hungo khu enu.

⁵Nyi di hadza gu mi tangadzisa khu magana yangu, nyi mi tiyisedza guvbisegani gwanu.

⁶Olu nyi na kheni ginani, kholu nya gu ganela, wuvi wangu kha wu vbungugi; nya gu degula gambe kha gu phasi gilo.

⁷Khu lisine, uwe Nungungulu u nyi vbedzide tshivba; U nyi fuvisede ngamo yangu yatshavbo.

⁸U nyi tshaniside nyi tshala khu sikongolo, wufakazi nya iso khu guwondra gwangu gu nyi thuledzago mbeli gwangu.

⁹Uwe Nungungulu, u nyi vbadzulede khu likhulo lago, U nyi khukhurusela magwaha; valala vangu va gu nyi laludzela khu maho nya guthise.

¹⁰Vathu va hamide magana yawe, va nyi wugela, va nyi yuyutela na va gu nyi veta dzipama. Vatshavbo tshanganide gumogo, va nyi wugela.

¹¹Nungungulu a nyi giride nyi thegela mandzani ga va nya mayigo, a nyi rinya mandzani nya sighohi.

¹²Nyi di gu vbanya gurulani, aholu Uye a nyi fanyeledzede; a nyi mode khu thamo a nyi vbadzulela; a nyi paya khu gighalala.

¹³Vanyamalaho vaye va nyi randrede. Va pila dzitshwa dzangu nyamba nyi tsetsa, nyongwa yangu yi vbalagela vbavbatshi.

¹⁴A nyi thede dzimbanga milini gwatshavbo, a nyi sasela gukhwatshi nyi mudwani nya nyimbi.

¹⁵Nyi sonide ngandzu nya gilendra, nyi pfhugunyede khovbe yangu ngumani.

¹⁶Nyi simbide khovbe khu gulila ngudzu, ni dzitshi dzangu dza gu wona gidema nya lufu,

¹⁷ambari nyi gu mwalo guvivba nyi giridego, nombelo wangu wu na age.

¹⁸Uwe mafu u nga midzi novba wangu! Wu nga manegi ni wulanga nya guya sihale avbo huwa yangu!

¹⁹ Olu dzitini kamwe nya gukhenu, fakazi yangu yomo ndzadzini, ni muemeli wangu, womo vbatshani ngudzu.

²⁰Dzipari dzangu dza gu nyi wona, dza gu nyi hega, maho yangu ma gu simba khu gulila mbeli ga Nungungulu;

²¹uye a ngu emela mahungu ya muthu mbeli ga Nungungulu, nga idzo a emelago khidzo muthu ga muakelane waye.

²²Kholu hwane nya gu bani yi vbindride, myaga yidugwana, nyi naya khu ndzila nyi na gumba wuya gambe khiyo.”