Read gitonga Joba 20 Bible Online

Joba 20 - gitonga bible

Joba 20

¹Zofari, Munahami, a di hakha, khuye:

²Mapimo yangu ma hambanegide, khu guralo, nyi ngu gu ninga phindrulo, kholu nyi ngu garadzega ngudzu monyoni.

³Eni nyi pwide magana ma nyi payago nyi thedwego khayo dzitshoni, aholu wugengeli wangu, wu na nyi phasa gu gu ninga phindrulo.

⁴Uwe khu pimi gukhuwe gu giride kharati gukhugela galegaleyo, gukhugela litshigu a vegidwego muthu omu mafuni,

⁵wudhumo wa va nya guvivbedwa khu monyo kha wuyi danga, ni gunengela nya sighohi, khwa matshigwanyana, gani?

⁶Ambari a gu dzi khusedza kala ndzadzini, ni hungo waye wu kuha mapfhi,

⁷uye a na hina gu fanana ni ndzilo yaye kala gupindruga, ni vale va mu wonego va na khavo: “Gasi olu womo hayi!”

⁸A na vbuvba kha nga ndroro, a si manwi gambe, a mwalalega kha nga giwoniso nya ligovbe.

⁹Maho ma mu wonego, kha ma na mu wona gambe, ni gaya gwaye kha na gu wona gambe.

¹⁰Sanana saye si na hakhisa sisiwana, uye kamwe khu mandza yaye, a na pheledza gu gira thomba va nga bani va yi phangide.

¹¹Ambari marambo yaye na ma nga tiyide khu kotani nya wudzaha a ngarigu navo, tshivba yaye va na mu dzinga nayo thowoni.

¹²Ambari silo nya guvivbe si tshamba kanani gwaye, uye a gu si siha lidimini gwaye,

¹³a si dzumeli guhambana naso, a si fundra kanani gwaye;

¹⁴ambari khu guralo, guhodza gogu gwa gu relela ndrani gwaye, gu naya vbindrugedza gu khala wuhungu nya dzinyoga.

¹⁵Uye a na gosa dzithomba a midzidego; Nungungulu a na dzi dusa khu rumbuni gwaye, a dzi dzudzuga.

¹⁶A na sela wuhungu nya dzinyoga, a songwa khu lidimi nya mamba.

¹⁷Kha napwa gunengela khu mitsongo ni sitsongwana, si gogago mahwe ni wulombe.

¹⁸A na bweledza sile a nga si thumago khu mandza yaye, nyamba phasega khiso, ambari gu tsakiswa khu mihandro nya wugwewo waye,

¹⁹kholu, a di tshanisa sisiwana a si hembulula, a wandra dzinyumba a ngamba dzi vbaha.

²⁰Kha nga monyo waye wu tadego khu makolo, ni gu khura a si khurigo, thomba yaye kha yi na mu vbulugisa.

²¹Gimwalo ni gimwegyo gi nga bani gi vbindra nyamba gi wandra, khu guralo, gughanya gwaye kha gu naya hwindzo.

²²Vbakari nya gufume gwaye a na dzipwa nari mwalo gilo, a na thegedwa khu libango nya likhongolo.

²³Avbo a na dzipwago na khuride, Nungungulu a na mu resela mhango nya likhulo laye, li vbalaga vbatshani gwaye li khala guhodza gwaye.

²⁴Ambari a gu vbuluga litshari nya dzisimbi, a na ya hekhwa khu gighalala nya sugu.

²⁵A gu homola gighalala khu hwamboni gwaye, litshari, li na duga khumo nya nyongwa yaye, na li gu khedziga. Kholu a na bani na tade khu hwanga.

²⁶Dzimhango dzatshavbo dzi na thegela vbatshani nya dzithomba dzaye, a na dagarela khu nilo nyamba furugedzwa, wu vbisa ni gu mbembisa satshavbo si na gu bani si tshade tshatshani gwaye.

²⁷Ndzadzini gu na mu nonedza sighoho saye, gasi mafu ma na mu wugela ma mu dwanisa.

²⁸Wu nata talo wuta kukuluta ndranga yaye ni thomba yatshavbo ya ndrangani gwaye yi na fuviswa khu mati, litshiguni nya likhulo la Nungungulu.

²⁹Owu khuwo tshatshazelo Nungungulu a ningago vatshavbo va nya guvivbedwa khu monyo, ni thomba Nungungulu a va ningago.