Read gitonga Joba 2 Bible Online

Joba 2 - gitonga bible

Joba 2

¹Tshigu mwedo sihathwa sa PFHUMU Nungungulu si dita dzi wonegisa mbeli ga PFHUMU Nungungulu, Sathane a dita nuye ata patana navo mbeli ga PFHUMU Nungungulu.

²PFHUMU Nungungulu a di wudzisa Sathane, khuye: “Gasi uwe wa guta khu hayi?” Sathane a di hakha, khuye: “Nya gu legalega nyi zulazula tigoni gwatshavbo.”

³PFHUMU Nungungulu a di mu wudzisa, khuye: “Ina u di nga wona githumi gyangu Joba, gani? Kholu mwalo muthu mafuni momu a lulamidego ni gutumbega, a thavago Nungungulu ni gu nyenya guvivba, gufanana naye, kala nolu a nga tiyide gululamani, ambari olu u nyi kutsedzedego gu mu dusela silo saye satshavbo nari mwalo nandru.”

⁴Sathane a di phindrula PFHUMU Nungungulu, khuye: “Tshongi khu tshongi basi. Muthu a ngu dzi kodza gu ningela satshavbo a gu naso, gasi gu kodza gu vbanyisa womi waye.

⁵Nga thawuludza gyandza gyago, u kuha marambo ni nyama yaye, u na wona idzo a na gu gu vala khidzo, nu gu mu wona.”

⁶PFHUMU Nungungulu a di embela Sathane, khuye: “Khuye uyoyo, womo mandzani gwago, aholu u nga dusi womi waye.”

⁷Khu guralo, Sathane a di duga mbeli ga PFHUMU Nungungulu, aya veta Joba khu madwali nya sithunya nya guvbise ngudzu, gukhugela mawundruni kala hungoni.

⁸Khavbo avbo, Joba a diya khala vbatalatunu a vbweta gindzengele a dzi tshuvela khigyo.

⁹Mwangadzi waye a di mu embela, khuye: “Gwa gu phasa ginani gu simama gululamani? Vala Nungungulu, ufe.”

¹⁰Joba a di mu hakha, khuye: “Wa gu ganela kha nga nyamayi nya gipumbu. Ina hi yede gu hakha basi iso nya sadi khiyo ga Nungungulu, nyamba hakha iso nya guvivbe, gani?” Khu satshavbo soso, Joba gima kha dzi nyenyezisa khu gu ganela khu likana laye.

¹¹Avbo dzipari dzaye dza dzitharu dzi ngapwago libango leli li nga dugelela Joba, Elifazi, Mutemane; Bhilidhadhi, Musuwa; ni Zofari Munahami; va di khuga, muthu ni muthu khumo a nga bani a manegela umo, va di pwanana gasi guta mu thavelela ni gu mu tangadzisa.

¹²Va di khusa maho na va nga guta khu hwindzo, kha va nga muti; va di phela gulila khu lito nya gukhugege, muthu ni muthu a di pferula dzingandzu dzaye a dzudzuga, va phorola nguma mihungoni gwawe.

¹³Va di khala naye vbavbatshi va mu bangaladza livbandre na mavili matshigu, wutshigu ni mihani na va si ganeli gilo naye, kholu va di gusaniseka ngudzu.